2 TIMOTI 4

1A de wɔn yu siryɔs wan bifo Gɔd ɛn bifo Krays Jizɔs we go jɔj dɛn wan we nɔ day yet ɛn dɛn wan we dɔn day: bikɔs Krays gɛt fɔ kam bak na wɔl ɛn rul lɛkɛ King, a de tɛl yu, 2fɔ de tɛl pipul di mɛsej we Gɔd gi yu ɔltɛm, wɛn dɛn de lisin ɔ wɛn dɛn nɔ want lisin; yu fɔ sho pipul wetin rayt fɔ du; yu fɔ tɛl dɛn wan we no se wetin dɛn de du nɔ rayt, fɔ tap; yu fɔ tɔk to dɛn mek dɛn waka tret; ɛn bia wit dɛn ɔltɛm wɛn yu de lan dɛn dɛn tin ya. 3Di tɛm go kam we pipul nɔ go want yɛri dɛn tin we ɔda pipul de lan dɛn we gud fɔ dɛn, bɔt dɛn go de fala wetin dɛn at gi dɛn fɔ du, ɛn dɛn go de gɛda mɔ ɛn mɔ ticha dɛn we go de tɛl dɛn tin we dɛn lɛk fɔ yɛri. 4Dɛn go lɛf fɔ lisin Gɔd yon mɛsej we tru, dɛn go put dɛn ed pan dɛn stori we mɔta lman mek. 5Bɔt yu fɔ kɔntrol yusɛf ɔltɛm; yu fɔ bia wɛn yu de sɔfa, yu fɔ de tɛl pipul di Gud Nyus, ɛn yu fɔ du ɔl wetin pɔsin we de wok fɔ Gɔd fɔ du. 6Fɔ mi yon pat, di tɛm dɔn rich fɔ mek a day lɛkɛ sakri fays fɔ Gɔd; di tɛm dɔn kam fɔ mek a lɛf dis layf. 7Di rɔn we a bin de rɔn fɔ mi Masta dɔn dɔn, a dɔn rich di say we fɔ tap, a nɔ lɛf fɔ biliv pan Gɔd, a nɔ lɛf fɔ lan pipul dɛn tin we wi biliv bɔt Gɔd. 8Bikɔs a dɔn rich di say we a fɔ tap, di prayz we a wok fɔ de wet mi, na di prayz dat we ɛnibɔdi we de waka tret wit Gɔd go gɛt, di Masta we de jɔj rayt go gi mi di prayz di de we i go kam bak; ɛn nɔto mi nɔmɔ i go gi, i go gi ɔl dɛn wan we go gladi fɔ si am wɛn i kam. 9Tray mek yu kam to mi, nɔ te igen. 10Bikɔs Dimas lɛk dɛn tin we de na di wɔl, i dɔn lɛf mi go; i dɔn go Tɛsalonayka. Krɛsɛns go Galeshya, Taytɔs go Dalme shya. 11Na Lyuk nɔmɔ de wit mi naya. Bring Mak kam wit yu wɛn yu de kam, bikɔs in kin de ɛp mi fɔ du di wok. 12A sɛn Taychikɔs go Ɛfisɔs. 13Wɛn yu de kam, bring mi kot we a lɛf to Kapos we de na Troas, ɛn mi buk dɛn, nɔ fɔgɛt dɛn wan we dɛn tek bif kanda mek, na dɛn a want bad. 14Alɛgza nda we na bla ksmit du mi bad bad tin. Gɔd go pe am fɔ wetin i du. 15Yusɛf fɔ bikya ful wit am, bikɔs i nɔ want yɛri di mɛsej we wi de tɛl pipul at ɔl, ɛn ɔltɛm i de tɔk bad bɔt am. 16Di fɔs tɛm we a go kot, nɔbɔdi nɔ bin tinap fɔ mi; ɔlman lɛf mi. Mek Gɔd nɔ mak dɛn fɔ dat! 17Bɔt di Masta bin de wit mi ɛn i gi mi pawa, we mek a ebul tɛl pipul ɔl di mɛsej, mek ɔl dɛn wan we nɔto Ju, yɛri; ɛn i mek a nɔ go insay layɔn mɔt. 18If ɛni bad tin mit mi di Masta go pul mi kɔmɔt pan am, i nɔ go mek natin du mi ɛn i go kɛr mi go na ɛvin we i de rul lɛkɛ King. Mek wi prez am ɛn ɔna am sote go! Emɛn. 19A de sɛn adu fɔ Prisila ɛn Akwila ɛn fɔ Onɛsifɔrɔs wit in wɛf ɛn pikin dɛn. 20Irastɔs nɔ kɔmɔt na Kɔrint yet, ɛn a lɛf Trɔfimɔs na Miletɔs, bikɔs i bin sik. 21Tray fɔ mek yu kam bifo di kol sizin. Ubulɔs, Pudɛns, Laynɔs ɛn Klɔdia, wit ɔl dɛn ɔda Kristiɛn brɔda dɛn sɛn adu fɔ yu. 22Mek di Masta de wit yu spirit ɔltɛm. Mek Gɔd sho una ɔl aw i gud.

will be added

X\