MATIU 4

1Afta dat, Gɔd in Spirit lid Jizɔs go na di dɛzat we Setan tray Jizɔs fɔ mek i du bad. 2Wɛn Jizɔs dɔn fast fɔti de ɛn nɛt, i bin angri. 3Na in Setan kam mit am ɛn se, “If yu na Gɔd in Pikin, tɛl dɛn ston ya fɔ tɔn to bred.” 4Bɔt Jizɔs se, “Dɛn rayt na Gɔd in Buk se, ‘Nɔto di it we pɔsin de it de gi am tru layf, na Gɔd in wɔd de gi pɔsin tru layf.’ ” 5Wɛn dat dɔn, Setan kɛr Jizɔs go Jerusɛlɛm, pantap di tawa we de na Gɔd in Os, 6ɛn i se, “If yu na Gɔd in Pikin, ib yusɛf dɔng, bikɔs dɛn rayt na Gɔd in Buk se, ‘Gɔd go tɛl in enjɛl dɛn fɔ gyad yu, ɛn yu go fɔdɔm na dɛn an, fɔ mek yu fut sɛf nɔ wund pan ston!’ ” 7Jizɔs se, “Dɛn rayt na Gɔd in Buk se, ‘Pɔsin nɔ fɔ tray fɔ mek Gɔd we na in Masta du wetin in want.’ ” 8Wɛn dat dɔn, Setan kɛr am go pantap wan ay ay il ɛn sho am ɔl dɛn neshɔn na wɔl wit ɔl dɛn pawa ɛn jɛntri. 9Setan se, “A go gi yu ɔl dɛn tin ya, if yu nil dɔng ɛn se mi na yu masta.” 10Jizɔs se, “Kɔmɔt biɛn mi, Setan! Dɛn rayt na Gɔd in Buk se, ‘Pɔsin fɔ nil dɔng bifo Gɔd we na in Masta ɛn pre to am ɛn na in nɔmɔ i fɔ wok fɔ.’ ” 11Dɛn Setan lɛf Jizɔs, ɛn enjɛl dɛn kam ɛp Jizɔs. 12Wɛn Jizɔs yɛri se dɛn dɔn ol Jɔn, i go na Galili. 13I nɔ go tap na Nazarɛt, na Kepanyɔm we de klos Lek Galili, midul Zebyulɔn ɛn Naftali, i go tap, 14so dat wetin di prɔfɛt we nem Ayzaya bin tɔk, go bi. 15I bin se, “Zebyulɔn ɛn Naftali we de na di ɔda sho nia Riva Jɔdan, klos da wata we dɛn kɔl Mɛditarenyan Si, insay Galili, we dɛn pipul we nɔto Ju plɛnti; 16di pipul dɛn we bin lib de bin de na dak, dɛn nɔ bin no Gɔd, bɔt dɛn si big layt; dɛn bin tan lɛkɛ pipul we want day, bɔt di layt dɔn shayn pan dɛn.” 17Frɔm da tɛm de Jizɔs bigin tɛl pipul se, “Una chenj una we ɛn lɛf fɔ du di bad tin dɛn we una de du, bikɔs Gɔd in rul dɔn kam klos una.” 18Wɛn Jizɔs bin de waka na di bich na Lek Galili, i si tu brɔda dɛn we na bin fisha man, Saymɔn we dɛn de kɔl Pita ɛn in brɔda Andru, dɛn tu bin de fishin wit fishin nɛt na Lek Galili. 19Jizɔs kɔl dɛn, i se, “Una kam bi mi lanin bɔy dɛn, ɛn a go sho una aw fɔ bring pipul kam to mi lɛkɛ aw una de kech fish.” 20Dɛn lɛf dɛn fishin nɛt wantɛm ɛn fala Jizɔs. 21Jizɔs go bifo say, na in i si Jems ɛn Jɔn, tu brɔda we Zɛbidi bɔn. Dɛn bin de insay bot wit dɛn papa Zɛbidi, dɛn bin de rɛdi dɛn fishin nɛt. Jizɔs kɔl dɛn, 22dɛn lɛf di bot ɛn dɛn papa wantɛm, ɛn fala Jizɔs go. 23Jizɔs go ɔlɔbɔt na Galili de tich pipul na di Ju mitin os dɛn, i tɛl dɛn di Gud Nyus bɔt di tɛm we Gɔd de kam rul, ɛn i mɛn pipul we gɛt ɔl kayn sik. 24Di nyus bɔt Jizɔs prɛd ɔlɔbɔt na Sirya, dat mek dɛn kɛr ɔl dɛn sik pipul, dɛn wan we dɛn bɔdi de at dɛn ɛn dɛn wan we gɛt dɛbul insay dɛn, dɛn wan we gɛt fiks, ɛn dɛn wan we nɔ ebul waka, kam to am; Jizɔs mɛn dɛn ɔl. 25Plɛnti pipul we kɔmɔt Galili, di Tɛn Tɔng dɛn, Jerusɛlɛm, Judia, ɛn dɛn pipul we de na di istɛn pat na Riva Jɔdan, bin de fala Jizɔs.

will be added

X\