DUKU 22

1Di tɛm fɔ di Pasova bin dɔn kam klos. Pasova na wan Ju ɔlide we dɛn kin it bred we nɔ gɛt yist. 2Dɛn man dɛn we de mek sakri fays fɔ pipul sin ɛn dɛn Ju Lɔ ticha bin de fɛn we fɔ kil Jizɔs, bɔt dɛn bin de fred di pipul dɛn. 3Setan go insay Judas we nem Iskariɔt, in at; Iskariɔt na bin wan pan di twɛlv apɔsul dɛn. 4So Judas go ɛng ed wit dɛn bigman we de mek sakri fays fɔ pipul sin ɛn dɛn soja man fɔ si aw in kin kech Jizɔs ɛn kɛr am go to dɛn. 5Di bigman dɛn we de mek sakri fays fɔ pipul sin ɛn di soja man dɛn gladi ɛn dɛn prɔmis fɔ gi Judas kɔpɔ. 6Judas gri wit wetin dɛn se, ɛn i bigin fɛn chans fɔ sɛl Jizɔs gi dɛn wɛn di krawd nɔ no. 7Di tɛm rich pan di Ju ɔlide we dɛn kɔl Pasova we dɛn fɔ kil ship fɔ mɛmba di tɛm we Gɔd bin pul in pipul dɛn kɔmɔt na Ijipt. 8So Jizɔs kɔl Pita ɛn Jɔn, ɛn tɛl dɛn se, “Una go rɛdi di Pasova it fɔ wi, so dat wi kin it am.” 9Dɛn aks Jizɔs se, “Usay yu want wi fɔ mek am, sa?” 10Jizɔs tɛl dɛn se, “Wɛn una go insay Jerusɛlɛm, una go mit wan man we tot wan big jɔg wata. Una fala am go insay di os we i de go. 11Una tɛl di man we gɛt di os se, ‘Wi Ticha se mek wi aks yu dis kwɛshɔn: usay di tre nja rum de we mi ɛn mi lanin bɔy dɛn fɔ it di Pasova it?’ 12Di man go sho una wan big rum na di garɛt wit tebul, chia ɛn ɔltin we una want, na de una fɔ rɛdi wi it.” 13Pita ɛn Jɔn go ɛn mit ɔltin lɛkɛ aw Jizɔs tɛl dɛn ɛn dɛn rɛdi di it fɔ mɛmba di Pasova. 14Wɛn di tɛm rich, Jizɔs ɛn in apɔsul dɛn sidɔm fɔ it. 15Na de Jizɔs tɛl dɛn se, “A want fɔ it di Pasova it wit una bad bad bifo a bigin sɔfa. 16A de tɛl una, a nɔ go it am igen sote di tru Pasova bi, di tɛm we Gɔd go de rul dis wɔl.” 17Wɛn dɛn gi Jizɔs drink, i tek di kɔp, i tɛl Gɔd tɛnki, dɛn i se, “Una tek dis kɔp pas am rawnd, mek ɔlman drink. 18A de tɛl una se, a nɔ go drink wayn igen sote Gɔd bigin rul dis wɔl.” 19Jizɔs tek bred ɛn wɛn i dɔn tɛl Gɔd tɛnki, i kɔt, kɔt am gi in apɔsul dɛn ɛn se, “Dis bred na mi bɔdi [we a dɔn sak ri fays fɔseka una. Una fɔ de it am fɔ mɛmba mi.” 20Semwe so, wɛn dɛn dɔn it di Pasova it dɔn, Jizɔs tek di kɔp ɛn tɛl dɛn se, “Di wayn we de na dis kɔp na di nyu agrimɛnt bitwin Gɔd ɛn mɔta lman we a mek wit mi blɔd wɛn a gri fɔ mek pipul kil mi.] 21“Bɔt di pɔsin we go sɛl mi gi dɛn pipul we want kil mi, de it wit mi naw. 22Mɔta lman Pikin go day lɛkɛ aw Gɔd dɔn mak, bɔt i go bad fɔ di pɔsin we go mek dɛn kil am!” 23Di apɔsul dɛn bigin fɔ aks dɛn kɔmpin se, “Uswan pan wi go du di tin we Jizɔs jɛs tɔk bɔt so?” 24Di lanin bɔy dɛn mek plaba wɛn dɛn de tray fɔ no uswan pan dɛn fɔ bi edman. 25Jizɔs tɛl dɛn se, “Dɛn king na dis wɔl de kɔntrol dɛn yon pipul, dɛn pipul we de na pawa kin se di pipul dɛn fɔ kɔl dɛn ‘Pipul we de ɛp ɔda pipul.’ 