GBOO FEAN BƆƐ KƆYINDI KO A 7

1Mi padi dɛn, Gɔd dɔn mek ɔl dɛn prɔmis ya fɔ wi. So, lɛ wi nɔ du ɛni tin we go mek wi bɔdi ɔ wi spirit nɔ klin, lɛ wi liv fɔ Gɔd nɔmɔ, ɛn lɛ wi sho pipul se wi de fred Gɔd. 2Una at fɔ opin fɔ wi. Wi nɔ du ɛnibɔdi bad, wi nɔ pwɛl ɛnibɔdi in layf, wi nɔ tek adva ntej pan ɛnibɔdi. 3A nɔ de tɔk dɛn tin ya fɔ blem una, bikɔs a bin dɔn tɛl una se una de na wi at ɔltɛm, wi lɛk una bad, so wɛda wi liv ɔ wi day, wi ɔl de togɛda ɔltɛm. 4A shɔ se una nɔ go disapɔynt mi, una de mek mi ed big! Pan ɔl wi waala a stil gɛt kɔrej, a gladi bad bad wan. 5Wɛn wi rich Masi do nya sɛf wi nɔ blo. Waala bin de ɔlsay, pipul bin de mek plaba, wi bin de fred. 6Bɔt Gɔd we de kɔrej dɛn wan we dɛn at pwɛl, kɔrej wi wɛn Taytɔs kam. 7Nɔto we i kam nɔmɔ bɔt na we i tɛl wi aw una tɔk to am, na dat kɔrej wi. I tɛl wi se una want si mi bad bad, i se una sɔri bad fɔ wetin bin bi, ɛn i tɔk igen se una tek ɔp mi biznɛs tra nga wan; so misɛf gladi naw pas aw a bin gladi fɔs. 8If di lɛta we a bin rayt sɛf bin mek una sɔri, a nɔ sɔri we a rayt am. A bin sɔri fɔs we a si se di lɛta mek una sɔri fɔ sɔm tɛm. 9Bɔt a gladi naw, ɛn di gladi we a gladi nɔto bikɔs a mek una sɔri bɔt na bikɔs di sɔri we una sɔri, dɔn mek una chenj, una dɔn lɛf fɔ du dɛn tin we una bin de du we nɔ rayt. Una chenj bikɔs una fil sɔri lɛkɛ aw Gɔd want, so nɔto bad wi du una. 10Wɛn Gɔd mek pɔsin sɔri, dat go mek di pɔsin in at chenj ɛn di pɔsin go sev, ɛn dat nɔto tin fɔ rigrɛt. Bɔt if pɔsin fil sɔri nɔmɔ fɔseka ɛni tin we de na dis wɔl, da kayn sɔri de go mek di pɔsin day go ɛl. 11Luk wetin Gɔd du fɔ una we a mek una fil sɔri: i mek una siryɔs pan wetin una de du ɛn una want pruv fɔ tru se una nɔ gilti! Una bin vɛks bad fɔ di tin we una bin du; una bin fred bikɔs na bad tin una bin du, una bin fil bad; una bin want si mi bad bad; una bin rɛdi ɛnitɛm fɔ pɔnish di pɔsin we du bad! Una du ɔl wetin una ebul fɔ mek ɔltin tret. Ɔl dat dɔn sho mi se a nɔ gɛt ɛni tin fɔ blem una fɔ insay ɔl dis. 12So, ivin we a rayt da lɛta de sɛf, nɔto fɔseka di pɔsin we du bad, ɔ di pɔsin we sɔfa, bɔt na fɔ mek una nɔ dawt bifo Gɔd se una want ɛp wi fɔ tru. 13Na dat mek wi gɛt kɔrej. Pantap di kɔrej we una gi wi, Taytɔs mek wi gladi bikɔs aw una ɔl bin ɛp fɔ tɔk to am, mek i gladi. 14A bin bost bɔt una to am, ɛn una nɔ disapɔynt mi. Wi de tɔk tru to una ɔltɛm. Semwe, una dɔn pruv se di tin we mek a bost bɔt una to Taytɔs, na tru. 15So Taytɔs de lɛk una mɔ ɛn mɔ, we i de mɛmba aw una ɔl bin rɛdi fɔ du wetin i tɛl una, ɛn aw una bin gladi fɔ am wɛn i kam to una ɛn una nɔ bin want du ɛni tin we bin go mek i fil bad. 16A gladi bad we a kin trɔs una pan ɔltin.

will be added

X\