CHUDA 1

1Mi Jud, we de wok fɔ Jizɔs Krays ɛn we na Jems in brɔda, de rayt to una we Gɔd we na wi Papa lɛk, ɛn we i kɔl, ɛn una we Jizɔs Krays kip fɔ mek natin nɔ bi to una: 2Mek Gɔd sɔri fɔ una mɔ ɛn mɔ, mek i gi una kol at mɔ ɛn mɔ, mek i lɛk una mɔ ɛn mɔ. 3Mi padi dɛn we a lɛk, na bɔt di sev we Gɔd dɔn sev wi a bin want rayt una bad, bɔt a fil se a fɔ rayt beg una naw fɔ mek una fɛt fɔ stil biliv pan Jizɔs Krays lɛkɛ aw Gɔd dɔn mek in pipul dɛn biliv wan tɛm nɔmɔ, fɔ ɔltɛm. 4A de tɛl una dat bikɔs sɔm pipul we nɔ gɛt Gɔd na dɛn at dɔn kam miks wit una sikrit wan; dɛn se bikɔs Gɔd gud, dɛn kin du ɛni kayn tin, ɛn Gɔd nɔ go kɔndɛm dɛn; dɛn tɔn dɛn bak pan wi wan gren Masta Jizɔs Krays. Na lɔn, lɔntɛm, Gɔd in Buk bin dɔn tɔk se Gɔd go kɔndɛm dɛn pipul ya. 5Una bin no se, Gɔd we na di Masta bin pul di Izrɛl pipul dɛn kɔmɔt na Ijipt, bɔt aftawɔd i kil dɛn wan we nɔ bin biliv, bɔt a want mɛmba una bak bɔt dat naw. Ɛn igen a want mɛmba una bɔt 6dɛn enjɛl we bin lɛf fɔ rul na di say we dɛn bin de rul ɛn tɔn dɛn bak pan Gɔd, Gɔd dɔn chen dɛn na dak ples ɔnda dɛn grev te di big de we i go jɔj di wɔl. 7Na di sem tin bin bi na Sɔdɔm ɛn Gomɔra ɛn dɛn ɔda tɔng we bin de klos dɛn: di pipul dɛn bin de du ɔl kayn dɔti tin wit dɛn bɔdi, man bin de lɛf in wɛf go kip in kɔmpin man, uman bin de lɛf in man go kip in kɔmpin uman. Fɔ mek ɔlman si ɛn bikya ful, Gɔd put dɛn pipul ya na faya we nɔ de ɔt fɔ pɔnish dɛn. 8Semwe so, dɛn drim we dɛn pipul ya de drim de mek dɛn tek dɛn bɔdi du dɛn tin we fɔ mek dɛn shem ɛn we mek dɛn nɔ klin; dɛn nɔ de mek Gɔd kɔntrol dɛn layf, dɛn de tɔk bad bɔt di wan dɛn we gɛt pawa ɛn ɔna na ɛvin. 9Maykɛl sɛf we na dɛn enjɛl dɛn chif, wɛn in ɛn Setan bin de agyu bɔt uswan pan dɛn tu fɔ gɛt Mozis bɔdi, i nɔ kɔs Setan wɛn i de tɛl am se wetin i de du nɔ rayt, bifo dat, i tɛl am se, “Mek Gɔd tɔk pan yu!” 10Bɔt dɛn pipul ya de tɔk bad bɔt ɛni tin we dɛn nɔ sabi; dɛn de du ɛni tin we dɛn ed gi dɛn fɔ du lɛkɛ dɛn bif na bush, ɛn na dat de pwɛl dɛn. 11Trɔbul de bifo dɛn! Na Ken in fut dɛn de fala ɛn fɔseka mɔni dɛn de mek di sem mistek we Belam bin mek, dɛn go day lɛkɛ aw Kɔra bin day wɛn i tɔn pan di wan we bin de oba am. 12Wɛn una ɔl we biliv pan Krays gɛda wan ples fɔ it, bay aw dɛn pipul ya kin de it, yu kin si se dɛn nɔ gɛt shem ɛn dɛn nɔ de mɛmba ɔda pipul, dat mek dɛn tan lɛkɛ dɔti pan klin klos; dɛn tan lɛkɛ klawd we kin dak lɛkɛ se ren want kam, bɔt briz kin blo am go; ɛn igen, dɛn tan lɛkɛ dɛn tik we nɔ de bia di tɛm we dɛn fɔ bia, we sho se dɛn dɔn day ɛn wɛn pɔsin dɔn rut dɛn, dɛn day ɔltogɛda. 