26Bɔt nɔto so i fɔ bi wit una, di pɔsin we sinyɔ pas ɔl fɔ bi lɛkɛ di pɔsin we junyɔ pas ɔl ɛn una masta fɔ bi lɛkɛ una savant. 27If yu gɛt tu pɔsin, wan de it, di ɔda pɔsin de sav am, uswan pan dɛn tu impɔtant pas in kɔmpin? Di pɔsin we de it, fɔ tru. Bɔt mi we na una Masta tan lɛkɛ una savant. 28“Na una de wit mi wɛn tin tra nga fɔ mi, ɛn wɛn a de sɔfa, una nɔ lɛf mi. 29Lɛkɛ aw mi Papa dɔn gi mi pawa fɔ rul, na so misɛf gi una pawa fɔ rul. 30Una go it ɛn drink wit mi na di say we a de rul, ɛn we una de rul una go jɔj di twɛlv neshɔn dɛn we de na Izrɛl. 31“Saymɔn, Saymɔn, Setan dɔn gɛt pamishɔn fɔ fana una ɔl lɛkɛ rɛs. 32Bɔt a dɔn pre fɔ yu Saymɔn mek yu nɔ tap fɔ biliv mi. Wɛn yu dɔn biliv mi tra nga wan, tray mek yu brɔda dɛnsɛf biliv mi tra nga wan.” 33Saymɔn ansa Jizɔs se, “Masta, a dɔn rɛdi fɔ go jel wit yu ɛn fɔ day sɛf wit yu.” 34Jizɔs ansa am se, “A de tɛl yu, Pita, tide fɔl nɔ go kro yet, yu go dɔn tɔk tri tɛm se yu nɔ no mi.” 35Jizɔs tɛl dɛn se, “Wɛn a bin sɛn una ɛn a se mek una nɔ kɛr pɔs, ɔ bag, ɔ sus, ɛnitɛm bin de we una want ɛni tin, una nɔ gɛt am?” Dɛn ansa am se, “Nɔ, sa.” 36I tɛl dɛn se, “Wɛn una de go dis tɛm, udat gɛt pɔs, mek i kɛr am go; ɛn if pɔsin gɛt bag, mek insɛf kɛr am go. If pɔsin nɔ gɛt sɔd, mek i sɛl in kot ɛn tek di kɔpɔ bay wan. 37Di tin we dɛn prɔfɛt bin rayt bɔt mi we se, ‘Pipul dɛn min se insɛf na wikɛd man,’ de kam bi tru. Ɔl wetin dɛn prɔfɛt rayt bɔt mi mɔs bi.” 38Di lanin bɔy dɛn se, “Masta, luk, wi gɛt tu sɔd naya, sa.” Jizɔs se, “I du so!” 39Jizɔs kɔmɔt na di tɔng ɛn bigin waka go na Mawnt Ɔliv lɛkɛ aw i kin du ɛn in lanin bɔy dɛn fala am go de. 40Wɛn i rich, Jizɔs tɛl di lanin bɔy dɛn se, “Una pre so dat Setan nɔ go tray una fɔ mek una sin.” 41Jizɔs kɔmɔt klos in lanin bɔy dɛn, go lili bit, lɛkɛ if yu tinap nia di lanin bɔy dɛn, yu sɛn ston. Wɛn i rich na di ples, i nil dɔng ɛn bigin pre, 42i se, “Papa, if yu gri, duya, nɔ mek a sɔfa dis sɔfa we a fɔ sɔfa, bɔt ɛniwe, nɔ du wetin a want, du wetin yu want.” [ 43Wan enjɛl kɔmɔt na ɛvin kam mit Jizɔs fɔ kɔrej am. 44Jizɔs in at bin ebi, bɔt i pre mɔ wit ɔl in at pas aw i bin pre fɔs; in swɛt kam tan lɛkɛ blɔd, we bin de fɔdɔm plɛnti plɛnti na grɔn.] 45Wɛn i dɔn pre dɔn, i grap na di ples we i bin de pre, i go mit in lanin bɔy dɛn, bɔt i si dɛn de slip bikɔs dɛn at bin ebi bad. 46Na in i aks dɛn se, “Wetin mek una de slip? Una grap ɛn pre so dat Setan nɔ go tray una fɔ mek una sin.” 47Aw Jizɔs de tɔk to in lanin bɔy dɛn, na de plɛnti, plɛnti pipul kam mit am. Wan pan Jizɔs in twɛlv lanin bɔy dɛn we nem Judas na in bin de bifo dɛn. Judas kam klos Jizɔs fɔ kis am. 48Jizɔs aks am se, “Judas, na kis yu go tek sɛl Mɔta lman Pikin?” 