GBOO KƆDƆSAI KO A 1

1Na mi Pɔl we Gɔd pik fɔ bi Jizɔs Krays in apɔsul lɛkɛ aw i want, ɛn Timoti we na wi Kristiɛn brɔda, de sɛn dis lɛta. 2A de rayt dis lɛta to di Kristiɛn dɛn na Kɔlɔse, we tru to Gɔd ɛn we gɛt wanwɔd wit Krays lɛkɛ wisɛf. Mek Gɔd we na wi Papa blɛs una ɛn gi una kol at. 3Ɔltɛm we wi de pre fɔ una, wi kin tɛl Gɔd, we na wi Masta Jizɔs Krays in Papa, tɛnki. 4Wi de tɛl Gɔd tɛnki bikɔs wi yɛri se una biliv pan Jizɔs Krays ɛn una lɛk ɔl Gɔd in pipul dɛn. 5Di fɔs tɛm we dɛn tɛl una di Gud Nyus we na tru, una no se Gɔd kip gud tin fɔ una na ɛvin; ɛn we una de wet fɔ da gud tin de we una no fɔ shɔ se una go gɛt, dat mek una biliv pan Krays mɔ ɛn lɛk Gɔd in pipul dɛn. 6Di Gud Nyus de prɛd ɔlɔbɔt na wɔl ɛn i de mek pipul gɛt blɛsin, jɛs lɛkɛ aw i rich una ɛn i de blɛs una frɔm di de we una yɛri ɛn ɔnda stand fɔ tru aw Gɔd lɛk una ɛn aw i gud to una. 7Ɛpa fras, we wi lɛk, ɛn we de du Krays in wok de fɔ wi, na in bin tɛl una aw Gɔd lɛk una ɛn aw i gud to una. I siryɔs pan di wok we i de du fɔ Krays. I bin de ɛp wi fɔ tɛl una di Gud Nyus. 8I dɔn tɛl wi aw Gɔd in Spirit de mek una lɛk una kɔmpin Kristiɛn dɛn. 9Na dat mek frɔm di de we wi yɛri bɔt una, wi de pre fɔ una ɔltɛm. Wi de aks Gɔd mek in Spirit gi una sɛns ɛn mek una sabi bɔt am, so dat una go no wetin Gɔd want una fɔ du, ɛn una nɔ go dawt. 10Dat go mek una ebul du wetin di Masta want, ɛn ɔltɛm una go de du di tin we go mek i gladi; una go de du ɔl kayn gud wok, ɛn una go de no mɔ ɛn mɔ bɔt Gɔd. 11A de pre mek Gɔd mek in wɔnda ful pawa mek una gɛt maynd so dat una go ebul bia ɔltin. 12Una fɔ gladi ɛn tɛl wi Papa tɛnki fɔ we i mek una bi pipul we fit fɔ gɛt pan di tin we i dɔn prɔmis fɔ gi in pipul dɛn we i de rul ɛn we de na layt. 13I pul wi kɔmɔt pan sin we bin gɛt pawa oba wi ɛn we bin mek wi de na dak ɛn i bring wi kam ɔnda in Pikin we i lɛk bad, in pawa. Na Gɔd in Pikin dɔn pul wi kɔmɔt ɔnda sin in pawa, dat na we i dɔn padin wi. 15Krays we pipul dɔn si, na in mek wi no aw Gɔd, we wi nɔ de si, tan. Na in fɔs bin de bifo Gɔd mek ɛni tin we de na di wɔl. 16Tru Krays, Gɔd mek ɔl wetin de na ɛvin ɛn dis wɔl, dɛn tin we wi de si ɛn dɛn wan we wi nɔ de si; ivin dɛn spirit sɛf we gɛt pawa ɛn we de rul. Tru Krays, Gɔd mek ɔltin we de na ɛvin ɛn dis wɔl ɛn ɔltin de fɔ ɔna Krays. 17Krays bin dɔn de bifo Gɔd mek ɛni tin ɛn na Krays de mek ɔltin na di wɔl de na di ples we dɛn fɔ de. 18Krays na di ed pan di bɔdi, we na di chɔch; na in de gi di bɔdi layf. Krays na Gɔd in fɔs Pikin we Gɔd mek rayz frɔm di grev, so dat in wan gren go de oba ɔltin ɛn ɔlman. 19Gɔd gladi fɔ mek in Pikin gɛt ɔl wetin insɛf gɛt. 20Na Krays Gɔd go mek bring ɔltin we de na dis wɔl ɛn we de na ɛvin kam bak to insɛf. Na tru di day we Krays day na di krɔs, Gɔd mek mɔta lman ebul kam to insɛf. 21Una nɔ bin de klos Gɔd ɛn una nɔ bin lɛk am; di tin dɛn we una bin de du ɛn tink bin mek una nɔ lɛk am. 22Bɔt we Gɔd in Pikin kam day na di krɔs, dat dɔn mek una bi Gɔd in padi dɛn, so dat di tɛm we una go tinap bifo am una nɔ go gɛt fɔlt, i nɔ go blem una fɔ ɛni tin. 23Na so i go bi if una stil biliv di Gud Nyus ɛn una nɔ dawt Gɔd. Una nɔ fɔ gri mek ɛnibɔdi mek una lɛf fɔ abop pan di tin we di Gud Nyus we una dɔn yɛri mek una abop pan. Mi yon wok na fɔ tɛl una di Gud Nyus we ɔlman na wɔl dɔn yɛri. 24A gladi naw we a de sɔfa fɔ una, bikɔs di pen we a de sɔfa naw na pat pan di sɔfa we Krays bin sɔfa fɔseka in bɔdi we na di chɔch, ɛn we pipul stil gɛt fɔ sɔfa. 25Na fɔ wok fɔ di Kristiɛn dɛn Gɔd pik mi fɔ ɛp una ɛn fɔ tɛl una ɔl di mɛsej we i gi mi. 26Bifo naw, ɔl di tɛm, Gɔd nɔ bin mek ɛnibɔdi na wɔl no dis mɛsej ya, bɔt i dɔn tɛl in yon pipul dɛn naw. 27Gɔd mekɔp fɔ mek in yon pipul dɛn no dis wɔnda ful, wɔnda ful mɛsej we nɔbɔdi nɔ bin no fɔs tɛm, ɛn i mekɔp fɔ mek ɔlman yɛri am. Dis wɔnda ful tin ya na we Krays de insay una at ɛn dat go mek una de wit Gɔd di say we i de rul. 28Na bɔt Krays wi de tɛl ɔlman. Wit ɔl di sɛns we Gɔd gi wi, wi de tɛl dɛn wetin nɔ fɔ du ɛn lan dɛn wetin fɔ du, so dat ɔlman go no ɔl wetin Gɔd want dɛn fɔ du, dɛn go want du am wit ɔl dɛn at, ɛn dɛn go gɛt wanwɔd wit Krays. 29Na di tin dis we a de swɛt fɔ du, ɛn a de yus di pawa we de insay mi, we Krays gi mi, we mek a ebul du wetin a de du so.

will be added

X\