13Dɛn disgres de sho lɛkɛ frɔsh we de lɛf biɛn wɛn dɛn big swɛlin fɔdɔm na sho; dɛn tan lɛkɛ dɛn big sta we nɔ de sidɔm na wan ples na di klawd, Gɔd dɔn kip dak dak ples fɔ put dɛn pipul ya sote go. 14Na dɛn pipul ya, Inɔk, we de pan di nɔmba sɛvin jɛna reshɔn we bigin frɔm Adam, bin dɔn tɔk bɔt we i se: “A de tɛl una se di Masta de kam wit tawzin tawzin enjɛl dɛn we na Gɔd insɛf gi am 15fɔ jɔj ɔlman, ɛn kɔndɛm ɔl dɛn pipul we nɔ gri du wetin Gɔd want, fɔ ɔl di bad bad tin dɛn we dɛn de du we Gɔd nɔ lɛk, ɛn fɔ ɔl dɛn bad bad tin we dɛn dɔn tɔk bɔt Gɔd!” 16Dɛn pipul ya nɔ de satis fay, dɛn de grɔmbul ɔltɛm, dɛn de blem ɔda pipul, dɛn jɛs de fala dɛn at fɔ du bad, dɛn de bost bɔt dɛnsɛf, dɛn de tɛl pipul soso dɛn tin we go mek dɛn ed big so da tɛm de dɛn go gi dɛn wetin dɛn want. 17Mi padi dɛn, una fɔ mɛmba wetin wi Masta Jizɔs Krays in apɔsul dɛn bin dɔn tɛl una. 18Dɛn bin tɛl una se, “Bifo di wɔl dɔn, sɔm pipul go kam we go de laf una, dɛn go de fala dɛn at fɔ du ɔl wetin dɛn lɛk fɔ du, bɔt we Gɔd nɔ lɛk.” 19Na dɛn pipul ya de mek pipul nɔ gɛt wanwɔd, dɛn de fala dɛn at fɔ du dɛn bad tin we de na wɔl, Gɔd in Spirit nɔ de wit dɛn. 20Mi padi dɛn, una fɔ tinap tra nga pan di biliv we una biliv pan Gɔd. Una fɔ pre wit di pawa we Gɔd in Spirit de gi una. 21We una de wet fɔ mek Masta Jizɔs Krays gi una layf we go de sote go, bikɔs i sɔri fɔ una, una fɔ du dɛn tin we go mek Gɔd stil de blɛs una bikɔs i lɛk una. 22Una fɔ tɔk to dɛn pipul we de dawt, mek dɛn go biliv. 23Una fɔ drɔ sɔm pipul kwik kɔmɔt na di faya ɛn sev dɛn; una fɔ tek tɛm we una de tek sɔri at ɛp sɔm pipul, una nɔ fɔ mek di klos sɛf we dɛn wɛr wɛn dɛn de pan sin tɔch una bɔdi, dat min se una nɔ fɔ go klos ɛnibɔdi we de du bad. 24Lɛ Gɔd we ebul mek una nɔ sin ɛn we ebul mek sin nɔ de na una layf atɔl, bring una wit gladi na una at na di wɔnda ful ples we i de. Na in na wi wan gren Gɔd, we dɔn sev wi bay Jizɔs Krays, wi Masta, na in gɛt prez, pawa ɛn ɔna frɔm tɛm, naw ɛn sote go! Emɛn.

will be added

X\