MAKI 14

1I bin jɛs lɛf tu de bifo di Ju ɔlide we dɛn kɔl Pasova, we dɛn kin it bred we nɔ gɛt yist. Di bigman dɛn we de mek sakri fays fɔ pipul sin ɛn di Ju Lɔ ticha dɛn bin de fɛn we fɔ ol Jizɔs ɛn kil am, mek plɛnti pipul nɔ no. 2Dɛn se, “Wi nɔ fɔ ol am naw dis ɔlide, bikɔs if wi du so, di pipul dɛn go fɛt.” 3Jizɔs bin de na Bɛtani na Saymɔn in os, da Saymɔn we bin gɛt bad sik na in skin. As Jizɔs de it, na in wan uman kam wit sɛnt insay wan bɔtul we dɛn tek ala ba sta ston mek. Di sɛnt we bin de insay di bɔtul na bin dia dia sɛnt we dɛn tek nad mek, dɛn nɔ bin miks am wit ɛni ɔda plant. Di uman brok di bɔtul in mɔt ɛn tɔn di sɛnt pan Jizɔs in ed. 4Sɔm pan di pipul dɛn we bin lib de vɛks, dɛn se, “Wetin mek dis uman wes dis dia sɛnt? 5Pɔsin bin fɔ gɛt lɛkɛ tri ɔndrɛd silva kɔpɔ so, if i bin sɛl di sɛnt ɛn sheb di kɔpɔ gi dɛn pipul we nɔ gɛt natin.” Dɛn bigin tɔk pan di uman. 6Jizɔs se, “Una lɛf fɔ tɔk pan di uman! Wetin du una de ambɔg am? Na gud wok i dɔn du fɔ mi so! 7Dɛn pipul we nɔ gɛt natin de wit una ɔltɛm, ɛn una kin du gud fɔ dɛn ɛnitɛm we una want. Bɔt mi nɔ go de wit una ɔltɛm. 8Di uman dɔn du ɔl wetin i ebul du fɔ mi, i dɔn tɔn sɛnt pan mi fɔ mek mi bɔdi rɛdi fɔ di bɛr we dɛn go bɛr mi. 9A de tɛl una se, ɛni say na wɔl we dɛn de tɛl pipul di Gud Nyus, dɛn mɔs mɛmba dis uman ɛn tɔk bɔt dis tin we i dɔn du so.” 10Judas Iskariɔt we na wan pan di twɛlv lanin bɔy dɛn go mit di bigman dɛn we de mek sakri fays fɔ pipul sin fɔ tɛl dɛn se in go sɛl Jizɔs gi dɛn. 11Wɛn dɛn yɛri wetin i tɔk, dɛn gladi ɛn prɔmis fɔ gi am kɔpɔ. So Judas bigin fɛn chans fɔ sɛl Jizɔs gi dɛn. 12Di fɔs de pan di Ju ɔlide we di Ju dɛn kin it bred we nɔ gɛt yist, ɛn kil ship fɔ mɛmba di Pasova, di lanin bɔy dɛn aks Jizɔs se, “Usay wi fɔ go rɛdi di Pasova it?” 13Jizɔs kɔl tu pan in lanin bɔy dɛn fɔ sɛn dɛn, i se, “Una go insay di tɔng, una go mit wan man we ol wan big jɔg wata, una fala am go na di say we i de go. 14Wɛn una rich de, una tɛl di man we gɛt di os se, ‘Wi Ticha se, usay di rum we tre nja de slip de we mi ɛn mi lanin bɔy dɛn go it di Pasova it?’ 15Di man go sho una wan big rum we de na di garɛt. I dɔn rɛdi am fɔ wi, ɔltin we wi want de insay de, na de una fɔ rɛdi di it fɔ mɛmba di Pasova.” 16Di lanin bɔy dɛn go na di tɔng, dɛn mit ɔltin lɛkɛ aw Jizɔs bin dɔn tɛl dɛn; so dɛn rɛdi di it fɔ mɛmba di Pasova. 17Ivintɛm, Jizɔs ɛn ɔl di twɛlv lanin bɔy dɛn go na di os. 18Wɛn dɛn de it, Jizɔs se, “A de tɛl una se, wan pan una we de it wit mi naw go sɛl mi.” 19Di lanin bɔy dɛn at pwɛl ɛn dɛn bigin aks Jizɔs wan bay wan se, “Na mi? Na mi?” 20Jizɔs ansa se, “Na wan pan una twɛlv we de put an insay di sem dish wit mi. 21Mɔta lman Pikin go day lɛkɛ aw dɛn rayt bɔt am na Gɔd in Buk; bɔt i go bad fɔ di pɔsin we go sɛl am. I bin fɔ bɛtɛ if da pɔsin de nɔ bin bɔn!” 22Wɛn dɛn de it, Jizɔs tek bred, i pre ɛn tɛl Gɔd tɛnki. I kɔt kɔt am ɛn gi in lanin bɔy dɛn ɛn se, “Una tek am ɛn it am, dis na mi bɔdi.” 23Dɛn i tek di kɔp ɛn pre ɛn tɛl Gɔd tɛnki. I gi in lanin bɔy dɛn; dɛn ɔl drink pan di wayn. 24I tɛl dɛn se, “Dis na mi blɔd we a tek mek di agrimɛnt we Gɔd mek wit in pipul dɛn. A dɔn sakri fays am fɔ plɛnti plɛnti pipul. 