DUKU 16

1Jizɔs tɔk to in lanin bɔy dɛn. I se, “Wan jɛntri man bin gɛt klak we de luk oba ɔl in biznɛs. Pipul kam tɛl di jɛntri man se di klak de wes in prɔpati. 2Di man sɛn kɔl di klak ɛn i aks am se, ‘Wetin a de yɛri bɔt yu so? Gi mi di buk we yu de rayt ɔl wetin yu dɔn yus ɛn wetin lɛf na yu an, bikɔs yu nɔ go du dis wok ya igen.’ 3Di klak tɔk na in at se, ‘Wetin a go du naw we mi masta de kam pul mi kɔmɔt na dis wok? A nɔ go ebul mek fam bikɔs a nɔ go gɛt trɛnk fɔ dig. A nɔ go go bigin beg bikɔs a go shem fɔ beg. 4A dɔn no wetin a go du so dat pipul go gladi fɔ mek a go na dɛn os naw we a nɔ de wok igen.’ 5“So di klak bigin fɔ kɔl ɔl dɛn pipul we bin gɛt fɔ pe in masta wan bay wan. I aks di fɔs wan se, ‘Ɔmɔs yu gɛt fɔ pe mi masta?’ 6Di pɔsin ansa se, ‘A fɔ pe am wan ɔndrɛd galɔn pamayn.’ Di klak tɛl am se, ‘Ya dis pepa we dɛn rayt ɔmɔs yu gɛt fɔ pe; sidɔm kwik ɛn chenj di ɔndrɛd we rayt de to fifti.’ 7Dɔn di klak aks wan ɔda wan se, ‘Ɔmɔs yu gɛt fɔ pe mi masta?’ Di pɔsin ansa se, ‘A gɛt fɔ pe am wan ɔndrɛd bag rɛs.’ Di klak tɛl di pɔsin se, ‘Ya di pepa we dɛn rayt ɔmɔs yu fɔ pe; chenj di wan ɔndrɛd we rayt de to eti.’ 8“Di masta se di klak we tif du wɛl bikɔs i tink gud bifo i du ɔl wetin i du. Dɛn pipul we tek dɛn tin na wɔl mek gɔd, de tink fa wɛn dɛn de dil wit pipul lɛkɛ dɛnsɛf pas dɛn pipul we de waka na Gɔd in layt.” 9Jizɔs tɛl dɛn se, “Una fɔ tek mɔni fɔ du gud ɛn mek padi, so wɛn di mɔni dɔn, Gɔd go gi una ples fɔ tap na di say we go de sote go. 10Da pɔsin we yu kin trɔs pan lili tin na pɔsin we yu kin trɔs pan big tin, ɛn da pɔsin we nɔ tret wit lili tin nɔ go tret wit big tin. 11If pɔsin nɔ kin trɔs una wit mɔni we dɛn nɔ waka tret fɔ gɛt, udat go lɛf di tru jɛntri na una an? 12If dɛn nɔ trɔs una wit ɔda pɔsin prɔpati, udat go gi una prɔpati we go bi una yon? 13“Wan slev nɔ go de wok fɔ tu masta. If i bi so, i go lɛk wan masta, i nɔ go lɛk di ɔda wan. I go wok gud fɔ wan masta, bɔt i nɔ go wok gud fɔ di ɔda wan. Una nɔ go de du Gɔd wok ɛn bi slev to mɔni, di sem tɛm.” 14Wɛn di Faresi dɛn yɛri wetin Jizɔs tɔk, dɛn laf am bikɔs dɛn na pipul we lɛk mɔni. 15Bɔt Jizɔs tɛl dɛn se, “Una de mek pipul fil se una nɔ de du bad, bɔt Gɔd no wetin de na una at. Di tin we mɔta lman luk se impɔtant, na in Gɔd nɔ lɛk at ɔl. 16“Pipul bin de tɔk bɔt di Lɔ we Gɔd gi Mozis ɛn wetin dɛn prɔfɛt bin rayt sote di tɛm we Jɔn we bin de baptayz pipul, kam. Frɔm da tɛm de te naw dɛn de tɔk di Gud Nyus bɔt Gɔd in rul ɛn ɔlman de fɛt fɔ go insay di ples we Gɔd de rul. 17Bɔt i go izi fɔ mek ɛvin ɛn dis wɔl pwɛl, pas fɔ mek di wɔd we lili pas ɔl na di Lɔ, lɔs in minin. 