GBOO KADESIA KO A 4

1Una fɔ no se, wɛn pɔsin lili fɔs, i nɔ go gɛt di prɔpati we in papa dɔn prɔmis am sote di tɛm rich. Ɛn we na pikin, dɛn go trit am lɛkɛ se na savant, pan ɔl we na in gɛt di prɔpati. 2Bikɔs wɛn pikin lili, na big pɔsin dɛn go sho am wetin fɔ du ɛn du ɔltin fɔ am sote in papa go se i dɔn rich tɛm fɔ mek insɛf bigin du ɔltin fɔ insɛf. 3Na so wisɛf bin tan, wi na bin slev to dɛn dɛbul we bin de rul di wɔl, bifo wi no bɔt Gɔd gud gud. 4Bɔt wɛn di rayt tɛm rich, Gɔd sɛn in Pikin, we na Jizɔs Krays, kam na wɔl. Gɔd mek uman bɔn Jizɔs Krays ɛn Jizɔs Krays du ɔl wetin di Ju lɔ se, 5fɔ sev dɛn pipul we de ɔnda di Ju Lɔ, so dat i go mek wi bi Gɔd pikin dɛn. 6Fɔ sho se wi na Gɔd in pikin dɛn, Gɔd dɔn put Jizɔs Krays in Spirit na wi at, ɛn di Spirit de pre to Gɔd lawd wan se, “Papa, mi Papa!” 7So yu nɔto slev igen, yu na Gɔd pikin, ɛn bikɔs yu na Gɔd pikin, i dɔn gi yu ɔl wetin i bin dɔn prɔmis fɔ gi in pikin dɛn. 8Fɔs tɛm, una nɔ bin no Gɔd, so una na bin slev to dɛn spirit we nɔ gɛt pawa lɛkɛ Gɔd. 9Bɔt we una dɔn no Gɔd, ɔ a fɔ se, Gɔd dɔn no una; wetin mek una want tɔn bak go bi slev to di spirit dɛn we nɔ gɛt pawa ɛn we nɔ min natin? Wetin mek una want go bi dɛn slev bak? 10Una gɛt sɔm de, ɛn mɔnt, ɛn ia we una de sɛli bret bikɔs una tink se Gɔd go sati sfay wit una. 11Mi at de wɔri fɔ una, na fɔ natin a dɔn lebɔ pan una? 12Mi Kristiɛn pipul dɛn, a de beg una, mek una nɔ tink se di Ju Lɔ go mek ɔltin rayt bitwin una ɛn Gɔd. Misɛf nɔ tink so, lɛkɛ aw unasɛf nɔ bin tink so fɔstɛm. Una nɔ bin du mi bad. 13Una no se, di fɔs tɛm we a kam to una, na di sik we a bin sik bin mek a gɛt di chans fɔ tɛl una di Gud Nyus bɔt Jizɔs Krays. 14We a bin sik bad, dat bin mek tin tra nga fɔ una, bɔt dat nɔ mek una du lɛkɛ se una nɔ no mi. Una bin tek mi lɛkɛ aw una go tek Gɔd in mɛse nja, ɔ Jizɔs Krays insɛf. 15Una bin gladi fɔ mi fɔs tɛm, bɔt wetin dɔn bi naw? Fɔ tru a no se una bin fɔ gi mi ɔl wetin una gɛt, ilɛk sɛf a bin aks una fɔ gi mi una bɔlyay. 16Una nɔ lɛk mi igen bikɔs a tɛl una tru wɔd? 17Dɛn ɔda pipul kia bɔt una, bɔt wetin dɛn want nɔ fayn. Dɛn want fɔ sɛtfaya, mek a nɔ go gɛt wanwɔd wit una, so dat una go de fɔ dɛn lɛkɛ aw dɛn de fɔ una. 18Na fayn tin fɔ mek pipul sho se dɛn kia bɔt dɛn kɔmpin, if na gud dɛn want du. Una fɔ de lɛkɛ dat ɔltɛm, ivin we a nɔ de wit una. 19Mi pikin dɛn, mek a tɛl una igen se, di pen we a de fil fɔseka una jɛs tan lɛkɛ di pen we uman kin fil wɛn i want fɔ bɔn. A go fil dis pen ya sote una bi pipul we de fala Krays gud. 20A jɛs want fɔ go to una naw, so dat a nɔ go tɔk to una tra nga wan lɛkɛ aw a de tɔk to una so. A nɔ no wetin fɔ du wit una igen. 21Mek a aks una we want mek di Ju Lɔ rul una, una nɔ sabi wetin di Ju Lɔ se? 22Pɔsin kin rid na di Ju Lɔ se Ebraam bin gɛt tu pikin, in wɛf bɔn wan, ɛn di uman we de wok fɔ in wɛf, bɔn di ɔda wan. 23Di uman we bin de wok fɔ Ebraam in wɛf bin gɛt bɛlɛ ɛn bɔn bɔy pikin lɛkɛ aw uman kin bɔn pikin, bɔt di pikin we Ebraam in wɛf bɔn, i bɔn am bikɔs Gɔd bin dɔn prɔmis Ebraam da pikin de. 24Ebraam in tu wɛf dɛn min tu difrɛn tin: dɛn tu tan lɛkɛ tu difrɛn agrimɛnt. Di fɔs wan na di uman we kɔmɔt Mawnt Saynay we bɔn slev, dat na Ega. 25Wɛn pɔsin de tɔk bɔt Ega, na Mawnt Saynay we de Are bia, i de tɔk bɔt. Ega jɛs tan lɛkɛ aw Jerusɛlɛm tan tide, ɔl di pipul dɛn we kɔmɔt de tan lɛkɛ slev, na so Ega ɛn in pikin dɛnsɛf tan lɛkɛ slev. 26Bɔt di Jerusɛlɛm we de na ɛvin fri, ɛn da Jerusɛlɛm de tan lɛkɛ wi mama. 27Dɛn rayt na Gɔd in Buk se, “Yu uman, we nɔ ebul bɔn, yu fɔ gladi! Yu we nɔba fil pen fɔ bɔn pikin, dans wit gladi! Bikɔs di uman we in man dɔn lɛf go bɔn mɔ pikin, pas di uman we de to in man.” 28Mi kɔmpin Kristiɛn dɛn, una na Gɔd in pikin dɛn bikɔs na dat i bin dɔn prɔmis, lɛkɛ aw Ayzik bi Ebraam in pikin, bikɔs na dat Gɔd bin dɔn prɔmis. 29Da tɛm de di pikin we Ega bin bɔn bin de mek di pikin we Gɔd in Spirit bin prɔmis Ebraam, sɔfa, ɛn na di sem tin de apin naw. 30Bɔt na wetin dɛn rayt na Gɔd in Buk? Dɛn rayt se, “Drɛb di uman we de wok fɔ Ebraam in wɛf ɛn di pikin we i bɔn, bikɔs dɛn nɔ go gɛt natin pan Ebraam in prɔpati; na Ebraam in wɛf ɛn in pikin fɔ gɛt di prɔpati.” 31So, mi kɔmpin Kristiɛn dɛn, lɛ wi du lɛkɛ se wi na di mared wɛf in pikin dɛn, we wi bi, lɛ wi nɔ du lɛkɛ se wi na di pikin dɛn we di uman we de wok fɔ Ebraam in wɛf bɔn.

will be added

X\