MATIU 14

1Da sem tɛm de, Ɛrɔd we bin de rul na Galili, yɛri bɔt Jizɔs. 2I bigin tɔk to in ɔfisa dɛn, i se, “Dis nɔto ɔda pɔsin pas Jɔn we bin de baptayz, i dɔn gɛt layf bak. Na dat mek i gɛt pawa fɔ du wɔnda ful wok.” 3King Ɛrɔd tɔk dat, bikɔs i bin dɔn mek dɛn ol Jɔn we bin de baptayz, tay am, ɛn put am na sɛl. King Ɛrɔd bin du dat fɔseka Filip in wɛf, Ɛro dias; Filip na bin King Ɛrɔd in brɔda. 4Jɔn we bin de baptayz bin de tɛl King Ɛrɔd se i nɔ rayt fɔ mek i mared Ɛro dias we na in brɔda, Filip in wɛf. 5King Ɛrɔd bin dɔn want fɔ kil Jɔn, bɔt i bin de fred di Ju pipul dɛn, bikɔs di Ju pipul dɛn bin tek Jɔn fɔ bi prɔfɛt. 6Bɔt di de we dɛn mek King Ɛrɔd in batde, Ɛro dias in gyal pikin dans fɔ di pipul dɛn ɛn King Ɛrɔd. King Ɛrɔd bin so gladi fɔ di dans we i dans, 7dat i swɛ se, in go gi Ɛro dias in gyal pikin ɛni tin we i aks am fɔ. 8Ɛro dias bin dɔn put wɔd na in pikin yes, so i tɛl di king se, “Put Jɔn, we bin de baptayz pipul, in ed na plet ɛn bring am kam gi mi naw!” 9Di king bin sɔri bad, bɔt bikɔs i bin dɔn swɛ bifo ɔlman, i tɛl dɛn fɔ gi di gyal pikin, Jɔn in ed. 10So i sɛn na di jel se mek dɛn go kɔt Jɔn in ed kɔmɔt. 11Dɛn put Jɔn in ed na plet, bring am kam gi di gyal pikin, dɔn i kɛr am go to in mama. 12Jɔn in lanin bɔy dɛn kam tek di bɔdi, dɛn go bɛr am, dɔn dɛn go tɛl Jizɔs. 13Wɛn Jizɔs yɛri bɔt dat, i lɛf di ples we i bin de, tek bot go na ples we pipul nɔ bin de. Wɛn di pipul dɛn yɛri bɔt dat, dɛn kɔmɔt na di tɔng dɛn we dɛn bin de, dɛn waka bay land go mit Jizɔs. 14As Jizɔs kɔmɔt na di bot go na di sho, i mit plɛnti pipul; i sɔri fɔ dɛn ɛn mɛn di sik wan dɛn. 15Da sem ivintɛm de, in lanin bɔy dɛn go mit am, dɛn se, “Ivintɛm dɔn kam, ɛn dis na ples we pipul nɔ tap. Tɛl di pipul dɛn fɔ go bay it fɔ dɛnsɛf na dɛn vilej we de klos ya.” 16Jizɔs tɛl dɛn se, “Una nɔ fɔ sɛn di pipul dɛn go, una fɔ gi dɛn tin fɔ it!” 17Di lanin bɔy dɛn se, “Wi nɔ gɛt pas fayv lof bred ɛn tu fish.” 18Jizɔs se, “Una bring dɛn kam.” 19I tɛl di pipul dɛn fɔ sidɔm na di gras; dɔn i tek di fayv lof bred ɛn di tu fish, i luk ɔp na ɛvin ɛn pre ɛn tɛl Gɔd tɛnki. I kɔt kɔt di lof bred gi in lanin bɔy dɛn, dɔn di lanin bɔy dɛn sheb am gi di pipul dɛn. 20Ɔlman it te dɛn bɛlful. Wɛn di lanin bɔy dɛn pik di af af we dɛn it lɛf, i ful twɛlv blay. 21Di man dɛn we it bin rich fayv tawzin, ɛn dɛn nɔ kɔnt di uman dɛn ɛn di pikin dɛn. 22Jizɔs mek di lanin bɔy dɛn tek bot ɛn krɔs go oba Lek Galili, bɔt in lɛf biɛn fɔs fɔ tɛl di pipul dɛn mek dɛn tɔn bak go na dɛn os. 23Wɛn i dɔn mek ɔl di pipul dɛn tɔn bak go na dɛn os, in wan go ɔp di il go pre. I bin lib de sote ivintɛm. 24Da tɛm de di bot bin dɔn de midul di lek. Di wata bin rɔf so di bot nɔ bin stɛdi, bikɔs di briz bin de blo tra nga wan. 25Midul nɛt bay tri oklɔk, Jizɔs waka pantap di wata go mit in lanin bɔy dɛn. 26Wɛn dɛn si am de waka pantap di wata, dɛn se, “Na gost,” dɛn ala bikɔs dɛn fred. 27Jizɔs tɔk to dɛn wantɛm. I se, “Una nɔ fred, una nɔ wɔri, na mi dis!” 28Na in Pita se, “Masta, if na yu, fɔ tru, mek a waka pantap di wata go mit yu.” 29Jizɔs se, “Kam!” So Pita kɔmɔt insay di bot ɛn bigin waka pantap di wata fɔ go mit Jizɔs. 30Bɔt Pita fred wɛn i fil di trɔng briz, na in i bigin sink na di wata. I ala se, “Masta, sev mi!” 31Jizɔs tret in an ɛn ol Pita wantɛm. I aks Pita se, “Yu nɔ biliv mi? Wetin mek yu dawt?” 32Dɛn ɔl tu go insay di bot, dɛn di briz tap fɔ blo. 33Di lanin bɔy dɛn we bin de insay di bot nil dɔng bifo Jizɔs ɛn se, “Fɔ tru, yu na Gɔd in Pikin!” 34Wɛn dɛn krɔs Lek Galili, dɛn rich Gɛnɛzarɛt. 35Di pipul dɛn na di ples bin no se na Jizɔs; so dɛn sɛn kɔl ɔl di sik pipul dɛn ɔlɔbɔt, dɔn dɛn kɛr dɛn go mit Jizɔs. 36Dɛn beg Jizɔs fɔ mek di sik pipul dɛn tɔch di bɔtɔm pat pan in klos; ɛn ɛni wan we tɔch am, wɛl wantɛm.

will be added

X\