DUKU 10

1Jizɔs pik sɛvi nti-tu ɔda man dɛn ɛn sɛn dɛn tu tu fɔ go ɔl di say dɛn we insɛf bin want fɔ go. 2Bifo di man dɛn go, Jizɔs tɛl dɛn se, “Dɛn pipul we Gɔd dɔn pik fɔ mek i rul dɛn tan lɛkɛ plɛnti, plɛnti plant dɛn we dɔn du fɔ kɔt, bɔt di wokman dɛn we fɔ gɛda dɛn fɔ kam to Gɔd, nɔ plɛnti. Una pre mek Gɔd we na di Masta sɛn mɔ pipul fɔ kam gɛda dɛn pipul we i dɔn pik fɔ rul, ɛn bring dɛn kam to am.” 3I se, “Una go! A de sɛn una lɛkɛ ship pikin midul wulf. 4We una de go so, una nɔ fɔ kɛr pɔs, una nɔ fɔ kɛr bag, ɛn una nɔ fɔ kɛr sus. Una nɔ fɔ wes tɛm fɔ tɛl pipul lɔng adu na rod. 5Ɛni os we una go, una fɔ se fɔs, ‘Mek Gɔd blɛs ɔlman na dis os!’ 6If pɔsin de we want di blɛsin, i go gɛt di blɛsin we una pre mek i gɛt; bɔt if pɔsin nɔ de we want di blɛsin, di blɛsin we una dɔn gi am go kam bak to una. 7Di fɔs os we una go we dɛn gri fɔ mek una tap, na de una fɔ de sote una tɔn bak; una nɔ fɔ kɔmɔt na wan os go tap na ɔda wan. Una fɔ it ɛn drink ɛni tin we dɛn gi una bikɔs wokman fɔ gɛt pe fɔ in wok. 8If una go na ɛni tɔng we di pipul dɛn gladi fɔ una, una fɔ it ɛni tin we dɛn gi una. 9Una fɔ mɛn di sik pipul dɛn we lib de, ɛn una fɔ tɛl di pipul dɛn we lib de se, ‘Gɔd in rul dɔn kam klos una.’ 10If una go na ɛni tɔng we di pipul dɛn nɔ gladi fɔ una, una fɔ go na trit ɛn tɛl dɛn se, 11‘Wi de wep di dɔti sɛf we wi mas na una tɔng kɔmɔt ɔnda wi fut fɔ sho una se una dɔn du bad. Ɛniwe, una nɔ fɔgɛt se Gɔd in rul dɔn kam klos!’ 12A de tɛl una se wɛn di tɛm rich fɔ mek Gɔd jɔj ɔlman, i go bɛtɛ fɔ Sɔdɔm pas da tɔng de. 13“Bad tin go mit una ɔl we de na Kora zin ɛn Bɛtsa yda. If pɔsin bin du dɛn wɔnda ful wok we a bin du fɔ una, na Taya ɛn Saydɔn, dɛn pipul de bin fɔ dɔn lɛf fɔ du bad lɔntɛm; dɛn bin fɔ wɛr bag ɛn rɔb asis na dɛn bɔdi fɔ mek ɔlman no se dɛn dɔn lɛf fɔ du bad. 14Di de we Gɔd go jɔj ɔlman na wɔl, i go sɔri fɔ Taya ɛn Saydɔn pas una. 15Una we de na Kepanyɔm, una min se una de go ɛvin? Na ɛl una go go!” 16Jizɔs tɔk to in lanin bɔy dɛn. I se, “Ɛnibɔdi we lisin una, na mi da pɔsin de lisin. Ɛnibɔdi we nɔ gri fɔ du wetin una tɛl am fɔ du, na wetin a tɛl am fɔ du, na in i nɔ gri fɔ du; ɛn ɛnibɔdi we nɔ gri fɔ du wetin a tɛl am fɔ du, na wetin di pɔsin we sɛn mi tɛl am fɔ du, i nɔ gri fɔ du.” 17Di sɛvi nti-tu man dɛn kam bak wit gladi ɛn tɛl Jizɔs se, “Masta, dɛn dɛbul sɛf du wetin wi tɛl dɛn fɔ du wɛn wi kɔl yu nem!” 18Jizɔs ansa dɛn se, “A si we Setan fɔdɔm kɔmɔt na ɛvin lɛkɛ laytin. 19A dɔn gi una pawa: una go mas snek, dɛn nɔ go du una natin; una go mas kɔktel, dɛn nɔ go bɛt una. A dɔn gi una pawa oba ɔl Setan in pawa so natin nɔ go du una. 20Una nɔ fɔ gladi bikɔs dɛn dɛbul du wetin una tɛl dɛn fɔ du, bɔt una fɔ gladi bikɔs una nem dɔn rayt na ɛvin.” 21Da sem tɛm de, Gɔd in Spirit mek Jizɔs gladi, na in Jizɔs se, “Papa, yu we na Masta na ɛvin ɛn dis wɔl! A tɛl yu tɛnki bikɔs yu dɔn sho dɛn pikin we nɔ sabi natin, dɛn tin we yu ayd pan di wan dɛn we gɛt sɛns ɛn we lan plɛnti tin. Lɛ i bi so Papa, bikɔs na so yu want. 22“Mi Papa dɔn gi mi pawa oba ɔltin. Nɔbɔdi nɔ sabi Gɔd in Pikin pas di Papa wan gren; nɔbɔdi nɔ sabi di Papa pas in Pikin wan gren, ɛn ɛnibɔdi we di Pikin pik fɔ tɛl bɔt di Papa.” 23Jizɔs kɔl in lanin bɔy dɛn to insɛf ɛn tɛl dɛn se, “Dɛn pipul we de si dɛn tin we una de si, gɛt blɛsin! 