GBOO FEAN BƆƐ KƆYINDI KO A 4

1We Gɔd dɔn sɔri fɔ wi ɛn gi wi dis wok ya fɔ du, wi nɔ go gri mek ɛni tin mek wi at pwɛl. 2Wi dɔn lɛf fɔ du dɛn tin we wi bin de ayd fɔ du we bin de mek wi shem; wi de waka tret wit pipul, wi nɔ de twis Gɔd in wɔd; wi no se Gɔd de luk wi, so wi de tɔk ɔl wetin tru bɔt Gɔd, so dat ɔlman go sati sfay se wetin wi de tɔk na di rayt tin. 3If sɔm pan dɛn pipul we de yɛri di Gud Nyus we wi de tɛl dɛn, nɔ ɔnda stand am, na dɛn wan nɔmɔ we de go ɛl. 4Dɛn nɔ biliv wetin wi de tɔk bikɔs Setan dɔn blɛn dɛn yay. I mek dɛn nɔ ebul si di layt we de shayn pan dɛn; da layt de na di Gud Nyus bɔt aw Krays, we na Gɔd in tru pikchɔ, wɔnda ful. 5Nɔto wisɛf wi de tɛl una bɔt; wi de tɛl una se Jizɔs Krays na wi Masta ɛn wi na una savant fɔseka am. 6Gɔd we se, “Layt go kɔmɔt na da say we dak!” na di sem Gɔd mek in layt shayn insay wi at ɛn da layt de we de shayn na Krays in fes, na in de mek wi no aw Gɔd wɔnda ful. 7Dis wɔnda ful layt ɛn pawa we di Spirit de gi, ɛn we mɔni nɔ ebul bay, de insay wi we jɛs tan lɛkɛ kɔntri pɔt. Dat sho se di pawa fɔ kɔntrol ɔltin de na Gɔd in an, i nɔ de na wi an. 8Plɛnti tɛm waala kin mit wi, bɔt i nɔ de sink wi go dɔng; plɛnti tɛm wi kin dawt, bɔt wi at nɔ kin pwɛl. 9Plɛnti pipul nɔ lɛk wi, bɔt ɔltɛm Gɔd de wit wi; tɛm kin kam we pipul kin ib wi dɔng, bɔt dɛn nɔba ebul kil wi. 10Di day we Jizɔs day de na wi bɔdi ɔltɛm, so dat pipul go si in layf na wi bɔdi ɔltɛm. 11Ɔl di tɛm we wi liv na dis layf fɔseka Jizɔs, ɔltɛm wi de na day rod, so dat pipul go si in layf pan wi we na mɔta lman. 12Ɔltɛm wi de na day rod so dat una go gɛt da layf we go de sote go. 13Dɛn rayt na Gɔd in Buk se, “A bin biliv wetin Gɔd tɛl mi, na dat mek a tɔk am.” Wi biliv, so wisɛf de tɔk wetin wi biliv. 14Wi no se Gɔd we mek Masta Jizɔs rayz frɔm di grev go mek wisɛf rayz frɔm wi grev go jɔyn Masta Jizɔs ɛn bring wi, ɛn unasɛf, kam na di ples we i de. 15Ɔl dis na fɔseka una; ɛn as Gɔd de sho mɔ ɛn mɔ pipul aw i gud, dɛn go de tɛl Gɔd tɛnki mɔ ɛn mɔ ɛn sho aw i wɔnda ful. 16Na di rizin dis we mek wi nɔ de gri mek wi at pwɛl ɛn tap fɔ wok. Pan ɔl we wi bɔdi de wes, nyu layf de kam insay wi ɛvri de. 17Di lili sɔfa we wi de sɔfa fɔ dis shɔt tɛm go mek wi gɛt blɛsin ɛn ɔna sote go, ɛn di blɛsin ɛn ɔna go pas di sɔfa we wi de sɔfa naw, fawe. 18Dat bi bikɔs wi dɔn put wi at pan dɛn tin we wi nɔ de si, wi nɔ put am pan dɛn tin we wi de si. Dɛn tin we wi de si nɔ de las, bɔt dɛn tin we wi nɔ de si go de sote go.

will be added

X\