GBOO FEAN BƆƐ KƆYINDI KO A 9

1A nɔ gɛt fɔ rayt tɛl una bɔt wetin di Kristiɛn dɛn fɔ sɛn go Judia fɔ ɛp dɛn kɔmpin Kristiɛn. 2Bikɔs a no se una want ɛp, ɛn a dɔn tɔk to di pipul dɛn na Masi do nya, se, “Di Kristiɛn brɔda dɛn na Gris dɔn rɛdi fɔ ɛp una sins las ia.” Plɛnti pan dɛn dɔn bigin ɛp we dɛn yɛri aw una want ɛp bad bad. 3A de sɛn dɛn brɔda ya go to una naw so dat di gud we wi dɔn tɔk bɔt una fɔ di ɛp we una de ɛp nɔ go bi ɛmti tɔk. Bɔt una go rɛdi wit wetin una want gi fɔ ɛp di wok, lɛkɛ aw a bin se. 4If una nɔ rɛdi ɛn di pipul dɛn we kɔmɔt Masi do nya kam wit mi si se una nɔ gɛt natin yet, wi go shem bad bad ɛn una go shem pas wi bikɔs wi bin dɔn shɔ se una go ɛp. 5Na dat mek a bin fil se a mɔs tɛl dɛn brɔda ya fɔ tray go to una bifo misɛf kam, ɛn ɛp una rɛdi wetin una dɔn prɔmis fɔ gi bifo a de rich to una, so di tin we una prɔmis go dɔn rɛdi wɛn a kam ɛn dat go sho se una de gi bikɔs una want fɔ gi, nɔto bikɔs dɛn de fos una fɔ gi. 6Una fɔ mɛmba se pɔsin we nɔ plant plɛnti sid nɔ go gɛt plɛnti tin fɔ pik, bɔt pɔsin we plant plɛnti sid go gɛt plɛnti plɛnti tin fɔ pik. 7So ɔlman fɔ gi wetin i mekɔp fɔ gi, i nɔ fɔ sɔri ɛn i nɔ fɔ jɛs gi nɔmɔ bikɔs dɛn fos am fɔ gi; Gɔd lɛk pɔsin we gladi fɔ gi wetin i de gi. 8Ɛn Gɔd ebul gi una ɔl wetin una nid fɔ gɛt, ɛn mɔ, so dat una go gɛt ɔl wetin una nid fɔ gɛt fɔ unasɛf, ɛn plɛnti mɔ we una go tek ɛp ɔda pipul. 9Lɛkɛ aw dɛn rayt na Gɔd in Buk we dɛn se, “I de gi dɛn wan we nɔ gɛt, plɛnti tin; di gud we i de du go de sote go.” 10Gɔd, we de gi fama sid fɔ plant, ɛn we de gi wi bred fɔ it, go gi una ɔl di sid we una fɔ gɛt, ɛn mek dɛn gro, so aw una gi plɛnti, na so i go mek una gɛt plɛnti ɛn mek una ebul du plɛnti gud mɔ ɛn mɔ. 11So aw Gɔd go de gi una mɔ ɛn mɔ, na so unasɛf go ebul gi mɔ ɛn mɔ, ɛn di pipul dɛn go tɛl Gɔd tɛnki fɔ di tin dɛn we una gi wi fɔ gi dɛn. 12Dis wok we wi de du so nɔ jɛs de mek Gɔd in pipul dɛn gɛt ɔl wetin dɛn fɔ gɛt, i de mek dɛn tɛl Gɔd plɛnti tɛnki. 13Dis wok we una de du, de sho se una biliv Gɔd fɔ tru. Dat go mek di pipul dɛn we wi de gi dɛn tin ya, prez Gɔd, bikɔs una de fala di Gud Nyus we una de tɛl pipul bɔt, ɛn bikɔs una de gi dɛn ɛn ɔda pipul dɛn plɛnti tin. 14Ɛn dɛn go pre fɔ una wit ɔl dɛn at fɔseka dɛn wɔnda ful tin dɛn ya we Gɔd dɔn du fɔ una, we i mek una ebul gi dɛn plɛnti tin. 15Lɛ wi tɛl Gɔd tɛnki fɔ in Pikin we i dɔn gi wi fɔ natin, we wɔnda ful pas ɔl.

will be added

X\