MATIU 24

1Jizɔs kɔmɔt na Gɔd in Os de go, na in in lanin bɔy dɛn kam tɛl am fɔ luk di bildin dɛn gud. 2Jizɔs tɛl dɛn se, “Una si ɔl dis, nɔto so? A de tɛl una se, dɛn go skata dɛn, wan ston nɔ go lɛf pantap in kɔmpin.” 3Wɛn Jizɔs sidɔm na Mawnt Ɔliv, in lanin bɔy dɛn nɔmɔ kam mit am ɛn aks am se, “Tɛl wi ustɛm dɛn tin ya go bi, us sayn go sho wi se yu de kam bak ɛn di wɔl de dɔn?” 4Jizɔs se, “Una tek tɛm mek nɔbɔdi nɔ mek una ful. 5Plɛnti man dɛn go tek mi nem kam, ɛn dɛn go kam se dɛn na di Mɛsaya ɛn dɛn go mek plɛnti pipul ful. 6Una go yɛri bɔt wa we de klos una, ɛn dɛn go tɛl una bɔt wa we de fawe, bɔt una at nɔ fɔ kɔt. Dɛn tin de mɔs bi, bɔt di wɔl nɔ go ɛnd yet. 7Wan kɔntri go fɛt ɔda kɔntri; wan neshɔn go fɛt ɔda neshɔn; bad angri go de na wɔl ɛn di grɔn go tri mbul plɛnti say. 8Ɔl dɛn bad tin de na di fɔs waala dɛn we go fɔdɔm. Wɔs wan dɛn go de biɛn. 9“Da tɛm de, dɛn go ol sɔm pan una, ɛn gi una to pipul we go mek una sɔfa, dɔn dɛn go kil una. Pipul nɔ go lɛk una bikɔs una biliv pan mi. 10Ɛn da sem tɛm de plɛnti pipul go tap fɔ biliv pan mi. Dɛn go sɛl dɛn kɔmpin, dɛn go et dɛn kɔmpin. 11Plɛnti prɔfɛt we nɔ de tɔk tru go kam ɛn mek plɛnti pipul ful. 12Ɛn bikɔs bad go plɛnti mɔ ɛn mɔ, di lɛk we plɛnti pipul gɛt na dɛn at go de lɛs. 13Bɔt Gɔd go sev ɛnibɔdi we bia sote i day. 14Pipul go tɛl ɔlman na wɔl di Gud Nyus bɔt wɛn Gɔd go rul di wɔl, so dat ɔlman go gɛt di chans fɔ yɛri ɛn biliv di Gud Nyus; na da tɛm de di wɔl go dɔn. 15“Una go si di bad bad tin we prɔfɛt Daniɛl bin tɔk bɔt, tinap na Gɔd in Os.” (Una we de rid: una ɔnda stand wetin dis min!) 16“Da tɛm de, dɛn pipul we de na Judia fɔ rɔnawe go na dɛn il. 17Dɛn wan we de pantap ruf nɔ fɔ kam dɔng ɛn go insay dɛn os fɔ tek dɛn prɔpati; 18ɛn dɛn wan we de wok na fil nɔ fɔ tɔn bak go tek dɛn klos. 19Da tɛm de, i go bad fɔ dɛn bɛlɛ uman ɛn dɛn wan we gɛt yɔng pikin dɛn we de sɔk bɔbi! 20Una pre mek di tɛm we una de rɔnawe nɔ bi ren sizin ɔ di de fɔ pre ɛn blo! 21Di trɔbul we go bi da tɛm de go pas ɔl di wan dɛn we dɔn bi, frɔm di tɛm we Gɔd mek di wɔl sote naw, ɛn da kayn trɔbul de nɔ go bi igen. 22If Gɔd nɔ mek da tɛm de shɔt, wan mɔta lman nɔ go lɛf na di wɔl; bɔt Gɔd go mek da tɛm de shɔt fɔseka dɛn pipul we i dɔn pik fɔ sev. 23“So if ɛnibɔdi tɛl una se, ‘Una luk di Mɛsaya naya!’ ɔ ‘Una luk am yanda!’ una nɔ biliv da pɔsin de. 24Bikɔs sɔm pipul go kam we go lay se dɛn na di Mɛsaya ɛn sɔm go kam we go lay se dɛn na prɔfɛt, ɛn dɛn go du plɛnti wɔnda ful wok ɛn sho plɛnti sayn, so dat da we de dɛn kin mek dɛn pipul ful we Gɔd dɔn pik fɔ sev, if dɛn ebul du dat. 25Una lisin, a de tɛl una dɛn tin ya bifo dɛn go bi. 26“So if pipul tɛl una se di Mɛsaya de na di dɛzat, una nɔ go de; ɔ if dɛn tɛl una se i ayd insay os, una nɔ biliv dɛn. 27Mɔta lman Pikin go kam lɛkɛ aw laytin kin kɔt ɔlɔbɔt na di klawd. 