GBOO FEAN BƆƐ TƐSADONIKA KO A 3

1Mi Kristiɛn pipul dɛn, dis na di las wɔd we a de tɔk na dis lɛta, una pre fɔ wi ɔltɛm so dat di Gud Nyus bɔt di Masta go de prɛd ɔlɔbɔt kwik kwik ɛn pipul go ɔna di Masta ɛn tɛl am tɛnki fɔ di Gud Nyus, lɛkɛ aw i bin bi di tɛm we unasɛf yɛri di Gud Nyus. 2Una pre igen mek Gɔd pul wi kɔmɔt na dɛn bad bad pipul dɛn an, bikɔs nɔto ɔlman biliv di Gud Nyus. 3Bɔt di Masta na pɔsin we nɔ go lɛf una, i go mek una tinap tra nga ɛn i nɔ go mek ɛni bad tin mit una. 4Na wi Masta mek wi de abop pan una, ɛn wi shɔ se una de du wetin wi tɛl una fɔ du ɛn una go stil de du am. 5A de pre mek di Masta sho una mɔ ɛn mɔ aw Gɔd lɛk una ɛn mek i mek una no gud gud aw Krays dɔn bia ɛn aw i de mek una bia. 6Mi Kristiɛn pipul dɛn, wi de tek wi Masta Jizɔs Krays in nem tɛl una se una nɔ fɔ mek padi wit dɛn Kristiɛn we nɔ want du natin, ɛn we nɔ de du wetin wi bin dɔn tɛl dɛn fɔ du. 7Unasɛf no gud gud wan se una fɔ wok lɛkɛ aw wi bin de wok. Wi wok tra nga wan wɛn wi bin de wit una. 8Wi bin mek pipul ɛp wi, bɔt wi bin de pe dɛn fɔ ɔl di it we dɛn bin de gi wi. Wi bin de wok tra nga wan; wi bin de wok de ɛn nɛt bikɔs wi nɔ bin want fɔ mek ɛni wan pan una pul mɔni fɔ ɛp wi. 9Wetin mek wi bin de du ɔl da wok de, nɔto bikɔs wi nɔ gɛt rayt fɔ tɛl una fɔ gi wi it ɛn ples fɔ slip, bɔt na bikɔs wi bin want sho una patan fɔ fala. 10Wɛn wi bin de wit una, wi bin de tɛl una se, “Una nɔ fɔ gi ɛnibɔdi we nɔ gri fɔ wok, ɛni tin fɔ it.” 11Wi bin tɔk dat bikɔs wi yɛri se sɔm pipul de wit una we nɔ want du natin pas fɔ put mɔt pan ɔda pipul biznɛs. 12Wi de tek Masta Jizɔs Krays in nem tɛl dɛn pipul de se: dɛn nɔ fɔ de ambɔg, bɔt dɛn fɔ liv di rayt we, ɛn dɛn fɔ lebɔ fɔ gɛt wetin dɛn go it. Wi de beg dɛn fɔ du ɔl dɛn tin ya. 13Mi Kristiɛn pipul dɛn, una nɔ taya fɔ du gud. 14Sɔntɛm, pɔsin de we nɔ gri du di tin we wi rayt na dis lɛta. If dat bi, una fɔ no di kayn pɔsin we i bi ɛn una nɔ fɔ miks wit am, so dat i go shem. 15Una nɔ du am lɛkɛ aw una kin du pɔsin we nɔ lɛk una, bɔt una wɔn am lɛkɛ aw una go wɔn una kɔmpin Kristiɛn. 16Mek di Masta insɛf, we de mek wi gɛt kol at, gi una kol at ɔltɛm pan ɔltin. Mek i de wit una ɔl. 17Na mi yon an a tek rayt dis: Mi, Pɔl, de tɛl una adu. Na dis sho se na mi rayt dis lɛta; na so a kin rayt ɔl mi lɛta dɛn. 18A de pre mek wi Masta Jizɔs Krays sho una ɔl aw i gud ɛn aw i lɛk una.

will be added

X\