GBOO FEAN BƆƐ TƐSADONIKA KO A 2

1Mi Kristiɛn pipul dɛn, sɔm pipul de tɔk se di De we di Masta go kam ɛn gɛda wi ɔl rawnd insɛf, dɔn kam, bɔt a de beg una, mek una 2nɔ mek dɛn kɔnfyus una ɔ mek una wɔri if wetin una de tink nɔ rayt. Sɔntɛm pipul min se na wɛn wi de tɔk di wɔd we Gɔd tɛl wi fɔ tɔk na in wi tɔk se di de we di Masta fɔ kam dɔn kam, ɔ na wɛn wi de lan pipul bɔt Gɔd na in wi tɔk so, ɔ na lɛta a rayt dat. 3Mek nɔbɔdi nɔ mek una ful. Di de we di Masta go kam bak nɔ go kam sote di tɛm we plɛnti pipul go tɔn dɛn bak pan Gɔd ɛn sote di wan we de fɛt Gɔd sho insɛf, in we Gɔd go pwɛl ɔltogɛda na ɛl. 4Di wan we de fɛt Gɔd nɔ go tek dɛn tin ɛn dɛn spirit we pipul de pre to mek natin. I go fil se in gɛt pawa pas ɔl dɛn tin de ɛn i go sidɔm na Gɔd in Os ɛn se in na Gɔd. 5Una nɔ mɛmba? A bin tɛl una bɔt ɔl dat di tɛm we a bin de wit una. 6Unasɛf no di pawa we tap di wan we de fɛt Gɔd mek i nɔ kam yet, te in yon tɛm rich fɔ sho insɛf. 7Bɔt naw naw plɛnti pipul de du dɛn tin we Gɔd se wi nɔ fɔ du, ɛn na wetin Gɔd dɔn sho wi mek wi ebul ɔnda stand dis. Bɔt ɔl dɛn tin we go bi na wɔl, nɔ go apin sote Gɔd pul di wan we de mek dɛn nɔ bi, kɔmɔt na rod. 8Na da tɛm de di wan we de fɛt Gɔd go sho insɛf. Bɔt wɛn Masta Jizɔs go kam, i go kil am wit di briz we de kɔmɔt na in mɔt ɛn wit di brayt layt we de rawnd am. 9Di wan we de fɛt Gɔd go kam wit Setan in pawa ɛn i go kam sho se in gɛt ɔl kayn pawa we i du plɛnti big wok we go mek pipul ful, 10ɛn i go du ɔl kayn bad tin we go mek dɛn pipul we go go ɛl, ful. Dɛn go go ɛl, bikɔs dɛn nɔ bin gri fɔ yɛri di tru wɔd ɛn dɛn nɔ bin lɛk di tru wɔd bɔt wi Masta Jizɔs we bin go mek Gɔd sev dɛn. 11Na dat mek Gɔd nɔ alaw dɛn fɔ tink rayt so dat dɛn go biliv tin we na lay. 12Ɛn na dat mek Gɔd go kɔndɛm dɛn pipul we gladi fɔ de sin ɛn we nɔ biliv di tru wɔd bɔt wi Masta Jizɔs. 13Mi Kristiɛn pipul dɛn we di Masta lɛk, wi fɔ tɛl Gɔd tɛnki fɔ una ɔltɛm, bikɔs frɔm we di wɔl bigin, Gɔd bin dɔn pik una fɔ sev una bay we i mek in Spirit mek una bi in yon pipul dɛn ɛn bay we una put ɔl una at pan di Gud Nyus bɔt Krays. 14Gɔd kɔl una fɔ bi in yon pipul dɛn tru di Gud Nyus we wi tɛl una; i kɔl una fɔ gɛt pan di wɔnda ful pawa ɛn ɔna we Masta Jizɔs Krays gɛt. 15Wi Kristiɛn pipul dɛn, una nɔ fɔ chenj wetin una biliv, ɛn ɔltɛm una at fɔ de pan ɔl wetin wi pipul dɛn bin lan wi, ɛn we wisɛf bin lan una, wɛn wi bin de tɔk to una ɛn wɛn wi rayt una di fɔs lɛta. 16Wi de pre mek wi Masta Jizɔs Krays insɛf, ɛn Gɔd we na wi Papa, we lɛk wi ɛn mek wi gɛt kɔrej ɔltɛm bikɔs i gud ɛn mek wi ebul bia wet fɔ wetin gud, 17kɔrej una ɛn ɛp una fɔ du ɛn tɔk ɔl wetin gud.

will be added

X\