25A de tɛl una se, a nɔ go drink wayn igen sote di tɛm we a go drink di nyu wayn na di ples we Gɔd de rul.” 26Dɛn sing wan Gɔd sing, dɔn dɛn go na Mawnt Ɔliv. 27Jizɔs bigin tɔk to in lanin bɔy dɛn, i se, “Una ɔl go lɛf mi; bikɔs dɛn rayt na Gɔd in Buk se, ‘Gɔd go strayk di man we de mɛn di ship dɛn mek i day, ɛn di ship dɛn go skata.’ 28Bɔt wɛn a dɔn rayz frɔm di grev, a go go na Galili, una go go mit mi de.” 29Pita se, “If ɔl di ɔda lanin bɔy dɛn go lɛf yu, mi nɔ go go lɛf yu, sa!” 30Jizɔs se, “Pita, a de tɛl yu se, dis nɛt, bifo fɔl kro tu tɛm, yu go dɔn tɔk tri tɛm se yu nɔ no mi.” 31Bɔt Pita se, “If a fɔ day sɛf, a go day wit yu, bɔt a nɔ go tɔk se a nɔ no yu!” Ɔl di lanin bɔy dɛn tɔk di sem tin. 32Dɛn Jizɔs ɛn in lanin bɔy dɛn rich na wan ples we nem Gɛtse mani. Jizɔs tɔk to in lanin bɔy dɛn, i se, “Una sidɔm naya, a de go pre.” 33Jizɔs mek Pita, Jems ɛn Jɔn fala am go. In at bin ful, i bin ebi. 34I se, “Mi at so ebi dat a fil fɔ day. Una sidɔm naya, una nɔ slip, una pre wit mi.” 35Jizɔs lɛf Pita, Jems ɛn Jɔn, i go bifo lili bit, dɔn i ledɔm flat na grɔn ɛn bigin pre. I se, if we de, mek Gɔd nɔ mek di tɛm we i fɔ sɔfa kam. 36I se, “Mi Papa, yu ebul du ɔltin, duya, nɔ mek a sɔfa dis sɔfa we a fɔ sɔfa, bɔt ɛniwe, nɔ du wetin a want, du wetin yu want.” 37Wɛn Jizɔs go bak to di tri lanin bɔy dɛn, i mit dɛn de slip. I aks Pita se, “Saymɔn, yu de slip? Yu nɔ ebul wek ɛn pre wit mi wan awa sɛf? 38Una fɔ wayda wek ɛn una fɔ pre mek una nɔ go sin wɛn Setan tray una. Una want du di rayt tin, bɔt una nɔ gɛt di pawa fɔ du am.” 39Jizɔs lɛf dɛn go bak, i pre wit di sem wɔd dɛn we i bin pre wit di fɔs tɛm. 40I go bak igen go mit Pita, Jems ɛn Jɔn de slip, dɛn nɔ bin ebul opin dɛn yay sɛf, bikɔs di slip bin de mɔna dɛn. Dɛn nɔ bin no wetin fɔ tɔk sɛf. 41Wɛn Jizɔs kam bak di tɔd tɛm, i aks dɛn se, “Una stil de slip, una de blo te naw? I dɔn du so! Di tɛm dɔn rich; dɛn go sɛl Mɔta lman Pikin gi dɛn bad pipul. 42Una grap, lɛ wi go; una luk, di pɔsin we go sɛl mi de kam naw!” 43As Jizɔs de tɔk so, na in Judas we na wan pan in lanin bɔy dɛn kam wit sɔm pipul we ol sɔd ɛn ɔda tin dɛn fɔ tek fɛt. Na di bigman dɛn we de mek sakri fays fɔ pipul sin, di Ju Lɔ ticha dɛn, ɛn di ɔda Ju bigman dɛn bin sɛn di pipul dɛn. 44Judas we bin want sɛl Jizɔs bin dɔn tɛl di pipul dɛn aw dɛn go no am. I se, “Di wan we a go kis, una grip am ɛn kɛr am go wit gyad dɛn rawnd am.” 45Wɛn Judas kam, i go to Jizɔs wantɛm, i se, “Masta!” Dɛn i kis am. 46Di pipul dɛn go grip Jizɔs. 47Sɔmbɔdi we bin tinap klos de pul in sɔd ɛn kɔt di edman fɔ dɛn man we de mek sakri fays fɔ pipul sin in bɔy yes kɔmɔt. 48Jizɔs aks di pipul dɛn se, “Una kam fɔ ol mi wit sɔd ɛn dɛn ɔda tin fɔ tek fɛt lɛkɛ se mi na tifman? 