18“Ɛni man we dɔn kɛr in wɛf go kot ɛn pat wit am dɛn i go mared ɔda uman, dɔn sin lɛkɛ man we go gɛt ɔda uman pan ɔl we in ɛn in wɛf de na os; ɛn ɛni man we go mared uman we in ɛn in man dɔn go kot ɛn pat, dɔn sin lɛkɛ man we go gɛt ɔda uman pan ɔl we in ɛn in wɛf nɔ pat. 19“Wan jɛntri man bin de we kin de wɛr dɛn dia klos lɛkɛ silk ɛn satin. I kin de kuk plɛnti it ɛn kɔl pipul kam it ɛvri de. 20Ɛvri de, wan po man we nem Lazarɔs kin de go ledɔm na di jɛntri man in get. So bin kɔba di po man in bɔdi. 21I kin want fɔ it dɛn it we lɛf we di jɛntri man in bɔy dɛn de trowe. Pantap dat, dɛn dɔg kin de kam lik di po man in so dɛn. 22“Tɛm kam we di po man day ɛn enjɛl kam kɛr am go put am klos Ebraam na ɛvin. Di jɛntri man insɛf day, dɛn bɛr am. 23Wɛn i de na ɛl de sɔfa pen, i es in yay luk, na de i si Ebraam fawe klos Lazarɔs. 24Di jɛntri man ala se, ‘Papa Ebraam, sɔri fɔ mi! Sɛn Lazarɔs fɔ put in finga na wata ɛn kam tɔch mi tɔng so dat i go kol, bikɔs a de sɔfa bad insay dis faya ya!’ 25“Bɔt Ebraam tɛl am se, ‘Mi pikin, mɛmba se yu bin jɛntri ɛn yu ɛnjɔy yusɛf di tɛm we yu bin de na wɔl ɛn da tɛm de Lazarɔs bin po ɛn i bin de sɔfa. Bɔt naw Gɔd de blɛs Lazarɔs bɔt yu de sɔfa. 26Ɛn pantap dat, big big ol divayd di ples we wi de ɛn di ples we una de, so nɔbɔdi nɔ go kɔmɔt ya go to una, ɛn nɔbɔdi nɔ go kɔmɔt to una yanda kam to wi.’ 27Di jɛntri man se, ‘A beg yu, Papa Ebraam, duya, sɛn Lazarɔs go na mi papa in os bikɔs a gɛt fayv brɔda dɛn de, mek i go wɔn dɛn mek dɛnsɛf nɔ go kam sɔfa na dis ples.’ 29“Bɔt Ebraam tɛl am se, ‘Yu brɔda dɛn gɛt Mozis ɛn dɛn prɔfɛt fɔ wɔn dɛn, mek dɛn lisin wetin dɛn de tɔk.’ 30Di jɛntri man se, ‘Papa Ebraam, dɛn nɔ go lisin dɛn; bɔt if pɔsin kɔmɔt na di say we dɛn dayman de, go tɔk to dɛn, dɛn go tap fɔ du di bad tin dɛn we dɛn de du.’ 31Ebraam tɛl am se, ‘If yu brɔda dɛn nɔ lisin wetin Mozis ɛn dɛn prɔfɛt de tɛl dɛn, dɛn nɔ go fil se dɛn de du bad, if pɔsin we bin dɔn day sɛf go bak na wɔl go tɔk to dɛn.’ ”

will be added

X\