GBOO IBU MƆƐ N KO A 9

1Wɛn Gɔd bin mek di fɔs agrimɛnt wit mɔta lman, di agrimɛnt bin gɛt plɛnti lɔ bɔt aw pipul fɔ pre to Gɔd. Ples bin de we mɔta lman bil fɔ pre to Gɔd. 2Di ples na bin Bafa. Di Bafa na bin big ples we dɛn sheb tu, dɛn kɔl di fɔs pat “Di ples we Gɔd de”. Dɛn tin we dɛn bin de kip de, na lamp, tebul, ɛn bred we pipul kin kɛr go put bifo Gɔd. 3Wɛn yu pas di sɛkɛn big tik kɔtin, wan ɔda pat bin de we dɛn kɔl “Di ples we Gɔd de pas ɛni ɔda ples.” 4Insay da ples de dɛn bin gɛt smɔl gold tebul we dɛn bin de bɔn insɛns we gɛt fayn smɛl. Di bɔks we di agrimɛnt we Gɔd mek wit mɔta lman de, bin de insay dis sem ples ya. Gold bin kɔba di wan ol bɔks. Insay di bɔks dɛn bin de kip wan gold pɔt we dɛn kin put da tin we dɛn kɔl mana we Gɔd bin de gi dɛn fɔ it. Erɔn in wɔki nstik we lif gro pan, ɛn dɛn tu ston we Gɔd bin rayt in lɔ dɛn pan, dɛnsɛf bin lib de. 5Oba di bɔks dɛn bin gɛt sɔm krichɔ we gɛt fɛda fɔ sho pipul se Gɔd de na da ples de. Di krichɔ dɛn fɛda kɔba Gɔd in chia we i sidɔm fɔ padin pipul dɛn sin. Bɔt nɔto naw wi go ɛksplen ɔl dɛn tin ya to una gud. 6Afta dɛn dɔn rɛdi di ples lɛkɛ dat, di man dɛn we bin de mek sakri fays fɔ pipul sin kin go insay di fɔs ples ɔltɛm we dɛn de go du Gɔd in wok. 7Bɔt na di edman we bin de mek sakri fays fɔ pipul sin, in wan gren kin go insay di sɛkɛn ples we de insay insay, wan tɛm fɔ ia. Na di tɛm dat we i kin tek bif blɔd mek sakri fays to Gɔd fɔseka in yon sin, dɛn i kin mek sakri fays fɔ ɔl di ɔda pipul dɛn sin we dɛn nɔ bin no se na sin. 8Gɔd in Spirit yus ɔl dɛn tin ya fɔ sho wi klia wan se, wans di fɔs ples na di Bafa stil de, mɔta lman nɔ gɛt rayt fɔ go insay di sɛkɛn ples we Gɔd de. 9Di Bafa jɛs de sho wi dɛn tin we de naw, ɛn wetin dɛn tin de min. I sho wi se nɔto wetin pɔsin we de pre de gi ɛn di sakri fays we i de mek to Gɔd de mek ɔltin rayt bitwin in ɛn Gɔd. 10Ɔl dɛn tin ya na lɔ we tɔk bɔt tin fɔ it ɛn drink ɛn aw fɔ was dɛn tin we go mek pipul klin na Gɔd yay. Ɔl dɛn lɔ ya jɛs de fɔ dis wɔl, ɛn dɛn pawa go jɛs de sote di tɛm rich we Gɔd go chenj ɔltin. 11Bɔt naw we Krays dɔn kam, in na di edman we de mek sakri fays fɔ pipul sin ɛn i dɔn bring di gud tin dɛn we wi dɔn gɛt naw. Di ples we i de du in wok bɛtɛ fawe pas di Bafa we de na dis wɔl. Nɔto mɔta lman mek di ples de we Krays de wok, ɛn da ples nɔ de na dis wɔl. 12Wɛn Krays bin go insay di ples we Gɔd de, na wan tɛm nɔmɔ i go insay de. Nɔto got ɛn mankaw blɔd i bin sakri fays de, na in yon blɔd. Na da blɔd de i tek gi wi layf we go de sote go. 13Fɔstɛm dɛn bin de tek got blɔd, mankaw blɔd, ɛn asis we kɔmɔt pan yɔng kaw we dɛn bɔn skata dɛn pan pipul we nɔ klin na Gɔd in yay, fɔ mek dɛn go klin. 14If di bif dɛn blɔd bin gɛt pawa fɔ klin pipul, dat min se, Krays in blɔd gɛt pawa pas di bif dɛn blɔd fɔ klin wi at. I tek insɛf we nɔ sin wande, mek sakri