2 PITA 2

1Bɔt sɔm pan dɛn prɔfɛt we bin de lɔntɛm, nɔ bin de tɔk tru; ɛn na so i go bi fɔ unasɛf; sɔm pan dɛn pipul we de lan una bɔt Gɔd nɔ go de tɔk tru; bifo una kechɔp wetin dɛn de du, dɛn go dɔn lan pipul tin we nɔ rayt we go mek dɛn biliv wetin nɔ rayt bɔt Gɔd; dɛn go de tɔk sɛf se nɔto di Masta pe fɔ dɛn layf we i day na di krɔs ɛn dat go mek dɛn lɔs di layf kwik we Gɔd gi dɛn. 2Plɛnti pipul go fala dɛn fɔ liv fri layf, ɛn wetin dɛn de du go mek pipul tɔk bad bɔt di tru rod we fɔ fala. 3Dɛn ticha ya go de lay gi una bikɔs dɛn want una mɔni; bɔt frɔm tɛm na in Gɔd dɔn kɔndɛm dɛn ɛn i go mɔs tek dɛn layf. 4Gɔd nɔ bin sɔri fɔ dɛn enjɛl we bin sin, i trowe dɛn na ɛl, insay big ol we dak pas nɛt, na de i mek dɛn chen dɛn ɛn kip dɛn te di tɛm we i go jɔj dɛn rich. 5Gɔd nɔ bin sɔri fɔ di wɔl we bin de lɔntɛm; i bin mek big big wata kɔba ɔl di pipul dɛn we nɔ bin de du wetin i tɛl dɛn fɔ du. Na Noa nɔmɔ we bin de tɛl pipul fɔ du wetin rayt wit sɛvin ɔda pipul, Gɔd nɔ bin mek di wata kɔba; 6Gɔd bin jɔj tu tɔng, dat na Sɔdɔm ɛn Gomɔra; i bin mek faya bɔn dɛn kam dɔng pata pata. I bin du dat fɔ mek pipul si wetin go bi to dɛn pipul we nɔ de fala in yon we. 7Gɔd nɔ bin mek di faya bɔn Lɔt bikɔs Lɔt bin de du wetin rayt na Gɔd yay ɛn i nɔ bin lɛk di bad tin dɛn we pipul bin de du ɔlɔbɔt. 8Da gud man de bin de wit di ɔda pipul dɛn ɛvri de, ɛn i bin de si ɛn yɛri ɔl wetin dɛn de du ɛn se. We i no se dɛn nɔ bin de du wetin Gɔd tɛl dɛn fɔ du, i bin tɔmɛnt ɛn i bin vɛks. 9Ɔl dis sho se di Masta de pul gud pɔsin pan waala ɛn i de pɔnish dɛn bad pɔsin te di de we i go jɔj dɛn, rich, 10dɛn ticha we de fala dɛn at fɔ du dɔti tin wit dɛn bɔdi ɛn we nɔ de du wetin dɛn wan we de oba dɛn tɛl dɛn fɔ du, na dɛn mɔ Gɔd go pɔnish. Dɛn ticha ya dɛn at tra nga ɛn dɛn de du wetin dɛn ed gi dɛn fɔ du; dɛn nɔ de fred sɛf fɔ tɔk bad bɔt ɔl dɛn wan we de na ɛvin ɛn laf dɛn. 11Dɛn enjɛl sɛf we gɛt trɛnk ɛn pawa pas dɛn ticha ya nɔ de tɔk bad bɔt dɛn ɛn laf dɛn bifo di Masta. 12Bɔt dɛn ticha ya de tɔk bad bɔt tin we dɛn nɔ sabi natin bɔt, ɛn laf dɛn; dɛn jɛs tan lɛkɛ wayl bif na bush we nɔ de tink, dɛn jɛs de du ɛni tin we dɛn ed gi dɛn fɔ du; so jɛs lɛkɛ aw dɛn wayl bif de bɔn kam na wɔl fɔ mek pipul kech dɛn, ɛn kil dɛn, na so pipul go kil dɛn ticha ya, 13ɛn dɛn go sɔfa fɔ di bad we dɛn dɔn du ɔda pipul. Dɛn gladi fɔ du ɛni tin we dɛn lɛk wit dɛn bɔdi, de tɛm. Dɛn de disgres una we una ɔl de it wan ples ɛn di bad we dɛn de du de mek dɛn gladi. 14Pan ɔl we dɛn dɔn mared, dɛn yay de na trit, dɛn nɔ de taya fɔ fala dɛn at fɔ liv fri layf. Dɛn de drɔ dɛn pipul we nɔ gɛt dɛn yon maynd fɔ fala dɛn fɔ du bad. Dɛn jɛs want nɔmɔ fɔ gɛt ɔltin fɔ dɛnsɛf, Gɔd dɔn kɔndɛm dɛn, bɛtɛ nɔ go fala dɛn. 15Dɛn ticha ya dɔn kɔmɔt na di rayt rod so dɛn nɔ no usay dɛn de go igen. Dɛn de waka na di rod we Belam, Bosɔ in pikin, bin de waka; Belam na pɔsin we bin lɛk fɔ du tin we nɔ rayt, fɔ gɛt mɔni, 16bɔt na in yon ɔs tɔk lɛkɛ pɔsin to am ɛn tɛl am mek i tap fɔ du di bad bad tin dɛn we i bin de du lɛkɛ kre sman; na dat mek Belam nɔ du di bad we i bin want du igen. 17Dɛn kayn pipul ya jɛs tan lɛkɛ wɛl we nɔ gɛt wata ɛn lɛkɛ dak klawd we de sho se ren want kam wɛn di ples dray, bɔt big briz blo am go. Gɔd dɔn kip dak dak dak ples fɔ put dɛn. 18Dɛn de bost bost we nɔ min natin ɛn dɛn liv fri layf; na dat dɛn de tek drɔ dɛn pipul we jɛs bigin lɛf dɛn bad we fɔ mek dɛn fala dɛn, fɔ bigin liv bad layf bak. 19Dɛn de tɛl di pipul dɛn we dɛn de drɔ fɔ fala dɛn, se dɛn go fri, bɔt dɛnsɛf nɔ fri yet, dɛnsɛf na lɛkɛ slev to dɛn bad tin we de pwɛl layf; bikɔs if pɔsin nɔ ebul lɛf fɔ du sɔntin, da pɔsin de dɔn bi slev to da tin de. 20If pipul dɔn no wi Masta Jizɔs Krays, ɛn i dɔn pul dɛn kɔmɔt pan dɛn layf we de pwɛl pɔsin na dis wɔl, dɔn dɛn tɔn bak go liv dɛn kayn bad layf de bak ɛn dɛn nɔ ebul lɛf dɛn igen, dɛn layf go bad pas aw i bin tan bifo dɛn no Jizɔs Krays. 21I bin fɔ bɛtɛ mek dɛn nɔ no di rayt we we dɛn fɔ waka, pas fɔ mek dɛn lɛf fɔ fala Gɔd in lɔ, naw we dɛn dɔn no am. 22Dɛn du lɛkɛ wɛn pipul kin pul pare bul se, “Dɔg de tɔn bak go lik in vɔmit, ɔg we dɛn dɔn was dɔn go rol na pɔtɔpɔtɔ bak.”

will be added

X\