CHISƆSI 'A SƆ MƆƐ NU 10

1Wan man bin de na Siza ria we bin nem Kɔnilyɔs, na bin kapten fɔ dɛn soja man na Rom. Dɛn bin de kɔl dɛn soja man ya “Itali Soja man Dɛn”. 2Kɔnilyɔs ɛn di pipul dɛn na in os bin fred Gɔd. I bin de du plɛnti gud fɔ ɛp dɛn Ju pipul we po ɛn i kin de pre to Gɔd ɔltɛm. 3Wan santɛm, bay dɛn tri oklɔk, Gɔd sho Kɔnilyɔs sɔntin. I si Gɔd in enjɛl gud gud wan; di enjɛl kɔl am, i se, “Kɔnilyɔs!” 4Kɔnilyɔs skyad ɛn luk di enjɛl ɛn se, “Wetin yu want, sa?” Di enjɛl se, “Gɔd dɔn yɛri dɛn pre we yu kin de pre, i dɔn si di gud wok we yu dɔn du fɔ dɛn po pipul, ɛn i dɔn ansa yu. 5Sɛn go Jɔpa naw fɔ wan man we nem Saymɔn Pita. 6Saymɔn Pita de to Saymɔn we de wok dɛn bif kanda we in os de klos di waf.” 7Wɛn Gɔd in enjɛl we bin de tɔk to Kɔnilyɔs dɔn go, Kɔnilyɔs kɔl tu pan in bɔy dɛn, wan soja man, ɛn in raytan man we kin pre to Gɔd. 8I tɛl dɛn wetin bi, dɔn i sɛn dɛn go Jɔpa. 9Di ɔda de wɛn dɛn pipul ya bin de na rod de go ɛn dɛn bin dɔn rich klos Jɔpa, Saymɔn Pita go pantap di os we flat fɔ pre lɛkɛ aw dɛn Ju pipul kin du. Na bin santɛm. 10Pita bin angri ɛn i bin jɛs want it. Wɛn di pipul dɛn na di os de rɛdi di it, i tan lɛkɛ slip kech Pita. 11Aw Pita sɛt in yay, na de i si ɛvin opin ɛn sɔntin we fiba big bedshit de kam dɔng te i rich na grɔn. 12Ɔl kayn fofut tin, ɔl kayn snek ɛn ɔl kayn bɔd bin de na di bedshit. 13Pita yɛri vɔys de tɛl am se, “Pita, grap; kil ɛni tin ɛn it am!” 14Pita ansa se, “Masta, nɔ, sa; wan de a nɔ it tin we wi Ju pipul dɛn tink se dɔti ɛn we nɔ fayn fɔ it.” 15Di vɔys tɔk igen se, “Ɛni tin we Gɔd se klin, yu nɔ fɔ se i dɔti.” 16Pita yɛri di vɔys tri difrɛn tɛm, na in di big bedshit go bak na ɛvin. 17Di tin we Pita si mek i wɔnda ɛn i bin want no wetin dat min. Da sem tɛm de, dɛn pipul we Kɔnilyɔs sɛn bin dɔn rich na di os we Saymɔn Pita de ɛn dɛn bin tinap na di get. 18Di pipul dɛn we Kɔnilyɔs sɛn, kɔnk na di do ɛn aks if dɛn gɛt tre nja de we nem Saymɔn Pita. 19Di tin we Gɔd sho Pita bin mek Pita de wɔnda stil ɛn i bin stil want fɔ no wetin dat min, na in Gɔd in Spirit tɛl am se, “Tri man dɛn de luk fɔ yu. 20So grap go mit dɛn ɛn nɔ fred fɔ fala dɛn go bikɔs na mi sɛn dɛn.” 21So Pita grap go dɔng go mit dɛn. I se, “Na mi dis we una de luk fɔ, wetin mek una kam?” 22Dɛn ansa se, “Na Kapten Kɔnilyɔs, da bigman fɔ dɛn soja man dɛn na Itali, sɛn wi to yu. Na gud man we fred Gɔd ɛn ɔl di Ju pipul dɛn rɛspɛkt am bad. Gɔd bin sɛn enjɛl to Kɔnilyɔs fɔ mek i kɔl yu fɔ go na in os, mek i go yɛri wetin yu gɛt fɔ tɛl am.” 23Pita kɔl di man dɛn go insay di os ɛn i mek dɛn slip de, da nɛt de. Wɛn do klin, Pita wit di tri man dɛn, ɛn sɔm pan dɛn Gɔd pipul na Jɔpa lɛf fɔ go to Kɔnilyɔs na Siza ria. 24Wɛn i rich Siza ria di ɔda de, Kɔnilyɔs bin de wet dɛn, i bin dɔn kɔl in fambul dɛn ɛn in padi dɛn. 25Wɛn Pita want go insay di os, Kɔnilyɔs kam mit am ɛn