DUKU 7

1Wɛn Jizɔs dɔn tɔk to di pipul dɛn dɔn, i go na Kepanyɔm. 2Wan bigman we na bin ɔfisa na di Roman ami bin gɛt lɛkɛ wan ɔndrɛd soja man ɔnda am. In bɔy we i bin lɛk bad bin sik sote i want day. 3Wɛn di Roman ɔfisa yɛri bɔt Jizɔs, i go mit sɔm Ju big man dɛn ɛn sɛn dɛn to Jizɔs fɔ lɛ dɛn beg am fɔ kam mɛn in bɔy. 4Wɛn dɛn Ju bigman ya mit Jizɔs, dɛn bigin beg am, dɛn se, “Duya, wi beg, sa, kam mɛn dis ɔfisa in bɔy bikɔs na gud man. 5I lɛk wi Ju pipul dɛn ɛn na insɛf bil wi Ju mitin os fɔ wi.” 6Jizɔs fala dɛn go te i rich klos di Roman ɔfisa in os. Na in di ɔfisa sɛn in padi dɛn wit mɛsej fɔ Jizɔs; i se, “Masta, nɔ wɔri fɔ kam na mi os igen, bikɔs a nɔ fit fɔ mek yu kam insay mi os; 7a nɔ fit fɔ go klos yu. If yu jɛs tɔk wan wɔd nɔmɔ, mi bɔy go wɛl. 8Misɛf na pɔsin we gɛt bigman dɛn we gɛt pawa oba mi ɛn a gɛt soja man dɛn we de ɔnda mi. A kin tɛl wan se, ‘Go!’ ɛn i kin go; a kin tɛl ɔda wan se, ‘Kam!’ ɛn i kin kam; ɛn a kin tɛl mi bɔy se, ‘Du dis wok!’ ɛn i kin du am.” 9Wɛn Jizɔs yɛri ɔl wetin di ɔfisa tɔk, i wɔnda. Na in i tɔn to di pipul dɛn we bin de fala am ɛn se, “A de tɛl una, a nɔ si pɔsin na Izrɛl wande we biliv Gɔd tra nga wan so lɛkɛ dis man.” 10Wɛn di mɛse nja dɛn tɔn bak go na di Roman ɔfisa in os, dɛn mit di bɔy dɔn wɛl. 11I nɔ te afta dat, Jizɔs go na wan tɔng we dɛn de kɔl Nen. Jizɔs in lanin bɔy dɛn ɛn plɛnti ɔda pipul bin fala am go na di tɔng. 12As dɛn rich na di get dɛn mit plɛnti pipul de go bɛr wan man. Di dayman in mama na uman we in man bin dɔn day ɛn na da wan gren bɔy pikin de i bin gɛt. Plɛnti pipul na di tɔng bin de fala di uman we gɛt di bɛrin. 13Wɛn di Masta si di uman, i sɔri fɔ am, i se, “Nɔ kray ya!” 14Wɛn Jizɔs tɔch di kɔfin, di man dɛn we bin tot di kɔfin tinap. Jizɔs tɛl di dedebɔdi se, “Bɔbɔ, grap!” 15Di bɔbɔ we bin dɔn day grap sidɔm ɛn bigin tɔk. Jizɔs se, “Mami, luk yu pikin!” 16Ɔl di pipul dɛn fred ɛn bigin prez Gɔd. Dɛn se, “Wi dɔn si prɔfɛt we gɛt pawa! Gɔd dɔn kam fɔ sev in pipul dɛn!” 17Dis nyus bɔt Jizɔs prɛd ɔlsay na Judia ɛn dɛn kɔntri we de klos Judia. 18Jɔn in lanin bɔy dɛn go tɛl Jɔn ɔl wetin bi. 19Jɔn kɔl tu pan in yon lanin bɔy dɛn ɛn sɛn dɛn go to di Masta fɔ aks am if in na di pɔsin we in bin de tɔk se go kam ɔ if dɛn fɔ luk rod fɔ ɔda pɔsin. 20Wɛn dɛn man ya kam to Jizɔs, dɛn se, “Jɔn we de baptayz sɛn wi fɔ aks yu if yu na di pɔsin we i bin de tɔk se go kam ɔ if wi fɔ luk rod fɔ ɔda pɔsin, sa?” 21Da sem tɛm de, Jizɔs bin de mɛn plɛnti pipul; i mek dɛn wan we sik wɛl, i drɛb dɛbul kɔmɔt insay sɔm pipul, ɛn i mek plɛnti dɛn blɛnyay pipul si. 22I tɛl Jɔn in lanin bɔy dɛn se, “Una tɔn bak go tɛl Jɔn ɔl wetin unasɛf dɔn si ɛn wetin una dɔn yɛri; dɛn blɛnyay pipul de si, dɛn pipul we nɔ bin ebul waka, de waka, dɛn wan we gɛt bad sik na dɛn skin dɔn wɛl, dɛn dɛf pipul dɔn yɛri, dɛn dayman dɔn gɛt layf bak, ɛn dɛn po pipul dɔn yɛri di Gud Nyus. 23Dɛn wan we nɔ de dawt mi gɛt blɛsin!” 