28“Ɛni say we bif we dɔn day de, na de yuba dɛn de go gɛda. 29“Jɛs ɔl dɛn trɔbul de dɔn, di san go dak, di mun nɔ go shayn igen, di sta dɛn go fɔdɔm kɔmɔt na klawd, ɛn di pawa dɛn we de na di klawd go muf kɔmɔt na di ples we dɛn bin de. 30Dɛn ɔlman go si di sayn na di klawd we go sho se Mɔta lman Pikin de kam. Ɔlman na wɔl go kray we dɛn si Mɔta lman Pikin de kɔmɔt na klawd kam. I go kam wit pawa, ɛn brayt layt go de shayn rawnd am. 31Trɔmpɛt go blo lawd wan, dɔn i go sɛn in enjɛl dɛn ɔlɔbɔt na wɔl frɔm wan ɛnd to di ɔda fɔ gɛda dɛn pipul we i dɔn pik fɔ bi in yon, ɛn bring dɛn kam to am. 32“Tin de fɔ lan pan wetin de bi to di fig tik. Wɛn di an dɛn pul yɔng grin lif, una no se ren sizin de kam. 33Semwe so, wɛn una si ɔl dɛn tin de, una go no se di tɛm we Mɔta lman Pikin fɔ kam dɔn de klos. 34A de tɛl una se, ɔl dɛn tin ya mɔs bi bifo dɛn pipul we de ya naw, day. 35Natin nɔ go de ɔpklawd igen ɛn di wɔl sɛf nɔ go de igen, bɔt mi wɔd dɛn go de sote go wit ɔl dɛn pawa. 36“Bɔt nɔbɔdi nɔ no di de ɔ di awa we dɛn tin ya go bi. Gɔd in enjɛl dɛnsɛf ɛn Gɔd in Pikin insɛf nɔ no di de ɔ di awa, na di Papa in wan gren no di de ɛn di awa we dat go bi. 37Di tɛm we Mɔta lman Pikin de kam, pipul go de du lɛkɛ aw dɛn bin de du da tɛm we Noa bin de. 38Bifo wata bin kɔba di wɔl, ɔlman bin de it ɛn drink; pipul bin de mared. Na dat dɛn bin de pan sote di tɛm we Noa go insay di big bot we i bil, 39ɛn dɛn nɔ bin no se ren go kam we go mek wata kɔba ɔl di wɔl, pas we di ren kam ɛn wata kam kɔba ɛn kil dɛn ɔl. Na so i go bi we Mɔta lman Pikin go kam. 40Da tɛm de, tu man go de wok na fam, enjɛl dɛn go tek wan go na ɛvin, ɛn lɛf di ɔda wan. 41Tu uman dɛn go de gren, enjɛl dɛn go kam tek wan ɛn lɛf di ɔda wan. 42“Na dat mek una fɔ wayda wek, bikɔs una nɔ no di de we una Masta go kam. 43Una fɔ no se if di edman na os bin no ustɛm tifman de kam na nɛt, i nɔ bin fɔ slip, ɛn i nɔ bin fɔ gri mek tifman brok in os ɛn tif in prɔpati. 44So, unasɛf fɔ rɛdi ɔltɛm, bikɔs Mɔta lman Pikin go kam di tɛm we una nɔ mekɔp se i go kam. 45“Udat na di bɔy we tru to in masta ɛn we gɛt sɛns? Na di bɔy dat we in masta go mek edman fɔ ɔl di ɔda bɔy dɛn na di os, wɛn i de go patrol, ɛn di masta go tɛl am fɔ gi di ɔda bɔy dɛn, dɛn it wɛn di rayt tɛm rich. 46Di bɔy go gɛt blɛsin if in masta kam mit am de du di rayt tin. 47A de tɛl una se, di masta go mek da bɔy de luk ɔl in prɔpati dɛn. 48Bɔt if di bɔy na bad pɔsin, i go se, ‘Mi masta nɔ de kam kwik’, 49ɛn i go bigin bit di ɔda bɔy dɛn, dɔn i go go it ɛn drink wit dɛn pipul we de drɔnk. 50Dɛn di masta we gɛt di os go kam de we di bɔy nɔ mekɔp ɛn awa we i nɔ no. 51Di masta go pɔnish am bad wan, ɛn i go put am na di ples we dɛn ipo krit pipul de kray bita wan ɛn bɛt dɛn tɔng; insɛf go kray bita wan ɛn bɛt in tɔng.

will be added

X\