fays fɔ wi, ɛn na Gɔd in Spirit we de sote go gi am pawa fɔ sakri fays insɛf. Fɔseka dat, Krays mek wi at klin, so dat wi nɔ go du bad igen we go mek wi day, bɔt wi go sav Gɔd we gɛt layf sote go. 15Dis sho se na Krays tinap midul Gɔd ɛn mɔta lman, i mek nyu agrimɛnt, so dat dɛn pipul we Gɔd dɔn kɔl fɔ bi in pipul go gɛt dɛn gud tin we Gɔd prɔmis fɔ gi dɛn, ɛn dɛn gud tin de go blant dɛn sote go. Na bikɔs Krays day mek dat go bi, di day we i day mek Gɔd padin in pipul dɛn fɔ di bad we dɛn bin dɔn du, wɛn dɛn bin de ɔnda di fɔs agrimɛnt. 16Wɛn pɔsin rayt pepa fɔ ɛksplen wetin pipul fɔ du in prɔpati wɛn i day, da pɔsin de fɔ day fɔs bifo di pipul dɛn go du wetin i bin rayt. 17Di pepa nɔ min natin if di pɔsin nɔ day yet. Wɛn di pɔsin day, na in di pepa gɛt pawa. 18Na dat mek di fɔs agrimɛnt we Gɔd bin mek wit mɔta lman nɔ bin gɛt pawa, pas nɔmɔ wɛn pipul kin tek bif blɔd mek sakri fays to Gɔd. 19Lɔntɛm, Mozis bin tɛl ɔl di pipul dɛn ɔl di lɔ dɛn we Gɔd se dɛn fɔ fala. Mozis tɛl dɛn ɔl di lɔ dɛn fɔs, dɔn i tek gras we dɛn kɔl “isɔp” ɛn ship ia we dɛn kɔla wit rɛd, dɔk dɛn insay kaw blɔd ɛn insay wata, dɔn i ib ib am ɔlsay pan di Lɔ buk ɛn pan ɔl di pipul dɛn. 20Wɛn i bin de ib ib di blɔd ɔlsay, i se, “Dis na di blɔd we dɛn tek mek di agrimɛnt we Gɔd tɛl una fɔ fala.” 21Semwe so, Mozis bin ib ib di blɔd pan di Bafa we dɛn bin de mek sakri fays to Gɔd ɛn pan ɔl dɛn tin we dɛn kin yus wɛn dɛn de pre to Gɔd. 22Fɔ tru, bay aw di Lɔ se, dɛn tin we dɛn nɔ bin de tek blɔd klin nɔ bin plɛnti. Ɔda we nɔ bin de fɔ padin pɔsin sin, pas fɔ kil bif ɛn tek di blɔd mek sakri fays to Gɔd. 23Fɔstɛm, dɛn bin jɛs gɛt fɔ ib ib blɔd pan ɔl dɛn tin ya we de sho wi aw dɛn tin we de na ɛvin, tan, so dat dɛn ɔl go klin na Gɔd yay. Fɔ di tin dɛn we de na ɛvin, i gud fɔ mek pɔsin mek sakri fays we bɛtɛ pas bif sakri fays. 24Krays dɔn go insay di ples we Gɔd de na ɛvin. Na dat mek i tinap bifo Gɔd fɔ wi. I nɔ go insay di Bafa we mɔta lman bil, we jɛs de sho aw di ples we Gɔd de na ɛvin, tan. 25Di Ju edman we kin mek sakri fays fɔ pipul sin, kin go insay di sɛkɛn ples na di Bafa wan tɛm ɛvri ia; i kin kɛr bif blɔd go insay de, nɔto in yon blɔd. Bɔt na wan tɛm nɔmɔ Krays go na di ples we Gɔd de ɛn sakri fays insɛf to Gɔd. I nɔ du dat pas wan tɛm. 26If nɔto bin so, Krays bin fɔ sɔfa plɛnti tɛm frɔm di tɛm we Gɔd mek di wɔl. Bɔt i dɔn kam di fɔs ɛn las tɛm, naw we di wɔl de dɔn, fɔ sakri fays insɛf, so dat i go pul sin kɔmɔt na wi layf, wan tɛm fɔ ɔl. 27Na wan tɛm ɔlman gɛt fɔ day, ɛn afta dɛn dɔn day Gɔd go jɔj dɛn fɔ ɔl wetin dɛn bin du. 28Krays insɛf day wan tɛm nɔmɔ fɔ fri pipul, mek sin nɔ go gɛt pawa oba dɛn igen. I go kam bak na wɔl di sɛkɛn tɛm, bɔt da tɛm de i nɔ de kam fɔ pul sin kɔmɔt na pipul layf, i de kam fɔ gi dɛn pipul we de wet fɔ am layf we go de sote go na ɛvin.

will be added

X\