GBOO FEAN BƆƐ KƆYINDI KO A 5

1Wi no se if dis os, we wi tap insay na dis wɔl, we na wi bɔdi, dɔn pwɛl, Gɔd go gɛt os fɔ wi na ɛvin we insɛf mek, ɛn da os de go de sote go. 2Wi de pini naw bikɔs wi want wɛr wi nyu klos, dat is, wi want go na di os we Gɔd mek fɔ wi na ɛvin, 3bikɔs wɛn wi de insay wi os we de na ɛvin, wi nɔ go de nekɛd. 4Wɛn wi de insay wi os we de na dis wɔl, dat na wi bɔdi, wi de pini lɛkɛ se na ebi ebi lod wi tot; nɔto fɔ se wi want kɔmɔt insay di bɔdi we wi gɛt na dis wɔl, bɔt wi want mek Gɔd put di bɔdi we kɔmɔt ɛvin pan wi, so dat dis bɔdi ya we de day go gɛt layf we go de sote go. 5Na Gɔd dɔn rɛdi dis nyu os fɔ wi ɛn i dɔn gi wi in Spirit fɔ mek wi no fɔ tru se i dɔn gɛt ɔl dɛn tin ya fɔ wi. 6So we wi no dɛn tin ya, wi at nɔ pwɛl. Wi no se ɔl di tɛm we dis wi bɔdi ya na wi os, wi nɔ go na di os we Gɔd kip fɔ wi, yet. 7Na so i bi, bikɔs wi liv bay wetin wi biliv, wi nɔ liv bay wetin wi de si. 8Wi at nɔ de pwɛl ɛn wi bin ivin want kɔmɔt insay dis bɔdi we na wi os go de na wi ɔda os wit di Masta. 9Bɔt, wɛda na dis os wi de ɔ na di os na ɛvin, di tin we wi want pas ɔl na fɔ du dɛn tin we go mek di Masta sati sfay wit wi. 10Wi ɔl gɛt fɔ tinap bifo Krays fɔ mek i jɔj wi. Ɔlman go gɛt wetin i wok fɔ wɛn i bin de na dis layf, if na gud i wok fɔ, i go gɛt gud; if na bad igen, i go gɛt bad. 11Wi no wetin i min fɔ fred Gɔd, so wi de tray fɔ tɔk to ɔda pipul mek dɛnsɛf go fred Gɔd. Gɔd no wi gud wan, ɛn a op se unasɛf ɔnda stand wi gud. 12Wi nɔ de tray fɔ tɛl una igen se wi gud; wi de tray fɔ mek una gɛt rizin fɔ gladi fɔ wi, so dat una go ebul ansa dɛn wan we de mek prawd bɔt wetin dɛn de du ɛn wetin ɔda pɔsin kin si, bɔt wetin de insay dɛn at nɔ gud. 13We wi de tɔk so bɔt wisɛf, nɔto fɔ se wi ed nɔ de, bɔt na fɔ lɛ Gɔd gɛt di prez. If una biliv se wi gɛt sɛns we wi de tɔk so, na fɔ ɛp una mek wi de tɔk so. 14Na di lɛk we Krays lɛk wi de rul wi, bikɔs naw wi si se wan man dɔn day fɔ ɔlman, so dat min se ɔlman dɔn day wit am. 15I day fɔ ɔlman so dat dɛn wan we gɛt layf nɔ go liv fɔ dɛnsɛf nɔmɔ, bɔt dɛn go jɛs liv nɔmɔ fɔ di wan we dɔn day, we Gɔd mek rayz frɔm di grev fɔseka dɛn. 16So wi nɔ fɔ luk ɛnibɔdi igen lɛkɛ aw mɔta lman de luk dɛn. If wi bin de luk Krays fɔstɛm lɛkɛ aw mɔta lman de luk pɔsin, wi nɔ fɔ du so igen. 17Ɛnibɔdi we gɛt wanwɔd wit Krays, dɔn bi nyu pɔsin, di layf we i bin liv fɔstɛm dɔn dɔn, na nyu layf i liv naw. 18Na Gɔd du ɔl dis, na in mek Krays mek wi bi in padi dɛn, so dat wi go tap fɔ bi pipul we nɔ lɛk am, ɛn di wok we Krays gi wi na fɔ mek wi go mek ɔda padi dɛn fɔ Gɔd. 19Wi de tɛl pipul se Gɔd de mek mɔta lman bi Gɔd in padi dɛn tru Krays. Gɔd nɔ de mak mɔta lman in sin igen fɔ pɔnish am bambay, ɛn i dɔn tɛl wi fɔ tɛl dɛn aw dɛn go bi in padi dɛn. 20So na di mɛsej dis we Krays gi wi fɔ una, lɛkɛ se Gɔd insɛf de tɔk to una; na fɔseka Krays, wi de beg una: una alaw Gɔd mek i mek una tap fɔ bi pipul we nɔ lɛk am, ɛn bi in padi dɛn. 21Krays nɔ bin gɛt sin, bɔt fɔ sev wi, Gɔd put wi sin dɛn pan am, so dat we wi gɛt wanwɔd wit am, ɔltin go rayt bitwin wi ɛn Gɔd.

will be added

X\