MAKI 5

1Jizɔs ɛn in lanin bɔy dɛn krɔs di wata go na di Gara zi nis pipul dɛn kɔntri. 2Wɛn Jizɔs kɔmɔt na di bot, wan man kɔmɔt insay di bɛri ngrɔn kam mit am. Di man bin gɛt dɛbul insay am. 3Na bɛri ngrɔn di man bin tap ɛn nɔbɔdi nɔ bin ebul tay am wit chen sɛf. 4Wɛn dɛn tay in an ɛn fut wit chen, i kin kɔt dɛn. Nɔbɔdi nɔ bin ebul fɔ kɔntrol am. 5De ɛn nɛt di man kin de na bɛri ngrɔn ɔ pantap dɛn il. I kin de ala ɛn i kin de tek ston kɔt kɔt insɛf. 6Wɛn di man si Jizɔs fawe, i rɔn go mit am ɛn nil dɔng bifo am fɔ sho se i rɛspɛkt am. 7I ala big wan se, “Jizɔs, yu we na Gɔd we pas ɔl, in Pikin, wetin yu want du mi? A tek Gɔd beg yu, nɔ mek a sɔfa!” 8Di man tɔk dat bikɔs Jizɔs tɛl di dɛbul fɔ kɔmɔt insay di man. 9So Jizɔs aks di man se, “Wetin na yu nem?” Di man se, “A nem ‘Plɛnti plɛnti Soja man,’ wi plɛnti!” 10Di man beg Jizɔs plɛnti tɛm fɔ mek i nɔ drɛb di dɛbul dɛn kɔmɔt na di kɔntri. 11Bɔt da sem tɛm de sɔm ɔg dɛn bin de it na wan il klos di say we Jizɔs bin de. 12Di dɛbul dɛn beg Jizɔs fɔ lɛ dɛn go insay di ɔg dɛn. 13Jizɔs gri fɔ lɛ di dɛbul dɛn kɔmɔt insay di man ɛn go insay di ɔg dɛn. Na bɔt tu tawzin ɔg dɛn bin lib de. Wɛn di dɛbul dɛn go insay di ɔg dɛn, di ɔg dɛn rɔn go dɔng di il, dɛn ɔl fɔdɔm insay di wata ɛn dɛn ɔl drawn. 14Di pipul dɛn we bin de mɛn di ɔg dɛn rɔn go tɛl di pipul dɛn we de na di tɔng ɛn di kɔntri, wetin bi. Plɛnti pipul kam luk. 15Dɛn mit di man we bin gɛt plɛnti dɛbul insay am sidɔm klos Jizɔs de lisin to am. Di man bin soba ɛn i bin wɛr klos. Wɛn di pipul dɛn si dat, dɛn fred. 16Dɛn pipul we si wetin bi to di man we di dɛbul dɛn bin de insay ɛn wetin bi to di ɔg dɛn, tɛl di wan dɛn we kam luk ɔl wetin bi. 17Dat mek di pipul dɛn beg Jizɔs fɔ kɔmɔt na dɛn kɔntri. 18Wɛn Jizɔs bin de go insay di bot, di man we di dɛbul dɛn bin de insay beg fɔ fala Jizɔs go. 19Bɔt Jizɔs nɔ gri, i se, “Go na yu os to yu pipul dɛn, ɛn tɛl dɛn wetin di Masta dɔn du fɔ yu ɛn aw i dɔn sɔri fɔ yu.” 20Di man go na di eria we dɛn kɔl di Tɛn Tɔng dɛn ɛn tɛl pipul wetin Jizɔs du fɔ am. Na so pipul bin de wɔnda. 21Wɛn Jizɔs dɔn tek bot krɔs go oba say, bɔku pipul go gɛda rawnd am na di bich. 22Wɛn i lib de wan pan di bigman dɛn na di Ju mitin os we bin nem Jayrɔs go to Jizɔs; wɛn i mit am, i nil dɔng bifo am. 23I beg am se, “Masta, mi gyal pikin de day, duya, kam put yu an pan in ed ɛn pre fɔ am mek i nɔ day.” 24So Jizɔs fala Jayrɔs go; plɛnti pipul fala Jizɔs wɛn i de go, na so di pipul dɛn bin de push dɛn kɔmpin. 25Wan uman bin de na di krawd we bin dɔn de blid fɔ twɛlv ia. 26Di uman bin dɔn sɔfa na plɛnti dɔkta dɛn an we dɛn de tray fɔ mɛn am, ɛn i bin dɔn wes ɔl in kɔpɔ, bɔt i nɔ si bɛtɛ. Bifo dat di sik bin de wɔs mɔ ɛn mɔ. 27Dis uman bin dɔn yɛri bɔt Jizɔs ɛn wetin i de du, so i push midul di krawd sote i rich nia Jizɔs ɛn tɔch in klos. 28Di uman bin dɔn tɔk na in at se, if in tɔch Jizɔs in klos, in go wɛl. 29So i tɔch Jizɔs in klos ɛn i wɛl wantɛm. Di uman insɛf fil se in dɔn wɛl. 30Jizɔs no wantɛm se pawa kɔmɔt pan am, i tɔn rawnd to di krawd ɛn aks dɛn se, “Udat tɔch mi klos?” 31In lanin bɔy dɛn se, “Yu si di krawd de push ɔlɔbɔt so, yu de aks udat tɔch yu klos?” 32Jizɔs luk rawnd fɔ si udat na di pɔsin we tɔch in klos. 33We di uman no wetin dɔn bi to am, i fred, i tri mbul. I kam nil dɔng bifo Jizɔs ɛn tɛl am ɔl wetin bi to am. 34Jizɔs se, “Mi pikin, bikɔs yu biliv, yu dɔn wɛl, go wit kol at ya, da kayn sik de nɔ go kam pan yu igen.” 35Wɛn Jizɔs bin de tɔk to di uman, na in sɔm pipul kam tɛl Jayrɔs se mek i nɔ wɔri di Masta igen, bikɔs in pikin dɔn day. 36Jizɔs yɛri wetin dɛn tɔk, bɔt i nɔ mɛn dɛn. Na in i se, “Jayrɔs, nɔ fred, yu jɛs biliv.” 37Jizɔs nɔ gri mek ɔlman fala am go, pas Pita, Jems ɛn Jɔn we na Jems in brɔda. 38Wɛn dɛn rich na Jayrɔs in os, Jizɔs yɛri plɛnti pipul de mek nɔys, dɛn bin de kray bita bita wan. 39Wɛn Jizɔs dɔn go insay di os, i se, “Wetin mek una de kray bita bita wan so ɛn mek nɔys? Di pikin nɔ day, na slip i de slip.” 40Di pipul dɛn laf Jizɔs. Bɔt Jizɔs mek ɔlman kɔmɔt insay di os, pas di pikin in mama ɛn papa, ɛn di tri lanin bɔy dɛn nɔmɔ. Dɛn go insay di rum we di pikin bin de. 41Jizɔs ol di pikin in an ɛn se, “Talita kumi” dat min, “Mi pikin, grap!” na in langwej. 42Di pikin grap ɛn bigin waka wantɛm. (Di pikin bin dɔn ol twɛlv ia). Dɛn wɔnda! 43Jizɔs wɔn dɛn nɔ fɔ tɛl ɛnibɔdi wetin bi so. I tɛl dɛn fɔ gi di pikin sɔntin fɔ it.

will be added

X\