2 TIMOTI 2

1Yu, mi pikin, lɛ di gud we Gɔd de du fɔ wi, bikɔs wi gɛt wanwɔd wit Jizɔs Krays, mek yu tinap tra nga. 2Dɛn wɔd we yu kin yɛri a de tɛl plɛnti pipul, yusɛf fɔ tɛl dɛn pipul we yu kin abop pan, we go kip dɛn na dɛn at, so dat dɛnsɛf go ebul lan ɔda pipul dɛn sem tin ya. 3Yusɛf fɔ sɔfa yu yon, bikɔs yu na Krays Jizɔs in soja man ɛn natin nɔ go pul yu biɛn am. 4Ɛni soja man we de na ami go want fɔ mek di ɔfisa we na in bɔs sati sfay wit am, so i nɔ go miks pan dɛn tin we dɛn pipul we nɔto soja man dɛn de du. 5Man we de rɔnres nɔ go win di kɔp pas nɔmɔ i de fala di rul dɛn. 6Fama we dɔn wok tranga na in fam na in fɔs fɔ gɛt pan di tin dɛn we gro. 7Tink bɔt ɔl wetin a de tɛl yu, di Masta go mek yu ɔnda stand ɔltin. 8Mɛmba Jizɔs Krays, we Gɔd mek rayz frɔm di grev, we kɔmɔt na Devid in fambul layn, ɛn we a de tɔk bɔt wɛn a de tɛl pipul di Gud Nyus. 9A de sɔfa bikɔs a de tɛl pipul di Gud Nyus, dɛn chen mi sɛf lɛkɛ jelman, bɔt dɛn nɔ go chen Gɔd in wɔd; 10na dat mek a de bia ɔltin fɔseka dɛn pipul we Gɔd dɔn pik, so dat dɛnsɛf go sev if dɛn gɛt wanwɔd wit Krays Jizɔs ɛn dɛn go gɛt di tru layf we de na ɛvin sote go. 11Na tru dɛn kin tɔk we dɛn kin se: “If wi day wit am, wi go liv wit am. 12If wi nɔ lɛf fɔ bia, wi go rul wit am. If wi se wi nɔ no am, insɛf go se in nɔ no wi. 13If wi nɔ du wetin i tɛl wi, in go stil de du wetin i dɔn tɛl wi se in go du, bikɔs i nɔ go lay pan insɛf.” 14Mɛmba yu pipul dɛn bɔt dɛn wɔd ya, ɛn wɔn dɛn siryɔs wan bifo Gɔd mek dɛn nɔ fɛt fɔseka dɛn wɔd we nɔ min natin. Dat nɔ de ɛp ɛnibɔdi, bifo dat i de mek dɛn pipul we de lisin, nɔ biliv Gɔd. 15Tray gud mek Gɔd sati sfay wit yu, bikɔs i si se yu na wokman we nɔ de shem fɔ du in wok ɛn yu de lan pipul di tru wɔd bɔt Gɔd, aw yu fɔ lan dɛn. 16Nɔ lisin to dɛn fulish tɔk we nɔ gɛt natin fɔ du wit Gɔd, ɛn we jɛs de mek pipul lɛf fɔ fala Gɔd mɔ ɛn mɔ. 17Di tin we dɛn de lan pipul tan lɛkɛ sofut we de it di say we i de pan di bɔdi go insay. Tu pan dɛn ticha ya na Imɛniɔs ɛn Faylitɔs. 18Dɛn nɔ biliv wetin tru igen, dɛn de tɔk se di tɛm we pipul we dɔn day go rayz frɔm dɛn grev dɔn pas; dat de mek sɔm pipul we bin biliv, bigin dawt. 19Bɔt natin nɔ go shek di tranga fawndeshɔn we Gɔd dɔn mek; di wɔd dɛn we rayt pan di fawndeshɔn na dɛn dis: “Di Masta sabi di wan dɛn we na in yon” ɛn “Ɛnibɔdi we se in blant di Masta fɔ lɛf fɔ du dɛn tin we nɔ rayt.” 20Insay jɛntri man os yu kin gɛt ɔl kayn plet ɛn pan: silva wan dɛn, gold wan dɛn, sɔm we dɛn tek bod mek, sɔm we dɛn tek kle mek; sɔm na fɔ yus wan tɛm nɔmɔ fɔ big biznɛs, sɔm na fɔ yus ɛvri de. 21So if pɔsin lɛf fɔ du ɔl kayn bad tin, Gɔd go yus am fɔ du dɛn spɛshal wok bikɔs di pɔsin dɔn gi in Masta ɔl in layf ɛn i de du ɔl di wok we in Masta gi am fɔ du, ɛn i rɛdi fɔ du ɔl kayn gud wok. 22Nɔ du dɛn tin we dɛn yɔng pipul dɛn at kin gi dɛn fɔ du we dɛn nɔba ebul kɔntrol; tray fɔ de du wetin rayt na Gɔd yay, tray fɔ abop pan Gɔd, fɔ lɛk ɔlman ɛn fɔ mek kol at de; yu fɔ tray fɔ de du ɔl dɛn tin ya wit ɔl dɛn pipul we gɛt klin at ɛn we de pre mek di Masta ɛp dɛn. 23Nɔ miks pan dɛn fulish agyumɛnt we pipul we nɔ sabi natin de gɛt; yu no se na plaba dɛn kin ɛnd pan. 24Di pɔsin we de du Gɔd wok nɔ fɔ mek plaba, i fɔ gud to ɔlman; i fɔ bi gud ticha we de bia, 25we nɔ de tek pawa tɔk to dɛn wan we nɔ si wit am. I de go kɛlɛkɛlɛ wit dɛn bikɔs i no se sɔntɛm Gɔd go gi dɛn di chans fɔ sɔri fɔ dɛn bad trik ɛn kam no di tru tin we dɛn fɔ biliv. 26Da tɛm de dɛn go kechɔp se wetin dɛn bin de du nɔ rayt ɛn dɛn go kɔmɔt insay Setan in trap; Setan bin dɔn kech dɛn ɛn i bin de mek dɛn du wetin i want.

will be added

X\