GBOO ƐFISƆSI KO A 1

1Mi, Pɔl, we Gɔd pik fɔ bi Jizɔs Krays in apɔsul de rayt to di Kristiɛn dɛn we de na Ɛfisɔs, dɛn tru to Gɔd bikɔs dɛn gɛt wanwɔd wit Masta Jizɔs Krays. 2Mek Gɔd we na wi Papa ɛn Jizɔs Krays blɛs una ɛn gi una kol at. 3Lɛ wi prez Gɔd we na Masta Jizɔs Krays in Papa, bikɔs i dɔn blɛs wi we gɛt wanwɔd wit Krays wit ɔl dɛn blɛsin we de na ɛvin. 4Gɔd dɔn pik wi bifo i mek di wɔl fɔ mek wi gɛt wanwɔd wit Krays, so dat wi go bi in yon pipul ɛn bɔt nɔ go de na wi layf. 5We Gɔd lɛk wi, i dɔn mek Jizɔs Krays bring wi kam bak to insɛf; so dat wi go bi in pikin dɛn, bikɔs na dat i lɛk fɔ du ɛn na dat i mekɔp fɔ du. 6I mek in wan gren Pikin we i lɛk, gi wi dis big blɛsin ya fɔ natin. 7Bikɔs Krays day na di krɔs fɔ sev wi, wi dɔn fri ɛn Gɔd dɔn padin wi sin. Gɔd gud to wi, mɔt sɛf nɔ ebul tɔk am. Gɔd tek sɛns ɛn sabi 9fɔ du wetin i plan; i dɔn tɛl wi di plan we i bin ayd, i bin dɔn mekɔp lɔntɛm fɔ sɛn Krays kam du ɔl wetin i bin dɔn plan. 10Gɔd bin dɔn plan se: Wɛn di tɛm rich, i go bring ɔltin we gɛt layf wan ples: ɔltin we de na di klawd ɛn ɔl dɛn wan we de na di wɔl, Krays go bi edman fɔ dɛn ɔl. 11Ɔltin go bi lɛkɛ aw Gɔd dɔn mak ɛn lɛkɛ aw i want dɛn fɔ bi. Gɔd dɔn pik wi fɔ mek wi bi in yon pipul we wi gɛt wanwɔd wit Krays, bikɔs na dat i want ɛn na dat i bin dɔn plan frɔm we di wɔl bigin. 12Na dat mek wi we fɔs dɔn abop pan Krays fɔ prez Gɔd fɔ in pawa. 13Na di sem tin bi to unasɛf, wɛn una yɛri di Gud Nyus we na di tru tin, na in sho una aw Gɔd go sev una. Wɛn una biliv Krays, Gɔd gi una in Spirit we i bin dɔn prɔmis wi, dat na di mak fɔ sho se wi na Gɔd yon pipul. 14Na Gɔd in Spirit wi fɔ abop pan fɔ no se wi go gɛt wetin Gɔd bin dɔn prɔmis fɔ gi in pipul dɛn, ɛn na tru se: Gɔd go fri ɛnibɔdi we dɔn bi in yon. Una lɛ wi prez Gɔd in pawa! 15Na dat mek, frɔm we a yɛri se una dɔn biliv pan Masta Jizɔs ɛn aw una lɛk ɔl dɛn pipul we na Kristiɛn, 16a de tɛl Gɔd tɛnki ɔltɛm fɔseka una, a de pre fɔ una. 17A de beg Gɔd, we na wi Masta Jizɔs Krays in Papa, we gud, fɔ gi una in Spirit. Di Spirit go mek una gɛt sɛns ɛn i go sho una Gɔd, so dat una go no am mɔ ɛn mɔ. 18A de beg Gɔd igen fɔ mek i opin una at so dat una go no se Gɔd dɔn kɔl una fɔ kam to insɛf, ɛn una go abop fɔ gɛt layf we go de sote go, ɛn fɔ mek una go no di big blɛsin we Gɔd dɔn prɔmis una we na in yon pipul, 19ɛn aw in big big pawa de wok pan wi we biliv pan am. 20Na dis sem Gɔd yus in pawa mek Jizɔs rayz frɔm di grev, ɛn mek i sidɔm na ɛvin na in raytan. 21Krays gɛt pawa pas ɔlman we de rul na ɛvin, ɛn ɔlman we de rul na dis wɔl ɛn nɛks wɔl. 22Gɔd mek ɔltin fɔ mek dɛn nil dɔng bifo Krays, ɛn na Krays na di edman fɔ ɔlman na di chɔch, we na in bɔdi. Krays na di ed fɔ di bɔdi ɛn di bɔdi na di pipul dɛn na di chɔch, so Krays dɔn bi ɔl wetin i want fɔ bi bikɔs i dɔn gɛt di bɔdi. Ɛn insɛf de rul ɔltin ɛn ɔlman ɔlɔbɔt na wɔl ɛn i de mek dɛn bi aw dɛn fɔ bi.

will be added

X\