DUKU 13

1Da sem tɛm de, sɔm pipul we bin de wit Jizɔs tɛl am bɔt dɛn pipul we kɔmɔt Galili we Paylet kil wɛn dɛn de mek sakri fays to Gɔd. 2Jizɔs ansa dɛn se, “Una mɛmba se dɛn pipul we Paylet kil day so bikɔs dɛn bin sin pas ɔlman na Galili? 3Nɔto so i bi; a de tɛl una se if una nɔ lɛf fɔ du bad, unasɛf go day lɛkɛ dɛn. 4Ɔ igen una mɛmba se dɛn etin pipul we da tawa na Saylom bin fɔdɔm pan, we day, bin sin pas ɔlman na Jerusɛlɛm we mek dɛn day so? 5Nɔto so i bi; a de tɛl una se if una nɔ lɛf fɔ du bad, unasɛf go day lɛkɛ dɛn.” 6Jizɔs pul wan pare bul we se: “Wan man bin plant fig tik na in gadin. Wɛn di man go fɔ pik di fig dɛn natin nɔ bin de na di tik. 7Di man tɛl di man we de luk di tik dɛn se, ‘Dis ia mek tri we a de kam fɔ pik fig, bɔt a nɔ de gɛt natin fɔ pik. Kɔt dis tik! Wetin mek i de mek di grɔn wes?’ 8Di man we de luk di tik dɛn se, ‘Masta, lɛf di tik fɔs dis ia. A go dig rawnd am ɛn put maniɔ pan di dɔti. 9If i bia nɛks ia, i go gud fɔ wi, bɔt if i nɔ bia, da tɛm de wi go kɔt am.’ ” 10Wan de fɔ pre ɛn blo, Jizɔs bin de lan di pipul dɛn na wan Ju mitin os. 11Wan uman bin de na di Ju mitin os we bin gɛt dɛbul insay am we mek i sik fɔ etin ia. Di sik bin mek di uman bɛn ɛn i nɔ bin ebul tinap tret igen. 12Wɛn Jizɔs si di uman, i kɔl am ɛn tɛl am se, “Uman, frɔm tide yu dɔn wɛl!” 13Jizɔs tɔch di uman ɛn wantɛm wantɛm so di uman in bak tret ɛn i bigin tɛl Gɔd tɛnki ɛn prez am. 14Bɔt di bigman na di Ju mitin os bin vɛks bikɔs Jizɔs mɛn di sik uman di de we fɔ pre ɛn blo, so i tɛl di pipul dɛn we bin go fɔ pre se, “Na siks de pɔsin fɔ wok, so una fɔ kam wan pan dɛn de ya fɔ mek Jizɔs mɛn una; bɔt una nɔ fɔ kam di de fɔ pre ɛn blo fɔ mek i mɛn una.” 15Jizɔs ansa am se, “Una dɛn ipo krit pipul ya! Una nɔ kin pul una ship ɛn kaw dɛn na do di de fɔ pre ɛn blo ɛn kɛr dɛn go mek dɛn go drink wata? 16Dis uman we Setan dɔn tay dis etin ia, we na wan pan Ebraam in gra npi kin-pi kin dɛn, a nɔ fɔ mɛn am di de fɔ pre ɛn blo?” 17Jɛs Jizɔs tɔk dis wɔd ya, di pipul dɛn we bin go pre gladi fɔ ɔl wetin Jizɔs du, ɛn dɛn wan we nɔ bin lɛk Jizɔs, shem. 18Wɛn dat dɔn, Jizɔs se, “Aw Gɔd in rul tan ɛn wetin a go tek fɔ sho aw i tan? 19Gɔd in rul tan lɛkɛ mɔstad sid we pɔsin plant na in gadin, di sid bɔs fayn ɛn gro te i tɔn to tik, dɔn plɛnti bɔd kam mek nɛst pan di an dɛn.” 20Jizɔs aks igen se, “Wetin a go tek fɔ sho aw Gɔd in rul tan? 21I tan lɛkɛ we uman tek smɔl yist ɛn miks am wit tri kɔp flawa sote di do fɔ mek bred rayz.” 22Wɛn Jizɔs de go Jerusɛlɛm, i bin de lan di pipul dɛn na ɔl dɛn tɔng ɛn dɛn vilej we i bin de pas. 23Sɔmbɔdi aks Jizɔs se, “Masta, dɛn pipul we Gɔd go sev nɔ go plɛnti?” Jizɔs tɛl di pipul dɛn we bin de wit am se, 24“Una tray mek una go pas na di do we smɔl fɔ pas ɛn go insay di ples we Gɔd de rul. A de tɛl una se, plɛnti pipul go tray fɔ go insay de, bɔt dɛn nɔ go ebul. 25Wɛn di pɔsin we gɛt di ples dɔn grap ɛn lɔk di do, una go tinap na do de nak ɛn se, ‘Masta, opin fɔ wi, sa!’ Di masta go ansa una se, ‘A nɔ no usay una kɔmɔt.’ 26Dɛn una go se, ‘Masta, na wi ɔl bin de it wan ples ɛn yu bin de lan pipul na trit na wi tɔng.’ 27Di masta go se, ‘A de tɛl una se a nɔ no usay una kɔmɔt, una go, una kɔmɔt to mi; a nɔ no una, una dɛn wikɛd pipul ya!’ 28Una go si Ebraam, Ayzik, Jekɔb ɛn ɔl dɛn prɔfɛt insay di ples we Gɔd de rul, bɔt una go kray bita wan ɛn bɛt una tɔng bikɔs dɛn lɔk una na do. 29Pipul dɛn go kɔmɔt ɔlsay na wɔl ɛn kam sidɔm fɔ it na di ples we Gɔd de rul. 30Sɔm pipul we de biɛn naw go de bifo ɛn sɔm pipul we de bifo naw go de biɛn.” 31Sɔm Faresi dɛn kam tɔk to Jizɔs, dɛn se, “Duya, sa, kɔmɔt naya naw bikɔs Ɛrɔd dɔn mekɔp fɔ kil yu.” 32Jizɔs se, “Una go tɛl da man de we de mek pipul ful se, ‘A de drɛb dɛbul ɛn mɛn sik pipul fɔ shɔt tɛm fɔs, wɛn da tɛm de dɔn pas, a go dɔn mi wok.’ 33Bɔt a de tɛl una se, a mɔs du mi wok dis shɔt tɛm fɔs ɛn wɛn da tɛm de dɔn pas sɛf, bikɔs prɔfɛt nɔ fɔ day nɔ ɔda say pas Jerusɛlɛm! 34“Jerusɛlɛm, Jerusɛlɛm; una dɔn kil dɛn prɔfɛt ɛn una dɔn ston dɛn wan we Gɔd sɛn to una! Ɔmɔs tɛm a dɔn want gɛda una pikin dɛn lɛkɛ aw kombra fɔl de gɛda in pikin dɛn ɔnda in fɛda dɛn, bɔt una nɔ gri mek a du dat! 35Mek a tɛl una, Gɔd dɔn lɛf di ples we una de, gi una. Una nɔ go si mi igen sote unasɛf se, ‘Gɔd blɛs di pɔsin we i dɔn sɛn fɔ kam tinap fɔ am!’ ”

will be added

X\