GBOO IBU MƆƐ N KO A 8

1Di tin we wi de kam tɛl una so, impɔtant pas ɔl: Di edman we de mek sakri fays fɔ pipul sin, we wi gɛt, na Jizɔs we sidɔm na Gɔd we de rul wit pawa na ɛvin, in raytan. 2Fɔstɛm, dɛn ɔda man we bin de mek sakri fays fɔ pipul sin bin de du Gɔd in wok na bafa we mɔta lman bil, bɔt Jizɔs de wok na di ples we Gɔd de, na Gɔd bil da ples de, nɔto mɔta lman. 3Ɔl dɛn edman we de mek sakri fays fɔ pipul sin, fɔ gi Gɔd wetin dɛn gɛt ɛn dɛn fɔ sakri fays ani mal to Gɔd. Semwe so, di edman we de mek sakri fays fɔ pipul sin, we wi gɛt, fɔ gɛt sɔntin we insɛf go gi Gɔd. 4If Jizɔs bin de na dis wɔl te naw, i nɔ bin fɔ bi man we de mek sakri fays fɔ pipul sin atɔl, bikɔs dɛn man we de mek sakri fays fɔ pipul sin we de na dis wɔl de mek dɛn sakri fays ya lɛkɛ aw di Ju Lɔ se. 5Di wok we dɛn bin de du bin jɛs tan lɛkɛ pikchɔ we de sho di wok we Jizɔs we na di edman we de mek sakri fays fɔ pipul sin, we wi gɛt, de du na ɛvin. Di Bafa na lɛkɛ pikchɔ we sho aw di ples, we Gɔd de, tan. Wɛn Mozis bin rɛdi fɔ bil di Bafa, dat na di ples we dɛn man we de mek sakri fays fɔ pipul sin bin de du dɛn wok, Gɔd tɛl am se, “Tek tɛm bil ɔltin jɛs lɛkɛ aw a bin sho yu wɛn yu bin de na Mawnt Saynay.” 6So wi si se di wok we Jizɔs de du pas di wan we dɛn ɔda man we de mek sakri fays fɔ pipul sin de du. Semwe so, di agrimɛnt we Jizɔs mek bitwin Gɔd ɛn mɔta lman bɛtɛ pas di ol wan, bikɔs na Jizɔs in agrimɛnt mek Gɔd mek prɔmis to wi, we bɛtɛ pas di fɔs wan. 7If di fɔs agrimɛnt bin du fɔ sev pipul, Gɔd nɔ bin fɔ mek ɔda agrimɛnt. 8Bɔt Gɔd insɛf si se di pipul dɛn nɔ bin du wetin di fɔs agrimɛnt se, na dat mek i se, “Di tɛm de kam we a go mek ɔda agrimɛnt wit di pipul dɛn na Izrɛl ɛn di wan dɛn na Juda. 9Dis nyu agrimɛnt ya nɔ go tan lɛkɛ di wan we a bin mek wit dɛn granpapa-papa dɛn, da tɛm we misɛf bin tek dɛn kɔmɔt na Ijipt. Dɛn bin pwɛl di agrimɛnt we a mek wit dɛn, so a bin lɛf dɛn to dɛnsɛf. 10Wɛn di tɛm rich, na di agrimɛnt dis we a go mek wit di pipul dɛn na Izrɛl: A go mek dɛn no mi lɔ dɛn ɛn mek dɛn nɔ fɔgɛt dɛn. A go bi dɛn Gɔd, ɛn dɛn go bi mi pipul. 11Di pipul dɛn nɔ go gɛt fɔ lan dɛn kɔmpin ɔ dɛn brɔda igen se, ‘Una fɔ no Gɔd we na di Masta.’ Bikɔs dɛn ɔl, pikin ɛn bigman, go no mi. 12A go sɔri fɔ dɛn ɛn a go padin dɛn fɔ ɔl di sin we dɛn dɔn sin, a nɔ go mɛmba dɛn sin igen.” 13Wɛn Gɔd tɔk bɔt nyu agrimɛnt, dat min se, di fɔs wan dɔn ol. Wi no se ɛni tin we dɔn ol, dɔn dɔn.

will be added

X\