24A de tɛl una se plɛnti prɔfɛt ɛn plɛnti king bin want fɔ si dɛn tin we una de si, bɔt dɛn nɔ si dɛn. Plɛnti bin want yɛri dɛn tin we una de yɛri, bɔt dɛn nɔ yɛri dɛn.” 25Wan Ju Lɔ ticha aks Jizɔs wan kwɛshɔn fɔ tɛst am; i se, “Ticha, aw a go manej fɔ gɛt layf we go de sote go?” 26Jizɔs ansa am se, “Wetin dɛn rayt na di Ju Lɔ? Wetin yu kin si de wɛn yu rid am?” 27Di Ju Lɔ ticha ansa Jizɔs se, “Di Lɔ se, ‘Una fɔ lɛk di Masta we na una Gɔd wit ɔl una at, wit ɔl una layf, wit ɔl una pawa, ɛn wit ɔl una maynd’ ɛn ‘Una fɔ lɛk una neba lɛkɛ aw una lɛk unasɛf.’ ” 28Jizɔs se, “Yu ansa rayt. Go du ɔl wetin yu jɛs tɔk so ɛn yu go gɛt di layf we go de sote go.” 29Di Ju Lɔ ticha bin want fɔ sho Jizɔs se in rayt fɔ tɔk wetin i tɔk, so i aks Jizɔs se, “Udat na mi neba?” 30Jizɔs ansa am se, “Wan man bin kɔmɔt Jerusɛlɛm de go Jɛriko. As i de go tifman dɛn fɔdɔm pan am tek ɔl wetin i gɛt, bit am ɛn lɛf am na di rod af day wan. 31Wan man we de mek sakri fays fɔ pipul sin apin fɔ pas na da sem rod de. I si di man we tifman bit ledɔm na grɔn, i pas na di ɔda say na di rod ɛn go in we. 32Semwe so, wan pan dɛn Livayt we de ɛp dɛn man we de mek sakri fays fɔ pipul sin fɔ du Gɔd wok, pas na di ples we di man bin ledɔm. Wɛn i si di man na grɔn, i krɔs go na di ɔda say na di rod ɛn go. 33Wan man we kɔmɔt Same ria kam pas na di sem rod. Wɛn i rich na di sem ples ɛn si di man we tifman bit, i sɔri fɔ am. 34I go mit di man na di say we i ledɔm, i put mɛrɛsin pan di wund dɛn, dɔn i tay dɛn wit bandej. I put di man pan di ɔs we i bin de rayd. I kɛr am go na wan os we tre nja kin tap na nɛt ɛn mɛn am ol nɛt. 35Di ɔda de wɛn di man we kɔmɔt Same ria want fɔ go, i kɔl di man we gɛt di os. I gi am kɔpɔ ɛn tɛl am se, ‘Padi, duya, mɛn dis man fɔ mi ya! If dis kɔpɔ we a gi yu nɔ du, wɛn a kam bak mɔs tɛl mi ɔmɔs yu put de, a go gi yu bak.’ ” 36“Pan dɛn tri pipul ya we a jɛs tɔk bɔt so, uswan sho se di man we tifman bit, na in neba?” 37Di Ju Lɔ ticha ansa Jizɔs se, “Na di man we sɔri fɔ am.” Jizɔs se, “Yusɛf go ɛn du lɛkɛ am.” 38Wɛn Jizɔs ɛn in lanin bɔy dɛn de go, dɛn rich na wan vilej. Dɛn go na wan uman we nem Mata in os. Mata tɛl Jizɔs adu ɛn tɛl am fɔ sidɔm. 39Mata in sista bin nem Meri. Meri go sidɔm klos Jizɔs fɔ yɛri wetin i de tɔk. 40Bɔt di os wok bin de mɔna Mata, so i go mit Jizɔs ɛn se, “Masta, yu nɔ si se Meri lɛf mi wan pan di wok? Tɛl am mek i kam ɛp mi!” 41Jizɔs se, “Mata, Mata, yu put plɛnti tin na yu ed ɛn dat de wɔri yu, 42na wan tin yu fɔ du we yu nɔ de du; na da tin de we gud na in Meri de du ɛn nɔbɔdi nɔ go pul am pan am.”

will be added

X\