MAKI 13

1We Jizɔs bin de kɔmɔt na Gɔd in Os, wan pan in lanin bɔy dɛn se, “Ticha, luk dɛn fayn ston ɛn ɔl dɛn fayn fayn bildin ya!” I bin de tɛl Jizɔs bɔt Gɔd in Os. 2Jizɔs se, “Una si dɛn big bildin ya? Tɛm de kam we dɛn ɔl go fɔdɔm, ɛn wan ston nɔ go lɛf pantap in kɔmpin.” 3We Jizɔs sidɔm na Mawnt Ɔliv, we de fesin Gɔd in Os, na in Pita, Jems, Jɔn ɛn Andru kam mit am ɛn aks am se, 4“Tɛl wi ustɛm dɛn tin we yu bin tɛl wi bɔt go bi? Us sayn go sho wi se i nɔ go te igen we ɔl dɛn tin ya go bi?” 5Jizɔs ansa se, “Una tek tɛm mek nɔbɔdi nɔ mek una ful. 6Plɛnti pipul go tek mi nem kam, dɛn go se dɛn na di Mɛsaya, dɛn go mek plɛnti pipul ful. 7Ɛn una nɔ fɔ wɔri wɛn una yɛri bɔt wa we de klos una ɔ wɛn una yɛri bɔt wa we de fawe. Dɛn tin de mɔs bi, bɔt di wɔl nɔ go ɛnd yet! 8Wan kɔntri go fɛt ɔda kɔntri, ɛn wan neshɔn go fɛt ɔda neshɔn. Di grɔn go tri mbul plɛnti say, natin nɔ go de fɔ it. Ɔl dɛn bad tin de na di fɔs waala dɛn we go fɔdɔm. Wɔs wan dɛn go de biɛn. 9“Una bikya ful, pipul go ol una ɛn kɛr una go bifo dɛn pipul we de jɔj na kot. Pipul go bit una na dɛn Ju mitin os; dɛn go kɛr una go bifo dɛn pipul we de rul, bikɔs una biliv pan mi; da tɛm de una fɔ tɔk di tru tin we una no bɔt mi. 10Bifo di wɔl dɔn, pipul ɔlɔbɔt na wɔl fɔ dɔn yɛri di Gud Nyus fɔs. 11Ɛnitɛm we dɛn ol una ɛn kɛr una go kot, una nɔ fɔ wɔri bɔt wetin una go tɔk, una nɔ fɔ tink bɔt dat bifo di tɛm rich, bɔt wɛn di tɛm rich, ɛni tin we Gɔd in Spirit put na una mɔt, na in una go tɔk. Da tɛm de nɔto unasɛf go tɔk, na Gɔd in Spirit go tɔk fɔ una. 12Brɔda go and brɔda oba gi pipul fɔ mek dɛn kil am, semwe, papa go and in pikin gi pipul fɔ mek dɛn kil am. Pikin go fɛt in papa ɛn mama, ɛn i go mek pipul kil dɛn. 13Pipul nɔ go lɛk una bikɔs una biliv pan mi, bɔt ɛnibɔdi we bia sote i day, go sev. 14“Una go si di bad bad tin tinap na di ples we i nɔ fɔ de.” (Una we de rid: una ɔnda stand wetin dis min.) “Da tɛm de di pipul dɛn na Judia fɔ rɔnawe go na dɛn il, 15pɔsin we de pantap in os, nɔ fɔ kam dɔng ɛn go insay di os igen fɔ tek ɛni tin. 16Pɔsin we de wok na fam nɔ fɔ tɔn bak go tek in klos. 17Da tɛm de, i go bad fɔ bɛlɛ uman ɛn uman we de gi pikin bɔbi! 18Una pre mek dɛn tin ya nɔ bi ren sizin! 19Da tɛm de pipul go sɔfa pas aw dɛn dɔn sɔfa frɔm di tɛm we Gɔd mek di wɔl sote naw; ɛn afta dat, tin lɛkɛ dat nɔ go bi igen. 20Bɔt di Masta dɔn mek da tɛm de shɔt, if nɔ so, nɔbɔdi nɔ bin go lɛf na di wɔl. Bɔt fɔseka dɛn pipul we i dɔn pik, di Masta dɔn mek da tɛm de shɔt. 21“If ɛnibɔdi tɛl una se, ‘Luk di Mɛsaya naya!’ ɔ ‘Luk am yanda!’, una nɔ biliv am. 22Bikɔs sɔm pipul go kam we go lay se dɛn na di Mɛsaya ɛn sɔm go kam we go lay se dɛn na prɔfɛt, ɛn dɛn go du plɛnti wɔnda ful wok ɛn sho plɛnti sayn, so dat da we de, dɛn kin mek dɛn pipul ful we Gɔd dɔn pik fɔ sev, if dɛn ebul du dat. 23Una fɔ wayda wek; a dɔn tɛl una ɔltin bifo dɛn bi. 24“Afta pipul dɔn sɔfa ɔl dɛn tin ya, di san go dak, di mun nɔ go shayn igen. 25Di sta dɛn go fɔdɔm kɔmɔt na di klawd, ɛn di pawa dɛn we de na di klawd go muf kɔmɔt na di ples we dɛn bin de. 26Da tɛm de, ɔlman na wɔl go si Mɔta lman Pikin de kɔmɔt na klawd kam dɔng wit pawa ɛn brayt brayt layt go de shayn rawnd am. 27I go sɛn di enjɛl dɛn ɔlɔbɔt na wɔl frɔm wan ɛnd to di ɔda fɔ gɛda dɛn pipul we i dɔn pik fɔ bi in yon, bring dɛn kam to am. 28“Una luk fig tik ɛn lan. Wɛn di an dɛn de pul nyu lif, una fɔ no se ren sizin de kam. 29Semwe so, wɛn una si dɛn tin we a tɛl una, de bi, una go no se di tɛm we Mɔta lman Pikin fɔ kam dɔn de klos. 30A de tɛl una se, ɔl dɛn tin ya mɔs bi, bifo dɛn pipul we de naw, day. 31Natin nɔ go de ɔpklawd igen ɛn di wɔl sɛf nɔ go de igen, bɔt mi wɔd dɛn go de sote go wit ɔl dɛn pawa. 32“Nɔbɔdi nɔ no di de ɔ di awa we dɛn tin ya go bi; Gɔd in enjɛl dɛnsɛf ɛn Gɔd in Pikin insɛf nɔ no di de ɔ di awa; na di Papa in wan gren no di tɛm. 33Una fɔ wayda wek, una fɔ de wach, bikɔs una nɔ no ustɛm dɛn tin ya go bi. 34I go jɛs tan lɛkɛ we pɔsin de go patrol, i lɛf in os to in savant dɛn. I gi ɔlman in yon wok, dɔn i tɛl di wachman fɔ de wach. 35So una fɔ wayda wek, ɛn una fɔ de wach, bikɔs una nɔ no di tɛm we una masta go kam; una nɔ no if i go kam midul nɛt, ivintɛm, ali mɔnin, ɔ wɛn mɔnin dɔn go fa lili bit. 36Una fɔ wayda wek, mek i nɔ kam tɛm we una nɔ mekɔp ɛn mit una de slip. 37Di tin we a de tɔk so, nɔto fɔ una nɔmɔ, na fɔ ɔlman. Una fɔ wayda wek!”

will be added

X\