butu ol in fut. 26Pita tɛl am se, “Grap, mi na mɔta lman.” 27Pita bin de tɔk to Kɔnilyɔs wɛn dɛn de go insay di os. I mit plɛnti pipul de. 28I tɛl di pipul dɛn se, “Unasɛf no se wi Ju Lɔ tɛl wi se wi nɔ fɔ kip kɔmpin wit pipul dɛn we nɔto Ju ɔ miks to dɛn sɛf. Bɔt Gɔd dɔn sho mi se a nɔ fɔ se mi kɔmpin mɔta lman nɔ fit fɔ miks to wi. 29Na dat mek, we yu sɛn kɔl mi a nɔ se nɔ; a kam. Kɔnilyɔs, mek a aks yu sɔntin, wetin mek yu sɛn kɔl mi?” 30Kɔnilyɔs ansa se, “I dɔn tek fo dez naw, bay dis tɛm, tri oklok santɛm, a bin de pre na mi os. Wantɛm, wan man we wɛr klos we de shayn kam tinap bifo mi. 31Di man se, ‘Kɔnilyɔs, Gɔd dɔn yɛri di pre we yu de pre ɛn i dɔn si du gud wok we yu dɔn du fɔ dɛn po pipul. I dɔn ansa yu. 32Sɛn kɔl wan man we nem Saymɔn Pita, i de na Jɔpa; i de na wan Saymɔn we de wok dɛn bif kanda, in os we de klos di waf.’ 33Na dat mek a sɛn kɔl yu wantɛm. I gud we yu kam. Wi kam naya fɔ yɛri wetin di Masta dɔn tɛl yu fɔ tɛl wi. Gɔd de ya wit wi.” 34Pita se, “Fɔ tru, Gɔd nɔ de luk ɛnibɔdi bɛtɛ pas in kɔmpin. 35Gɔd go mek ɛnibɔdi we rɛspɛkt am ɛn du wetin i want, bi in yon. 36Una no di mɛsej we Gɔd bin sɛn to di Ju pipul dɛn na Izrɛl, i tɛl dɛn di Gud Nyus se na Jizɔs Krays we na ɔlman Masta, go mek dɛn kam to Gɔd fɔ mek dɛn ɔl gɛt kol at. 37Una no wetin dɔn bi na Judia. Da big wok de bin bigin na Galili afta Jɔn bin dɔn tɔk se di pipul dɛn fɔ lɛf fɔ du di bad tin dɛn we dɛn de du ɛn kam mek i baptayz dɛn. 38Una no se Gɔd bin gi Jizɔs we kɔmɔt Nazarɛt in Spirit ɛn in pawa. Jizɔs bin de go ɔlɔbɔt de du gud fɔ pipul ɛn i mɛn ɔl dɛn wan we bin gɛt dɛbul insay dɛn. I bin ebul du ɔl dɛn tin ya bikɔs Gɔd bin de wit am. 39Na wi si ɔl wetin Jizɔs du na Judia ɛn Jerusɛlɛm. Una no se dɛn nel Jizɔs na di krɔs fɔ mek i day. 40Bɔt Gɔd mek i rayz frɔm di grev di de we mek tri, afta i day. Jizɔs sho insɛf to wi. 41I nɔ sho insɛf to ɔlman! Na to wi nɔmɔ, we Gɔd dɔn pik fɔ si am, i sho insɛf. Afta Jizɔs rayz frɔm di grev, wi bin it ɛn drink wit am. 42I tɛl wi fɔ tɛl ɔlman di Gud Nyus. I tɛl wi igen fɔ tɛl ɔlman se Gɔd dɔn pik am fɔ jɔj ɔl dɛn pipul we dɔn day ɛn ɔl dɛn wan we nɔ day yet. 43Ɔl dɛn prɔfɛt bin tɔk bɔt Jizɔs se if ɛnibɔdi biliv pan am, Gɔd go padin da pɔsin de fɔ di bad tin dɛn we i du, bay di pawa we de na Jizɔs in nem.” 44Pita bin stil de tɔk, na in Gɔd in Spirit kam pan ɔl di pipul dɛn we bin de lisin wetin i de tɔk. 45Dɛn Ju pipul we bin biliv pan Jizɔs we bin kɔmɔt Jɔpa fala Pita kam, bin wɔnda wɛn dɛn si se Gɔd gi dɛn pipul we nɔto Ju, in Spirit. 46Dɛn yɛri dɛn pipul we nɔto Ju de tɔk difrɛn difrɛn langwej dɛn ɛn prez Gɔd. Na in Pita tɔk se, 47“Gɔd dɔn gi dɛn pipul ya in Spirit lɛkɛ aw i bin dɔn gi wisɛf. Ɛnibɔdi go se dɛn nɔ fɔ baptayz?” 48Pita se mek dɛn kɔl Jizɔs Krays in nem we dɛn de baptayz dɛn. Di pipul dɛn mek Pita tap to dɛn lili bit.

will be added

X\