2 PITA 3

1Mi padi dɛn we a lɛk, dis na di sɛkɛn tɛm we a de rayt una. Dɛn tu lɛta ya we a dɔn rayt una na fɔ mɛmba una bɔt dɛn tin we a bin dɔn tɛl una, so dat una go ebul tink bɔt dɛn tin we dɛn rayt. 2A want mek una mɛmba dɛn tin we Gɔd in prɔfɛt dɛn bin dɔn tɔk lɔntɛm se go bi, bifo dɛn bi, ɛn dɛn tin we wi Masta we sev wi mek in apɔsul dɛn tɛl wi fɔ du. 3Di fɔs tin we a want tɛl una na in dis: wɛn di wɔl want dɔn, pipul go kam we go de laf una ɛn mek una ful. Dɛn go de du wetin dɛn at gi dɛn fɔ du. 4Dɛn go de se, “We di pɔsin we dɛn bin se go kam? Frɔm we wi gra npapa-papa dɛn day te tide natin nɔ chenj na di wɔl; natin nɔ chenj frɔm di tɛm we Gɔd mek di wɔl!” 5Dɛn nɔ want gri tɔk se ɔpklawd ɛn grɔn bin dɔn de frɔm tɛm; Gɔd bin dɔn tɔk se mek dɛn de. Gɔd mek di dray grɔn kɔmɔt na wata ɛn i kip am wit wata, 6ɛn na wata i bin mek kɔba di dray grɔn we bin de lɔntɛm ɛn pwɛl am. 7Bɔt Gɔd in wɔd we bin mek ɔl di wɔl we de naw, kip am fɔ mek i bɔn na faya di de we Gɔd go jɔj dɛn pipul we kin de du dɛn tin we i nɔ lɛk ɛn mek dɛn go na ɛl. 8Mi padi dɛn we a lɛk, una fɔ mɛmba se, wan de, na Gɔd in yay, tan lɛkɛ wan tawzin ia ɛn wan tawzin ia tan lɛkɛ wan de. 9Di Masta nɔ de wes tɛm fɔ du wetin i dɔn se in go du, lɛkɛ aw sɔm pipul tink, bɔt i de bia wit una bikɔs i nɔ want mek ɛnibɔdi go ɛl, bɔt i want mek ɔlman sɔri fɔ dɛn sin ɛn lɛf dɛn. 10Di Masta go kam bak lɛkɛ aw tifman de kam na nɛt. Big nɔys go de da tɛm de ɛn di klawd go lɔs; faya go bɔn ɔl wetin de na di klawd lɛkɛ sta ɛn mun; ɛn dis wɔl ɛn ɔl wetin lib de, go bɔn. 11We ɔltin gɛt fɔ dɔn so, uskayn pipul una fɔ bi? Una fɔ de waka wit Gɔd ɛn du dɛn tin we go mek pipul no se una na Gɔd yon pipul; 12na so una fɔ de du wɛn una de wet fɔ di de we Gɔd go jɔj di wɔl, una fɔ du ɔl wetin una ebul fɔ mek da de de kam kwik, bikɔs da de de, di klawd go bɔn na faya ɛn ɔl wetin de na di klawd go mɛlt. 13Bɔt wi de wet fɔ di nyu ɛvin ɛn di nyu wɔl we Gɔd dɔn tɔk se wi go gɛt; ɔlman go de du wetin rayt insay da wɔl de. 14So, mi padi dɛn we a lɛk, we una de wet fɔ dis nyu ɛvin ɛn dis nyu wɔl ya, una fɔ tray mek Gɔd nɔ fɛn ɛni fɔlt na una layf ɛn una go gɛt kol at fɔseka dat. 15Una fɔ luk se di bia we di Masta de bia wit una na fɔ mek una go gɛt chans fɔ chenj mek una layf go sev. Wi brɔda Pɔl, we wi lɛk, insɛf bin rayt bɔt dis sem tin ya wit di sɛns we Gɔd gi am, 16na ɔl di lɛta dɛn we i rayt una. Sɔm pan dɛn tin ya we Pɔl rayt, at fɔ ɔnda stand, na dɛn tin de dɛn pipul we nɔ sabi natin ɛn we dɛn at nɔ stɛdi wan ples, kin twis. Na semwe dɛn de twis plɛnti ɔda tin we rayt na Gɔd in Buk, bɔt na dat go mek dɛn go ɛl. 17Mi padi dɛn we a lɛk, we una dɔn no dɛn tin ya bifo dɛn bi, una fɔ tek tɛm mek dɛn pipul ya we nɔ de kip Gɔd in lɔ nɔ drɔ una fɔ fala dɛn ɛn mek una yon at nɔ stɛdi. 18Una fɔ lan mɔ ɛn mɔ bɔt wi Masta Jizɔs Krays we sev wi, ɛn una fɔ no aw Gɔd gud mɔ ɛn mɔ. Na in gɛt pawa ɛn ɔna frɔm naw sote go! Emɛn.

will be added

X\