MATIU 28

1Afta di de fɔ pre ɛn blo dɔn pas, ali Sɔnde mɔnin, Meri we kɔmɔt Magdala, ɛn di ɔda Meri go luk di ston grev. 2Wantɛm, na in di grɔn tri mbul bad bad wan; Gɔd sɛn in enjɛl kɔmɔt ɛvin we kam rol di big ston kɔmɔt we dɛn bin tek kɔba di grev domɔt, dɛn di enjɛl sidɔm pan di ston. 3Di enjɛl in fes bin de shayn lɛkɛ laytin ɛn in klos bin wayt pas sha tin. 4Di soja dɛn we bin de gyad di grev tri mbul bikɔs dɛn fred ɛn dɛn fɔdɔm lɛkɛ dayman. 5Di enjɛl tɛl di uman dɛn se, “Una nɔ fred, a no se una de luk fɔ Jizɔs we dɛn bin nel pan di krɔs. 6I nɔ de ya, i dɔn rayz frɔm di grev, lɛkɛ aw i bin tɛl una. Una kam luk di ples we i bin ledɔm. 7Una go wantɛm go tɛl in lanin bɔy dɛn se, i dɔn rayz frɔm di grev. I dɔn go bifo dɛn na Galili, dɛn go si am de. Na dis a gɛt fɔ tɛl una.” 8So di uman dɛn go wantɛm, dɛn bin de fred, bɔt dɛn bin gladi. Dɛn rɔn fɔ go tɛl in lanin bɔy dɛn ɔl wetin bi. 9Aw dɛn de go, na in dɛn jɛs si Jizɔs. Jizɔs tɔk to dɛn. I se, “Mek una gɛt kol at.” Dɛn go ol Jizɔs in fut ɛn wɔship am. 10Jizɔs se, “Una nɔ fred, una go tɛl mi lanin bɔy dɛn we tan lɛkɛ brɔda to mi fɔ go na Galili, dɛn go si mi de.” 11Wɛn di uman dɛn bin de go mit Jizɔs in lanin bɔy dɛn, sɔm pan di soja man dɛn we bin de gyad di grev go na Jerusɛlɛm ɛn tɛl dɛn bigman we de mek sakri fays fɔ pipul sin ɔl wetin bi. 12Di bigman dɛn we de mek sakri fays fɔ pipul sin go mit di ɔda Ju bigman dɛn, dɛn ɔl ɛng ed, dɔn dɛn gi di soja man dɛn plɛnti mɔni. 13Dɛn tɔk to di soja man dɛn, dɛn se, “Una fɔ tɛl pipul se, na Jizɔs in lanin bɔy dɛn kam tif di bɔdi na nɛt, we una bin de slip. 14Ɛn if di gɔvna yɛri bɔt dat, wi go tɛl am se nɔto una fɔlt. Wi nɔ go mek trɔbul mit una.” 15Di soja man dɛn tek di mɔni, dɛn du wetin dɛn bigman dɛn we de mek sakri fays fɔ pipul sin ɛn di Ju bigman dɛn tɛl dɛn fɔ du. Di wɔd prɛd ɔlɔbɔt to di Ju pipul dɛn ɛn di Ju pipul dɛn biliv am sote naw. 16Di ilɛvin lanin bɔy dɛn go na Galili, na di il we Jizɔs bin tɛl dɛn fɔ go. 17Wɛn dɛn si am, dɛn nil dɔng bifo am, pan ɔl we sɔm pan dɛn bin de dawt if na Jizɔs fɔ tru. 18Jizɔs go klos dɛn ɛn se, “Gɔd dɔn gi mi ɔl di pawa fɔ rul na ɛvin ɛn dis wɔl. 19Una go ɔlɔbɔt na di wɔl ɛn mek di pipul dɛn bi mi lanin bɔy dɛn; una baptayz dɛn wit di pawa we Papa Gɔd ɛn in Pikin ɛn in Spirit gi una. 20Una lan dɛn fɔ du ɔl wetin a dɔn tɛl una. A de wit una ɛn a go de wit una ɔltɛm sote di wɔl dɔn.”

will be added

X\