MATIU 20

1“Gɔd in rul tan lɛkɛ we wan man we gɛt fam go wan ali mɔnin fɔ tek lebra dɛn we go wok na in fam. 2Di man gri fɔ gi dɛn lebra pe fɔ di de, dɛn i sɛn dɛn go wok na in fam. 3Bay nayn oklɔk, di man go bak na di ples we ɔlman de gɛda, i si sɔm man dɛn we nɔ de du natin tinap de. 4So i kɔl dɛn, i se, ‘Unasɛf kam go wok na mi fam, a go pe una wetin una fɔ gɛt.’ 5So di man dɛn go wok. Bay twɛlv oklɔk santɛm ɛn tri oklɔk i go bak go fɛn ɔda lebra dɛn. 6Bay fayv oklɔk, wɛn di man go na di ples we ɔlman de gɛda, i si sɔm ɔda man dɛn stil tinap de. I aks dɛn se, ‘Wetin mek una tinap ya ol de, una nɔ de du natin?’ 7Dɛn ansa se, ‘Nɔbɔdi nɔ tek wi fɔ wok.’ Di man se, ‘Wɛl, unasɛf kam go wok na mi fam.’ 8“Wɛn ivintɛm rich, di man we gɛt di fam tɛl in edman fɔ di lebra dɛn fɔ kɔl di lebra dɛn fɔ kam tek dɛn pe. I bigin pe di lebra dɛn we i tek las sote i rich to di wan dɛn we i tek fɔs. 9I gi di wan dɛn we i tek bay fayv oklɔk di sem pe lɛkɛ di wan dɛn we i tek ali mɔnin. 10Wɛn di lebra dɛn we i tek ali mɔnin rich to di man we gɛt di fam, dɛn min se i go pe dɛn pas aw i pe di ɔda lebra dɛn, bɔt i gi dɛn ɔl di sem pe. 11Di lebra dɛn we i tek ali mɔnin tek dɛn mɔni ɛn bigin grɔmbul pan di man we gɛt di fam. 12Dɛn se, ‘Di lebra dɛn we yu tek las, na wan awa nɔmɔ dɛn wok, bɔt wi wok ol de ɛn di san bit wi, dɔn yu kam gi wi di sem pe.’ 13“Di man tɛl wan pan dɛn se, ‘Padi, lisin mi, a nɔ du yu bad, bikɔs yu bin gri fɔ tek lebra pe fɔ de. 14Tek yu pe ɛn go na yu os. Na mi fil fɔ pe dɛn lebra we a tek las di sem pe we a gi yu. 15A nɔ gɛt rayt fɔ du wetin a want wit mi mɔni? Na jɛlɔs una de jɛlɔs dɛn fɔ wetin a pe dɛn?’ ” 16Na in Jizɔs tɔk se, “Dɛn wan we de las go de fɔs, ɛn dɛn wan we de fɔs go de las.” 17Wɛn Jizɔs bin de go na Jerusɛlɛm, i kɛr in twɛlv lanin bɔy dɛn go. Wɛn dɛn de go, i kɔl dɛn na kɔna ɛn tɔk to dɛn. 18I se, “Wi de go na Jerusɛlɛm, na de pipul dɛn go ol Mɔta lman Pikin ɛn and am ova gi dɛn bigman we de mek sakri fays fɔ pipul sin, ɛn di Ju Lɔ ticha dɛn, dɔn dɛn go jɔj am ɛn kɔndɛm am. 19Afta dat, dɛn go and am ova gi di Roman bigman dɛn we de na Jerusɛlɛm. Di pipul dɛn we lib de go laf am, bit am ɛn nel am pan krɔs; bɔt i go rayz frɔm di grev di de we mek tri.” 20Wɛn dat dɔn, Zɛbidi in wɛf ɛn in pikin dɛn kam mit Jizɔs; di uman nil dɔng bifo Jizɔs ɛn beg Jizɔs fɔ du sɔntin fɔ am. 21Jizɔs aks am se, “Wetin yu want?” I ansa se, “A want mek yu prɔmis mi se, mi tu pikin dɛn go sidɔm klos yu wɛn yu de rul, wan fɔ sidɔm na yu raytan ɛn di ɔda wan na yu lɛfan.” 22Jizɔs aks di pikin dɛn se, “Una nɔ no wetin una de aks fɔ. Una go ebul sɔfa lɛkɛ aw a go sɔfa?” Dɛn ansa se, “Wi go ebul, sa.” 23Jizɔs se, “Una go sɔfa lɛkɛ aw a go sɔfa, bɔt a nɔ gɛt di pawa fɔ mek una sidɔm na mi raytan ɔ lɛfan, mi Papa dɔn kip dɛn ples de fɔ dɛn pipul we i dɔn mak fɔ lib de.” 24Wɛn di ɔda lanin bɔy dɛn yɛri dat, dɛn vɛks pan di tu brɔda dɛn. 25So Jizɔs kɔl dɛn ɔl ɛn se, “Una no se, dɛn pipul we de rul dɛn wan we nɔ biliv Gɔd, gɛt pawa oba dɛn ɛn dɛn de tɛl dɛn wetin dɛn fɔ du ɔltɛm. 26Bɔt nɔto so i go bi fɔ una. If ɛni wan pan una want fɔ bi bigman, i fɔ wok fɔ una ɔl lɛkɛ se in na una bɔy. 27Ɛn ɛni wan pan una we want de bifo, fɔ bi slev fɔ una ɔl; 28una fɔ tan lɛkɛ Mɔta lman Pikin, we nɔ kam fɔ mek mɔta lman bi in savant, bɔt i kam fɔ bi dɛn savant ɛn fɔ gi in layf fɔ sev plɛnti plɛnti pipul.” 29Wɛn Jizɔs de kɔmɔt Jɛriko, plɛnti pipul bin de fala am. 30Tu blɛnyay man bin sidɔm klos di rod; wɛn dɛn yɛri se Jizɔs de pas, dɛn bigin ala se, “Yu we na Devid in pikin, sɔri fɔ wi, sa!” 31Di pipul dɛn tɔk pan dɛn mek dɛn sɛt mɔt; bɔt na di mɔ dɛn bin de ala se, “Yu we na Devid in pikin, sɔri fɔ wi, sa!” 32Jizɔs tinap ɛn kɔl dɛn, i aks dɛn se, “Wetin una want mek a du fɔ una?” 33Dɛn ansa se, “Mɛn wi yay fɔ wi, sa, so dat wi go ebul si!” 34Jizɔs sɔri fɔ dɛn, i tɔch dɛn yay; dɛn si wantɛm, ɛn dɛn fala am.

will be added

X\