49Ɛvri de bin de wit una na Gɔd in Os de lan una bɔt Gɔd, bɔt una nɔ bin ol mi. Bɔt ɔl dis bi so dat wetin dɛn bin rayt na Gɔd in Buk go bi.” 50Ɔl di lanin bɔy dɛn go lɛf Jizɔs in wan gren. 51Wan yɔngman bin de fala Jizɔs, na wan lapa nɔmɔ i bin tay. Di pipul dɛn want grip di man, 52bɔt di man rɔn go nekɛd; i lɛf in lapa na dɛn an. 53Dɛn kɛr Jizɔs go bifo di edman fɔ dɛn man we de mek sakri fays fɔ pipul sin, in os. Ɔl di bigman dɛn we bin de mek sakri fays fɔ pipul sin, di ɔda Ju bigman dɛn, ɛn di Ju Lɔ ticha dɛn bin gɛda de. 54Pita bin de fawe lili bit de fala Jizɔs wɛn dɛn de kɛr am go te dɛn rich insay di edman fɔ dɛn man we de mek sakri fays fɔ pipul sin, in yad. Wɛn dɛn rich de, Pita go sidɔm klos di gyad dɛn, de wam insɛf klos di faya. 55Di bigman dɛn we bin de mek sakri fays fɔ pipul sin ɛn ɔl di Ju bigman dɛn we bin de jɔj na di Ju gran kot bin de luk fɔ pɔsin we go tɔk wetin Jizɔs du we bad, so dat dɛn kin kil am, bɔt dɛn nɔ fɛn ɛnibɔdi. 56Plɛnti pipul go lay pan Jizɔs, bɔt dɛn ɔl nɔ tɔk di sem tin. 57Sɔm ɔda pipul we go lay pan Jizɔs, se, 58“Wi yɛri Jizɔs tɔk se, ‘A go brok Gɔd in Os we mɔta lman bil, ɛn a go tek tri de bil ɔda wan we mɔta lman nɔ go ɛp fɔ bil.’ ” 59Bɔt dɛn pipul ya sɛf nɔ tɔk di sem tin. 60Di edman fɔ dɛn man we de mek sakri fays fɔ pipul sin tinap bifo di pipul dɛn ɛn aks Jizɔs se, “Yu nɔ gɛt natin fɔ se? Wetin mek dɛn man ya se yu du ɔl dɛn bad tin ya?” 61Bɔt Jizɔs nɔ tɔk natin. Di edman fɔ dɛn man we de mek sakri fays fɔ pipul sin aks am igen se, “Na yu na di Mɛsaya we na Gɔd, we wi de prez, in Pikin?” 62Jizɔs se, “Yɛs, mi na di Mɛsaya. Una go si Mɔta lman Pikin sidɔm na Gɔd we gɛt pawa pas ɔl, in raytan, ɛn i go rayd pan di klawd wɛn i de kam!” 63Di edman fɔ dɛn man we de mek sakri fays fɔ pipul sin vɛks ɛn chɛr in klos ɛn se, “Wetin du wi want mɔ witnɛs? 64Unasɛf dɔn yɛri di bad tin we i tɔk bɔt Gɔd, wetin una se?” Ɔl di bigman dɛn we bin de jɔj na di Ju gran kot kɔndɛm Jizɔs ɛn se i fɔ day. 65Sɔm pan dɛn bigin fɔ pit pan Jizɔs; dɛn kɔba in fes, dɛn slap am, ɛn tɛl am se if in na prɔfɛt mek i tɛl dɛn udat slap am. Di gyad dɛnsɛf bigin slap Jizɔs. 66Pita bin de dɔng na di yad we wan savant-gyal we bin de wok fɔ di edman pan dɛn man we de mek sakri fays fɔ pipul sin, kam. 67Wɛn i si Pita de wam faya, i luk am gud ɛn se, “Yusɛf bin de wit Jizɔs we kɔmɔt Nazarɛt!” 68Bɔt Pita dinay, i se, “A nɔ no wetin yu de tɔk bɔt sɛf.” Pita grap ɛn go klos di get. [Da sem tɛm de fɔl kro.] 69Di savant-gyal si Pita bak, i tɛl di pipul dɛn we bin tinap klos de, se, “Dis man na wan pan Jizɔs in lanin bɔy dɛn!” 70Bɔt Pita dinay bak. I nɔ tu te igen, di pipul dɛn we bin tinap de tɛl Pita se, “Yu na wan pan dis man in lanin bɔy dɛn, fɔ tru, bikɔs na Galili yusɛf kɔmɔt.” 71Bɔt Pita bigin kɔs ɛn swɛ. I se, “A nɔ no dis man we una de tɔk bɔt!” 72Wantɛm, fɔl kro sɛkɛn tɛm. Pita mɛmba wetin Jizɔs bin tɛl am. Jizɔs bin tɔk se, “Yu go se yu nɔ no mi tri tɛm bifo fɔl kro tu tɛm.” Pita bɔs kray.

will be added

X\