GBOO ƐFISƆSI KO A 5

1We una na Gɔd in pikin dɛn we i lɛk, una fɔ tray fɔ tan lɛkɛ am. 2Una fɔ gɛt lɛk na una at, jɛs lɛkɛ aw Krays lɛk wi, dɔn i gi in layf lɛkɛ sakri fays we gɛt swit sɛnt we mek Gɔd sati sfay. 3We una na Gɔd in pikin dɛn, i nɔ gud fɔ mek una liv fri layf, ɔ mek una du wetin nɔ rayt, ɔ mek una put yay pan wetin ɔda pɔsin gɛt; i nɔ gud sɛf fɔ mek una de tɔk bɔt dɛn tin ya to una kɔmpin. 4Una nɔ fɔ tɔk bad, fulish, ɔ dɔti wɔd, bɔt una fɔ de tɛl Gɔd tɛnki. 5Una fɔ no se: pɔsin we liv fri layf, pɔsin we gɛt bad at, ɔ pɔsin we want ɔltin fɔ insɛf (we jɛs tan lɛkɛ pɔsin we de pre to dɛn tin we mɔta lman mek fɔ pre to) nɔ go de na di ples we Krays de rul ɛn we Gɔd de rul. 6Mek nɔbɔdi nɔ mek una ful wit wɔd we nɔ min natin, na ɔl dɛn tin ya de mek Gɔd vɛks pan dɛn pipul we nɔ de du wetin i tɛl dɛn fɔ du. 7Una nɔ fɔ gɛt natin fɔ du wit dɛn kayn pipul ya. 8Una bin de na dak, bɔt naw una dɔn bi di Masta in yon pipul, una dɔn de na di layt, una fɔ liv lɛkɛ pipul we de na di layt. 9If una de na di layt, una go du wetin gud, ɛn wetin rayt ɛn tɔk wetin tru. 10Una tray fɔ lan wetin di Masta want una fɔ du. 11Una nɔ du dɛn tin we dɛn ɔda pipul de du we nɔ go ɛp nɔbɔdi, na dɛn pipul we de na dak de du dɛn kayn tin ya; bɔt una fɔ bring dɛn tin ya kam na layt. 12Pipul go shem sɛf fɔ tɔk bɔt dɛn tin we dɛn pipul we de na dak de du, we nɔbɔdi nɔ si. 13Bɔt wɛn wi bring dɛn bad tin kam na layt, da tɛm de ɔlman go si aw dɛn tan. Ɛni tin we yay dɔn si, de na layt. 14Na dat mek dɛn rayt se, “Yu we de slip, yu wek, ɛn rayz frɔm di grev, ɛn Krays go gi yu layt.” 15Una tek tɛm aw una liv una layf, una nɔ du lɛkɛ dɛn pipul we nɔ gɛt sɛns. 16Ɛni chans we una gɛt fɔ du gud, una du ɔl wetin una ebul du, bikɔs dis tɛm ya na bad tɛm. 17Una nɔ gri mek ɛnibɔdi mek una ful, una tray fɔ no wetin di Masta want una fɔ du. 18Una nɔ fɔ drink wayn te una drɔnk we go mek una du bad, bɔt una fɔ mek Gɔd in Spirit de insay una gud gud. 19Wɛn una de tɔk wit una kɔmpin dɛn, una fɔ tɔk bɔt wetin rayt na dɛn Sams ɛn dɛn Gɔd sing. Una fɔ sing Gɔd sing ɛn Sams wit ɔl una at fɔ prez di Masta. 20Una fɔ tek wi Masta Jizɔs Krays in nem tɛl Papa Gɔd tɛnki ɔltɛm fɔ ɔltin. 21Una fɔ put unasɛf ɔnda una kɔmpin bikɔs una rɛspɛkt Krays. 22Wɛf fɔ put insɛf ɔnda in man lɛkɛ se na Krays i de put insɛf ɔnda. 23Wetin mek a tɔk dat, na we di man gɛt pawa oba in wɛf lɛkɛ aw Krays gɛt pawa oba di chɔch, ɛn Krays insɛf sev di chɔch, we na in bɔdi. 24Lɛkɛ aw di chɔch put insɛf ɔnda Krays, na so di wɛf fɔ put insɛf ɔnda in man pan ɔltin. 25Man fɔ lɛk in wɛf lɛkɛ aw Krays lɛk di chɔch sote i day, 26fɔ mek di chɔch klin wit wata ɛn in wɔd, dɛn i and am oba gi Gɔd. 27Krays du ɔl dat, so dat wɛn i go mek di chɔch tinap bifo am, di chɔch go klin, i nɔ go gɛt bɔt pan am. 28Man fɔ lɛk in wɛf lɛkɛ aw i lɛk in yon bɔdi. Di man we lɛk in wɛf, lɛk insɛf. 29Nɔbɔdi nɔ de we nɔ lɛk insɛf, na dat mek pɔsin de it ɛn ol in bɔdi gud, lɛkɛ aw Krays de du fɔ di chɔch; 30bikɔs wisɛf na pat pan Krays in bɔdi. 31Dɛn rayt na Gɔd in Buk se, “Na fɔseka dis, man go lɛf in mama ɛn papa, go mared wɛf ɛn di man ɛn in wɛf go bi wan.” 32Wetin a jɛs tɔk bɔt sho wi tru tin we at fɔ ɔnda stand, bɔt a no se dis tru tin na bɔt Krays ɛn di chɔch. 33Na di sem tin fɔ bi to una: ɛbri man we mared fɔ lɛk in wɛf lɛkɛ aw i lɛk insɛf, ɛn ɔl mared uman fɔ rɛspɛkt in man.

will be added

X\