MAKI 16

1Wɛn di de fɔ pre ɛn blo pas, Meri we kɔmɔt Magdala, Meri we na Jems in mama, ɛn Salomi, bay spays we gɛt fayn sɛnt ɛn kɛr am go fɔ rɔb pan Jizɔs in bɔdi. 2Ali Sɔnde mɔnin bifo san kɔmɔt, dɛn tri uman ya go na di ston grev. 3Dɛn se, “Udat go pul di ston we dɛn tek kɔba di grev domɔt fɔ wi?” 4(Na bin big big ston.) Bɔt wɛn dɛn luk di grev, dɛn si se di ston we dɛn bin tek kɔba di grev domɔt dɔn rol kɔmɔt de. 5Wɛn dɛn de go insay di grev, dɛn si wan yɔng man we wɛr lɔng wayt klos, i bin sidɔm na di raytan say. Di uman dɛn fred! 6Di man se, “Una nɔ fred! Na Jizɔs we kɔmɔt Nazarɛt, we dɛn bin nel pan di krɔs una kam luk fɔ. I nɔ de ya, i dɔn rayz frɔm di grev. Una luk di ples we dɛn bin le am. 7Una go tɛl Pita ɛn di ɔda lanin bɔy dɛn se, ‘I dɔn go bifo una na Galili, una go mit am de, lɛkɛ aw i bin dɔn tɛl una fɔ du.’ ” 8Di uman dɛn kɔmɔt na di grev ɛn rɔn go to di lanin bɔy dɛn; na so dɛn bin de tri mbul, bikɔs dɛn bin de fred. Di fred we dɛn bin de fred mek dɛn nɔn nɔ ebul tɔk sɛf we dɛn de go. [ 9Di uman dɛn go to Pita ɛn in kɔmpin dɛn ɛn tɛl dɛn ɔl wetin di yɔng man tɛl dɛn, dɛn nɔ tek lɔng fɔ du dat. 10Afta dat, Jizɔs sɛn in lanin bɔy dɛn go ɔlɔbɔt na wɔl fɔ tɛl pipul di mɛsej bɔt aw Gɔd go sev dɛn, dat na di mɛsej we go de sote go ɛn we Gɔd insɛf sɛn kam na wɔl. 11Dɛn nɔ biliv Meri wɛn i tɛl dɛn se Jizɔs dɔn gɛt layf bak ɛn in dɔn si am. 12Wɛn dat pas, tu man dɛn we bin biliv pan Jizɔs bin de go na wan vilej, na de Jizɔs sho insɛf difrɛn we to dɛn frɔm aw i bin sho insɛf to Meri. 13Di tu man dɛn tɔn bak go tɛl dɛn kɔmpin wetin bi, bɔt dɛn nɔ biliv wetin dɛn tɛl dɛn. 14Wɛn dat dɔn, Jizɔs sho insɛf to in ilɛvin lanin bɔy dɛn wɛn dɛn bin de it. I tɔk pan dɛn fɔ we dɛn nɔ bin biliv lɛkɛ aw dɛn fɔ biliv, ɛn fɔ we dɛn bin tra nga yes, ɛn we dɛn nɔ bin biliv dɛn pipul we si am afta i rayz frɔm di grev. 15Jizɔs se, “Una go ɔlɔbɔt na di wɔl ɛn tɛl ɔlman di Gud Nyus bɔt mi. 16Ɛnibɔdi we biliv di Gud Nyus ɛn gri fɔ mek dɛn baptayz am, Gɔd go sev am. Bɔt ɛnibɔdi we nɔ biliv di Gud Nyus, Gɔd go kɔndɛm am. 17Dɛn pipul we biliv di Gud Nyus, a go gi dɛn pawa fɔ du wɔnda ful wok: dɛn go drɛb dɛbul fɔseka mi; dɛn go tɔk langwej we dɛn nɔ lan; 18if dɛn ol snek ɔ if dɛn drink pɔyzin sɛf, natin nɔ go du dɛn; dɛn go put dɛn an pan pipul we sik ɛn pre fɔ dɛn, ɛn di pipul dɛn go wɛl.” 19Wɛn Masta Jizɔs dɔn tɔk to in lanin bɔy dɛn, Gɔd tek am go ɔp na ɛvin, i go sidɔm na Gɔd in raytan. 20Di lanin bɔy dɛn go ɔlɔbɔt na wɔl de tɛl pipul di Gud Nyus, ɛn di Masta bin de ɛp dɛn, ɛn mek dɛn du plɛnti wɔnda ful wok we fɔ mek pipul no se na tru dɛn de tɔk.]

will be added

X\