CHISƆSI 'A SƆ MƆƐ NU 26

1Agripa se, “Pɔl, yu kin tɔk fɔ yusɛf naw.” So Pɔl es in an ɔp ɛn bigin tɔk; i se, 2“King Agripa, a gladi fɔ di chans we a gɛt fɔ tinap bifo yu ɛn ansa fɔ ɔl dɛn tin we di Ju pipul dɛn se a du. 3Yu no ɔltin bɔt aw di Ju dɛn liv ɛn dɛn tin we dɛn kin de agyu bɔt wit dɛn kɔmpin, bɔt a de beg yu fɔ lisin to ɔl wetin a de kam tɛl yu naw. 4“Ɔl di Ju pipul dɛn no uskayn layf a liv frɔm we a smɔl, dɛn no se na mi yon pipul dɛn fɔs a bin de wit na Jerusɛlɛm. 5If dɛn want tɔk tru, dɛnsɛf no se mi na bin gud Faresi. 6Naw dɛn de jɔj mi bikɔs a biliv di prɔmis we Gɔd gi wi gra npapa-papa dɛn. 7Dɛn twɛlv trayb na di Ju neshɔn bin abop se dis tin ya we Gɔd bin prɔmis wi gra npapa-papa dɛn, go bi. Dɛn bin de pre to Gɔd de ɛn nɛt. King Agripa, na bikɔs misɛf biliv dis sem tin mek dɛn de tɔk bad bɔt mi. 8Wetin mek una nɔ ebul biliv se Gɔd de mek dɛn pipul we dɔn day rayz frɔm dɛn grev? 9“A bin biliv se a fɔ du ɛni tin we a ebul du fɔ pwɛl Jizɔs we kɔmɔt Nazarɛt, in nem. 10A du dat na Jerusɛlɛm. Dɛn bigman we de mek sakri fays fɔ pipul sin gi mi pawa fɔ jel ɛn kil di Kristiɛn dɛn so a bin jel plɛnti Kristiɛn dɛn ɛn wɛn dɛn bin de kil di Kristiɛn dɛn, a kin tɔk bad bɔt dɛn. 11A bin de go insay di Ju mitin os dɛn go pɔnish di Kristiɛn dɛn fɔ mek dɛn tɔk se dɛn nɔto Kristiɛn igen. Mi at bin so bad fɔ dɛn dat a kin fala dɛn go na dɛn ɔda kɔntri fɔ go pɔnish dɛn. 12“Dɛn bigman we de mek sakri fays fɔ pipul sin bin sɛn mi go Damaskɔs wit lɛta we sho se dɛn gi mi di pawa fɔ du ɛni tin wit di Kristiɛn dɛn. 13King Agripa, wan santɛm, a bin de na rod de go Damaskɔs wɛn wan brayt layt shayn pan wi. Dis layt ya bin kɔmɔt ɔpklawd ɛn i bin brayt pas san. 14Wi ɔl fɔdɔm na grɔn, na in a yɛri vɔys de tɔk na Ibru se, ‘Sɔl, Sɔl, wetin mek yu de fɛt mi? Yu go wund yusɛf if yu kik chuk-chuk.’ 15A se, ‘Udat na yu, Masta?’ Di vɔys se, ‘Mi na Jizɔs we yu de fɛt! 16Grap, tinap; A dɔn sho misɛf to yu ɛn a dɔn pik yu fɔ wok fɔ mi. Yu fɔ tɛl ɔda pipul wetin yu dɔn si tide ɛn yu fɔ tɔk wetin a want yu fɔ tɔk. 17A go mek dɛn pipul we a sɛn yu to, dɛn Ju ɛn dɛn wan we nɔto Ju, nɔ ebul du yu bad. 18Yu fɔ opin dɛn yay; yu fɔ pul dɛn kɔmɔt na dak ɛn bring dɛn kam na layt. Yu fɔ pul dɛn kɔmɔt ɔnda Setan in pawa ɛn bring dɛn kam to Gɔd. Bikɔs dɛn biliv pan mi, Gɔd go padin dɛn sin, ɛn dɛn go de na di ples we dɛn pipul we Gɔd dɔn pik, go de.’ 19“King Agripa, a du dɛn tin we di vɔys we kɔmɔt ɛvin tɛl mi fɔ du. 20Fɔs a go tɛl dɛn pipul na Damaskɔs, Jerusɛlɛm, ɛn ɔlɔbɔt na Judia, bɔt Gɔd; dɔn a tɛl dɛn pipul we nɔto Ju bɔt Gɔd. A tɛl dɛn fɔ lɛf fɔ du dɛn bad tin we dɛn de du ɛn kam to Gɔd, ɛn fɔ de du dɛn tin we sho se dɛn dɔn kam to Gɔd. 21Na dat mek di Ju dɛn bin ol mi, dɔn dɛn tray fɔ kil mi wɛn a bin de na Gɔd in Os. 22Bɔt we Gɔd de ɛp mi, te tide a de tɛl ɔlman, pikin o, bigman o, ɔl wetin tru. Wetin a de tɔk, na in dɛn prɔfɛt ɛn Mozis bin dɔn tɔk lɔntɛm se go bi. 23Dɛn bin se di Mɛsaya fɔ day ɛn i go bi di fɔs pɔsin we go rayz frɔm di grev fɔ tɛl dɛn Ju pipul dɛn ɛn dɛn pipul we nɔto Ju aw dɛn go sev, ɛn di sev we dɛn go sev tan lɛkɛ layt to dɛn.” 24Wɛn Pɔl de tɔk, Fɛstɔs ala pan am se, “Pɔl, yu kres! Di plɛnti buk we yu sabi de mek yu kres!” 25Pɔl ansa am se, “King Agripa, a nɔ kres! Na tru ɛn soba wɔd a de tɔk. 26King Agripa, yu no bɔt ɔl dɛn tin ya, dɛn nɔ ayd frɔm yu bikɔs dɛn nɔ bi na kɔna, so a nɔ de fred fɔ tɔk bɔt dɛn. 27King Agripa, yu biliv wetin dɛn prɔfɛt tɛl wi? A no se yu biliv dɛn!” 28Agripa tɛl Pɔl se, “Pɔl, yu min se yu go mek a bi Kristiɛn kwik kwik wan so?” 29Pɔl ansa se, “Ilɛk di tɛm shɔt ɔ i lɔng, nɔto yu wan gren a want fɔ kam to Krays, bɔt a de pre se una ɔl we de lisin mi go tan lɛkɛ mi bɔt dɛn nɔ go tay una wit chen lɛkɛ aw dɛn tay mi.” 30Di king, di gɔvna, Bana ysi ɛn ɔl di ɔda pipul dɛn grap. 31Wɛn dɛn de go, dɛn bin de tɛl dɛn kɔmpin se, “Dis man ya nɔ du natin fɔ mek dɛn jel am ɔ mek dɛn kil am.” 32King Agripa tɛl Fɛstɔs se, “Yu bin fɔ lɛf dis man ya if i nɔ bin dɔn se in want mek di big king na Rom jɔj in kes.”

will be added

X\