GBOO FEAN BƆƐ TƐSADONIKA KO A 1

1Mi, Pɔl, Saylas ɛn Timoti de sɛn dis lɛta to una di chɔch mɛmba dɛn na Tɛsalonayka; una na Gɔd we na wi Papa ɛn Masta Jizɔs Krays yon pipul. 2Mek Gɔd we na wi Papa ɛn Masta Jizɔs Krays sho una aw i gud ɛn gi una kol at. 3Mi Kristiɛn pipul dɛn, wi de tɛl Gɔd tɛnki ɔltɛm fɔ una. Wetin wi de du so na di rayt tin, bikɔs una de biliv pan Krays mɔ ɛn mɔ ɛn una de lɛk una kɔmpin dɛn mɔ ɛn mɔ. 4Na dat mek wi kin gladi fɔ tɔk bɔt una ɔltɛm to dɛn pipul we na Gɔd yon na dɛn ɔda chɔch. Wi kin tɔk bɔt aw una stil de bia ɛn biliv pan Krays, pan ɔl we pipul de mek una sɔfa. 5Ɔl wetin una de sɔfa sho se Gɔd go jɔj ɔlman lɛkɛ aw i fɔ jɔj dɛn, ɛn bikɔs una de sɔfa, Gɔd go mek una fit fɔ mek i rul una. 6Gɔd go du wetin rayt: dɛn pipul we de mek una sɔfa, Gɔd go mek dɛnsɛf sɔfa, 7ɛn i go mek una we de sɔfa naw nɔ sɔfa igen, ɛn wisɛf nɔ go sɔfa igen. Gɔd go du dat di tɛm we Masta Jizɔs go kɔmɔt na ɛvin kam ɛn in enjɛl dɛn we gɛt pawa go fala am kam, 8faya we de kech go de fɔ pɔnish dɛn pipul we nɔ gri mek Gɔd kam na dɛn layf ɛn dɛn pipul we nɔ gri tek wetin di Gud Nyus bɔt wi Masta Jizɔs tɛl dɛn. 9Gɔd go mek dɛn sɔfa; i go pɔnish dɛn, i go pwɛl dɛn ɔltogɛda. I nɔ go mek dɛn kam na di say we di Masta de, ɛn dɛn nɔ go si aw di Masta wɔnda ful, 10di de we i go kam. Da sem tɛm de ɔl dɛn pipul we na in yon ɛn we biliv pan am go prez ɛn ɔna am. Unasɛf go jɔyn dɛn pipul we de prez am ɛn ɔna am, bikɔs una dɔn biliv wetin wi tɛl una. 11Na dat mek wi de pre fɔ una ɔltɛm. Wi de pre to wi Gɔd mek i mek una fit fɔ liv di layf we i kɔl una fɔ liv. Bikɔs Gɔd gɛt pawa fɔ du so, lɛ i mek una ebul fɔ du ɔl di gud we una want fɔ du, ɛn dɔn ɔl dɛn tin we una bin de du bikɔs una biliv pan am. 12If una du dat, una go mek pipul ɔna wi Masta Jizɔs, ɛn Masta Jizɔs go mek pipul ɔna una, bikɔs Gɔd, we na wi yon, ɛn Masta Jizɔs Krays gud to una.

will be added

X\