GBOO KƆDƆSAI KO A 2

1A want mek una no aw a wok tra nga fɔ una ɛn fɔ dɛn Kristiɛn na Leo di sya ɛn fɔ ɔl dɛn ɔda pipul we nɔ no mi yet bikɔs dɛn nɔ mit mi yet. 2Di tin we mek a want du so na fɔ mek dɛn gɛt kɔrej ɛn mek dɛn ɔl gɛt wan at ɛn lɛk dɛn kɔmpin mɔ ɛn mɔ. Dat go mek dɛn ɔnda stand wetin tru gud gud ɛn dɛn go biliv fɔ shɔ, dɛn nɔ go dawt igen. Na so dɛn go tek no wetin Gɔd bin ayd frɔm dɛn, dat na Krays insɛf. 3Na in de mek pipul no di sɛns we Gɔd gɛt ɛn ɔl dɛn wɔnda ful tin we i sabi, we nɔbɔdi nɔ bin dɔn no fɔstɛm. 4So una nɔ mek ɛnibɔdi agyu wit una ɛn tek lay mek una ful, ilɛk sɛf i tan lɛkɛ se na tru dɛn de tɔk. 5Pan ɔl we a nɔ de wit una mi at de wit una. A gladi fɔ si se una ɔl gɛt wan at pan di biliv we una biliv pan Krays ɛn una mekɔp tra nga wan se nɔbɔdi nɔ go ebul mek una tap fɔ biliv pan am. 6We una dɔn gri mek Jizɔs Krays bi una Masta, una fɔ gɛt wanwɔd wit am ɔltɛm. 7We una liv, una fɔ fasin pan am lɛkɛ aw rut de fasin na grɔn, na in fɔ bi di fawndeshɔn na una layf, una fɔ de abop pan am mɔ ɛn mɔ lɛk aw dɛn bin dɔn lan una fɔ du. Pantap dat, una fɔ de tɛl Gɔd tɛnki ɔltɛm. 8Una luk shap, mek nɔbɔdi nɔ mek una ful ɛn tɔn una lɛkɛ slev wit in yon mɔta lman sɛns we nɔ min natin; di tin dɛn we dɛn pipul ya de tɔk na wetin dɛn lɔntɛm pipul bin de lan pipul, ɛn na dɛn spirit we de rul dis wɔl mek dɛn no dɛn tin ya. Dɛn tin ya nɔ kɔmɔt to Krays. 9Gɔd insɛf bin de insay Krays, pan ɔl we Krays na bin mɔta lman, 10ɛn una dɔn gɛt di tru layf we una dɔn gɛt wanwɔd wit Krays. Krays de rul oba ɔl dɛn spirit we de rul ɛn we gɛt pawa. 11We una gɛt wanwɔd wit Krays, una dɔn sakɔmsayz, ɛn di sakɔmsayz we una dɔn sakɔmsayz nɔto di sakɔmsayz we mɔta lman de sakɔmsayz, bɔt na di sakɔmsayz we Krays de sakɔmsayz, dat na we i de mek sin nɔ gɛt pawa oba una. 12Wɛn dɛn baptayz una, i bin jɛs tan lɛkɛ se dɛn bɛr una wit Krays, ɛn i bin tan lɛkɛ se Gɔd we mek Krays rayz frɔm di grev wit in pawa bin mek unasɛf rayz frɔm di grev, bikɔs una biliv se i gɛt pawa fɔ du ɔltin. 13Tɛm bin de we i bin tan lɛkɛ se una bin dɔn day, bikɔs una bin de pan sin ɛn una bin tan lɛkɛ dɛn pipul we nɔto Ju we nɔ gɛt di Lɔ we Gɔd gi Mozis. Bɔt naw we una dɔn gɛt wanwɔd wit Krays, Gɔd dɔn gi una di tru layf. Gɔd dɔn padin ɔl wi sin dɛn. 14Gɔd dɔn ires dɛn dɛt we wi bin gɛt fɔ pe, ɛn dɛn lɔ we bin mek wi tan lɛkɛ slev fɔseka di dɛt dɛn. Gɔd pwɛl dɛn we i nel dɛn pan Krays in krɔs. 15Wɛn Krays bin de na di krɔs, i bin mek dɛn spirit we bin de rul, tap fɔ rul; we i dɔn win dɛn, i mek dɛn waka lɛkɛ slev biɛn am ɛn mek ɔlman si dɛn. 16So una nɔ mek ɛnibɔdi tɛl una wetin una fɔ it ɔ wetin una fɔ drink; us pati kla de dɛn pan di ia fɔ pre to Gɔd; us de pan di mɔnt fɔ mek sɔntin fɔ mɛmba di nyu mun; us de pan di wik fɔ pre ɛn blo. 17Ɔl dɛn lɔ ya na shado we de sho wetin de kam, bɔt di bɔdi insɛf na Krays. 18Una nɔ mek ɛnibɔdi we se in bɛtɛ pas una bikɔs Gɔd de mek i si tin dɛn na vishɔn, tɛl una se una nɔ de du rayt. Dɛn pipul ya de pin se pipul fɔ de fast ɛn dɛn fɔ de pre to enjɛl. Pipul lɛkɛ dɛn wan ya jɛs de mek prawd fɔ natin, na aw dɛn de tink wit dɛn yon mɔta lman sɛns de mek dɛn fil prawd. 19Pipul lɛkɛ dɛn wan ya dɔn tap fɔ biliv pan Krays we na di ed fɔ di bɔdi, dat na di chɔch. Na Krays de kɔntrol di bɔdi. I de fid am fɔ mek i gro, i mek ɔl di difrɛn pat dɛn jɔyn to dɛn kɔmpin ɛn fasin gud, ɛn di bɔdi de gro lɛkɛ aw Gɔd want mek i gro. 20I jɛs tan lɛkɛ se wɛn Krays day, unasɛf day, so dɛn spirit we de rul di wɔl nɔ de rul una igen. So wetin mek una de du lɛkɛ di pipul dɛn na wɔl? Wetin mek una de fala dɛn lɔ ya we se, “Nɔ tɔch dis it ya,” “Nɔ tes da wan de,” “Nɔ tek da wan de fɔ it am?” 22Ɔl dɛn tin ya we di lɔ se nɔ fɔ it ɔ drink go dɔn wɛn pɔsin it dɛn ɔ drink dɛn. Na mɔta lman mek dɛn lɔ ya we dɛnsɛf de lan pipul. 23Fɔ tru, i tan lɛkɛ se dɛn pipul we bin mek dɛn kayn lɔ ya bin gɛt sɛns, bikɔs dɛn se paopa pipul fɔ pre to enjɛl, dɛn bin de mek lɛkɛ se dɛn nɔ prawd ɛn dɛn se pɔsin fɔ sɔfa. Bɔt dɛn lɔ ya nɔ de ɛp pipul fɔ kɔntrol wetin dɛn at gi dɛn fɔ du, dat sho se di pipul dɛn we mek dɛn, nɔ gɛt sɛns.

will be added

X\