24Wɛn di mɛse nja dɛn we Jɔn sɛn tɔn bak, Jizɔs bigin fɔ tɛl di pipul dɛn bɔt Jɔn. I se, “Wɛn una bin go to Jɔn na di dɛzat, wetin una bin want si? Una bin want si gras we de tri mbul we briz de blo? 25If nɔto dat, wetin una bin go fɛn? Na pɔsin we wɛr fayn klos? Nɔ; pipul we wɛr fayn klos we gɛt ɔl wetin dɛn want de na dɛn king os! 26Una tɛl mi sɔntin, wetin una bin want si? Na prɔfɛt? Ɛn una si pɔsin we pas prɔfɛt fawe, fɔ tru. 27Dɛn rayt bɔt Jɔn na Gɔd in Buk se, Gɔd se, ‘A go sɛn mi mɛse nja go bifo yu fɔ klia di rod rɛdi fɔ yu!’ 28A de tɛl una se Jɔn pas ɔl mɔta lman, bɔt di pɔsin we gɛt lili rɛspɛkt pas ɔl dɛn wan we Gɔd de rul, pas Jɔn!” 29Wɛn ɔl di pipul dɛn ɛn dɛn pipul we de gɛda taks yɛri wetin Jɔn tɔk, dɛn gri se wetin Gɔd want, rayt, ɛn dɛn mek Jɔn baptayz dɛn. 30Bɔt di Faresi dɛn ɛn di Ju Lɔ ticha dɛn nɔ gri fɔ du wetin Gɔd tɛl dɛn fɔ du ɛn dɛn nɔ gri mek Jɔn baptayz dɛn. 31Jizɔs se, “Wetin a go tek kɔmpia dɛn tide pipul ya? Aw dɛn tan? 32Dɛn tide pipul ya tan lɛkɛ pikin dɛn we sidɔm na makit os de ple, ɛn ala kɔl dɛn kɔmpin ɛn tɛl dɛn se, ‘Wi dɔn bit drɔm fɔ una, bɔt una nɔ gri dans! Wi dɔn sing bɛrin sing fɔ una, bɔt una nɔ pul wata na una yay!’ 33Wɛn Jɔn we de baptayz bin kam, i bin de fast ɛn i nɔ bin de drink wayn, bɔt una se, ‘Jɔn gɛt dɛbul.’ 34Naw we Mɔta lman Pikin kam, i de it ɛn drink ɛn una se, ‘Luk da awangɔt ɛn drɔnk man! I mek padi wit dɛn pipul we de gɛda taks ɛn dɛn Ju pipul we nɔ de kip di Ju Lɔ aw dɛn fɔ kip am!’ 35Dɛn wan we de du wetin Gɔd tɛl dɛn fɔ du go sho se na Gɔd gɛt sɛns fɔ tru.” 36Wan Faresi kɔl Jizɔs fɔ go it na in os. Jizɔs gri ɛn fala di Faresi go na in os. 37Wan uman bin de na di tɔng we bin liv fri layf. Wɛn di uman yɛri se Jizɔs de it na di Faresi in os, i kɛr wan wayt ston bɔtul we bin ful wit fayn fayn dia sɛnt, go na di os. 38Di uman go butu klos Jizɔs in fut ɛn bigin kray bita wan saful saful. Di wata we kɔmɔt na in yay sok Jizɔs in fut. I tek in ia wep Jizɔs in fut, dɔn i kis Jizɔs in fut fɔ sho se in rɛspɛkt am, dɔn i tek di sɛnt na di bɔtul ɛn rɔb ɔl na Jizɔs in fut. 39Wɛn di Faresi we kɔl Jizɔs kam na in os fɔ kam it si wetin bi, i wɔnda, i tɔk na in at se, “If dis man na bin prɔfɛt, fɔ tru, i bin fɔ no uskayn uman de ol am so, bikɔs na uman we de pan fri layf.” 40Jizɔs tɔk to di Faresi. I se, “Saymɔn, a gɛt sɔntin fɔ tɛl yu.” Di man ansa Jizɔs se, “Masta, wetin yu want tɛl mi, sa?” 41Jizɔs se, “Wan man we bin de lɛn pipul kɔpɔ bin de; tu pipul bin gɛt fɔ pe am. Wan bin gɛt fɔ pe am fayv ɔndrɛd silva kɔpɔ ɛn di ɔda wan bin gɛt fɔ pe am fifti silva kɔpɔ. 42Dɛn ɔl tu nɔ bin ebul fɔ pe am, so i lɛf di mɔni gi dɛn ɔl tu. Pan dɛn tu pipul ya, uswan go lɛk di man we bin lɛn dɛn mɔni pas in kɔmpin?” 43Saymɔn ansa Jizɔs se, “A tink se na di man we i bin lɛn plɛnti kɔpɔ pas in kɔmpin.” Jizɔs se, “Yu rayt.” 44Jizɔs luk to di uman in pat wɛn i stil de tɔk to Saymɔn. I se, “Yu si wetin dis uman de du fɔ mi, nɔto so? A kam na yu os, yu nɔ gi mi wata sɛf fɔ was mi fut, bɔt dis uman ya dɔn kray pan mi fut te dɛn dɔn sok ɛn na in ia i tek wep dɛn. 45Wɛn a kam na yu os, yu nɔ kis mi sɛf, bɔt frɔm we a kam, dis uman jɛs de kis mi fut. 46Yu nɔ rɔb gris sɛf na mi ed, bɔt dis uman dɔn rɔb fayn sɛnt pan mi fut. 47A de tɛl yu se, di tin we dis uman du we sho se i lɛk mi bad pruv se Gɔd dɔn padin in plɛnti sin dɛn. Pɔsin we nɔ sin plɛnti, we Gɔd dɔn padin, nɔ go lɛk mi bɛtɛ.” 48Jizɔs tɔn to di uman. I se, “Gɔd dɔn padin yu sin dɛn!” 49Dɛn pipul we bin de it wit Jizɔs bigin tɔk se, “Uskayn man dis we de padin pɔsin fɔ in sin?” 50Jizɔs se, “Uman, bikɔs yu biliv pan mi, Gɔd dɔn sev yu. Saful ya, go wit kol at!”

will be added

X\