49Wɛn Jizɔs in lanin bɔy dɛn si wetin want bi, dɛn aks am se, “Masta, mek wi tek wi sɔd fɛt dɛn?” 50Wan pan dɛn tek in sɔd, kɔt di edman we de mek sakri fays fɔ pipul sin in bɔy in rayt yes kɔmɔt. 51Bɔt Jizɔs tɛl am se, “Lɛf! Nɔ du dat igen!” Jizɔs tɔch di say we di yes bin de ɛn mek di yes kam bak. 52Jizɔs aks di bigman dɛn we bin de mek sakri fays fɔ pipul sin, dɛn bigman we bin de gyad Gɔd in Os, ɛn di ɔda Ju bigman dɛn we bin kam fɔ ol am se, “Una kam mit mi naya wit sɔd ɛn dɛn ɔda tin fɔ tek fɛt fɔ ol mi lɛkɛ se mi na tifman? 53Ɔl di tɛm we a bin de wit una na Gɔd in Os una nɔ bin ol mi. Bɔt na di tɛm dis we Gɔd gri mek una ol mi ɛn na di tɛm dis we Setan we de rul na dak gɛt pawa.” 54Di bigman dɛn we bin de mek sakri fays fɔ pipul sin ɛn di ɔda Ju bigman dɛn mek di pipul dɛn ol Jizɔs ɛn kɛr am go na di edman fɔ ɔl dɛn man we bin de mek sakri fays fɔ pipul sin, in os. Pita fala dɛn go, bɔt i nɔ bin de klos dɛn. 55Wɛn dɛn mek faya na di edman fɔ dɛn man we bin de mek sakri fays fɔ pipul sin in yad, ɔlman go gɛda rawnd di faya; Pita insɛf go nia di faya. 56Wan savant-gyal we bin de wok na di ples si Pita na di faya in layt we bin de shayn pan am, di savant-gyal luk am gud, na in i se, “Dis man ya insɛf bin de wit Jizɔs.” 57Pita dinay, i se, “Ledi, a nɔ sabi da man de sɛf!” 58I nɔ te igen, ɔda pɔsin we si Pita, se, “Yusɛf na wan pan in lanin bɔy dɛn.” Bɔt Pita dinay. I se, “Padi, mi nɔto da man de in lanin bɔy.” 59Afta lɛkɛ wan awa so dɔn pas, na in wan ɔda pɔsin igen se, “A nɔ mis, a shɔ se dis man ya na Jizɔs in lanin bɔy bikɔs na Galili i kɔmɔt.” 60Bɔt Pita ala se, “Padi, na lay yu de lay pan mi, a nɔ sabi wetin yu de tɔk bɔt sɛf.” As Pita de tɔk so, fɔl kro. 61Jizɔs tɔn to Pita ɛn luk am. Wantɛm Pita mɛmba wetin Jizɔs bin dɔn tɛl am we i se, “Pita, bifo fɔl kro tide, yu go dɔn tɔk tri tɛm se yu nɔ no mi.” 62Pita kɔmɔt insay di yad go na do; i bɔs kray bita wan. 63Di soja man dɛn we bin ol Jizɔs bin de laf am ɛn bit am. 64Dɛn kɔba in yay, dɛn slap am, dɔn dɛn aks am se, “If yu na prɔfɛt, tɛl wi udat slap yu?” 65Di pipul dɛn fityay Jizɔs ɛn tɛl am plɛnti wɔd fɔ sho se dɛn nɔ rɛspɛkt am. 66Wɛn do klin, dɛn bigman we de mek sakri fays fɔ pipul sin, di ɔda Ju bigman dɛn, ɛn dɛn Ju Lɔ ticha mit fɔ jɔj kes. Di soja man dɛn kɛr Jizɔs go bifo dɛn, 67di pipul dɛn aks am se, “Tɛl wi if yu na di Mɛsaya?” Jizɔs ansa dɛn se, “If a tɛl una, una nɔ go biliv mi, 68ɛn if a aks una kwɛshɔn, una nɔ go ansa mi. 69Bɔt frɔm naw sote go, Mɔta lman Pikin go sidɔm na Gɔd we gɛt pawa, in raytan.” 70Ɔl di pipul dɛn we bin de jɔj aks am se, “Wɛl, yu na Gɔd in Pikin?” Jizɔs ansa dɛn se, “Na so una dɔn tɔk.” 71Di pipul dɛn we bin de jɔj na di Ju gran kot bigin fɔ se, “Wetin du wi fɔ lisin to ɔda witnɛs dɛn igen? Wi dɔn yɛri wetin insɛf dɔn tɔk.”

will be added

X\