GBOO IBU MƆƐ N KO A 13

1Una we na brɔda bikɔs una ɔl na Krays in pikin dɛn, una fɔ lɛk una kɔmpin dɛn ɔltɛm. 2Una nɔ fɔgɛt se, una fɔ mek dɛn tre nja we kam to una tap na una os. Sɔm pipul bin de mek tre nja dɛn tap na dɛn os, bɔt dɛn nɔ bin no se sɔm pan dɛn tre nja ya na enjɛl. 3Una mɛmba dɛn pipul we de na jel, lɛkɛ se unasɛf de na jel wit dɛn; ɛn una mɛmba dɛn pipul we de sɔfa, ɛn una put unasɛf na dɛn ples. 4Mek ɔlman rɛspɛkt mared layf, di man we mared nɔ fɔ gɛt ɔda uman ɛn di wɛf nɔ fɔ gɛt ɔda man. Una mɛmba se Gɔd go jɔj dɛn wan we liv fri layf, ɛn i go jɔj ɛni mared uman we kip ɔda man ɛn ɛni mared man we kip ɔda uman. 5Una nɔ put ɔl una at pan kɔpɔ ɔltɛm, una fɔ sati sfay wit wetin una gɛt, bikɔs Gɔd dɔn se, “A nɔ go lɛf yu, a go de wit yu ɔltɛm fɔ ɛp yu.” 6Na dat mek wi shɔ bɔt wetin wi de tɔk wɛn wi se, “Na Gɔd de ɛp mi ɔltɛm, natin nɔ go mek a fred, bikɔs mɔtalman nɔ gɛt ɛni pawa fɔ du mi bad.” 7Una fɔ mɛmba dɛn fɔstɛm pipul we na bin una lida we tɛl una Gɔd in mɛsej. Una fɔ tink bɔt wetin bi na dɛn layf, ɛn unasɛf fɔ biliv Gɔd lɛkɛ aw dɛn bin biliv am. 8Jizɔs Krays na di sem yɛstade, tide, ɛn i go bi di sem sote go, i nɔ go chenj. 9Una nɔ gri mek dɛn nyu tin we pipul de lan una, tɔn una at. Na di gud we Gɔd gud de mek una biliv am, fɔ tru, nɔto dɛn lɔ we tɔk bɔt tin fɔ it; dɛn nɔ min natin, ɛn dɛn nɔ de ɛp dɛn pipul we de fala dɛn. 10Ples de we Krays dɔn mek sakri fays to Gɔd fɔ wi, bɔt dɛn Ju man we de mek sakri fays fɔ pipul sin we de wok na di Bafa, nɔ gɛt rayt fɔ it na di ples we Krays mek in sakri fays fɔ wi. 11Wɛn dɛn Ju edman we de mek sakri fays fɔ pipul sin kin mek sakri fays fɔ pul di pipul dɛn sin kɔmɔt na dɛn layf, na di bif dɛn blɔd nɔmɔ dɛn kin kɛr go na di ples na Gɔd in Os we dɛn kɔl “Di ples we Gɔd de pas ɛni ɔda ples.” Pipul nɔ bin de kɛr di bif we dɛn kil go na tɔng, dɛn kin bɔn am na ples we pipul nɔ tap. 12Na dat mek Jizɔs insɛf nɔ mek dɛn kɛr am go insay di tɔng fɔ kil am, bɔt dɛn bin kɛr am go na ples we pipul nɔ tap, so dat i go tek in yon blɔd pul di pipul dɛn sin kɔmɔt na dɛn layf. 13So, una lɛ wi kɔmɔt insay di tɔng ɛn fala Jizɔs, ɛn bia di shem sɛf we i sɔfa na di krɔs. 14Wi nɔ gɛt tɔng we go las sote go na dis wɔl; wi de luk fɔ di tɔng we wi go tap bambay. 15Na dat mek wi fɔ prez Gɔd ɔltɛm; di prez we wi de prez Gɔd tru Jizɔs, wɛn wi de tɔk ɔltɛm se in na wi Masta, na di sakri fays we wi de mek to Gɔd. 16Una nɔ fɔgɛt se una fɔ de du ɔda pipul gud, ɛn una fɔ de gi dɛn pan wetin una gɛt, bikɔs na dɛn kayn sakri fays de, de mek Gɔd gladi. 17Una du wetin una lida dɛn tɛl una fɔ du ɛn put unasɛf ɔnda dɛn. Dɛn yay de pan una ɔltɛm ɛn dɛn gɛt fɔ tinap bifo Gɔd fɔ tɛl am bɔt dis wok we dɛn de du fɔ una. If una du wetin dɛn tɛl una fɔ du, dɛnsɛf go gladi fɔ du dɛn wok. Bɔt if una nɔ du am, dɛn nɔ go gladi fɔ du di wok, ɛn dat nɔ go ɛp una. 18Una pre fɔ wi ɔltɛm. Wi no gud wan se wi dɔn du ɔl wetin wi no se wi fɔ du, bikɔs wi bin want du wetin rayt ɔltɛm. 19A de beg una mɔ ɛn mɔ fɔ pre fɔ mi, so dat i nɔ go te igen Gɔd go gi mi chans fɔ kam fɛn una bak. 20Gɔd we de gi mɔta lman kol at, dɔn mek wi Masta Jizɔs rayz frɔm di grev wit layf ɛn mek i bi di shɛpad we pas ɔl fɔ de wach wi we na in pipul dɛn. Na Jizɔs in blɔd dɔn mek di agrimɛnt, we Gɔd mek wit wi, go de sote go. 21A de pre mek Gɔd gi una ɔl dɛn gud tin we una nɔ gɛt, so dat una go yus dɛn gud tin de fɔ du wetin i want una fɔ du. A de pre mek Gɔd mek Jizɔs Krays in pawa wok na wi ɔl at, so dat wi go bi aw i want wi fɔ bi. A de pre mek pipul prez ɛn rɛspɛkt Jizɔs Krays sote go! Emɛn. 22Mi brɔda dɛn, a de beg una, mek una put una at dɔng fɔ lisin to wetin a de tɛl una fɔ du; na dat mek dis lɛta we a rayt una nɔ lɔng. 23A want mek una no se dɛn dɔn pul wi brɔda Timoti kɔmɔt na jel. If i kam kwik, a go bring am kam wɛn a de kam to una. 24Una tɛl ɔl una bigman dɛn na di chɔch ɛn ɔl Gɔd in pipul dɛn de, adu fɔ mi. Wi Kristiɛn brɔda dɛn we kɔmɔt Itali, dɛnsɛf de tɛl una adu. 25Mek Gɔd sho una ɔl aw i gud.

will be added

X\