GBOO FEAN BƆƐ KƆYINDI KO A 2

1So a mekɔp se a nɔ go kam igen kam tɛl una tin we go mek una at pwɛl. 2If a mek una at pwɛl, udat go lɛf fɔ kɔrej mi? Na dɛn wan nɔmɔ we a dɔn mek dɛn at pwɛl. 3Na dat mek a bin rayt lɛta to una, a nɔ bin want kam mek di pipul dɛn we fɔ mek a gladi, mek a sɔri. A no se wɛn a gladi, unasɛf go gladi. 4Wɛn a bin de rayt to una, mi at bin ebi ɛn a bin de wɔri bad; a bin de kray sɛf; bɔt nɔto fɔ mek una sɔri, na fɔ mek una no aw a lɛk una ɔl. 5If ɛnibɔdi dɔn du tin we mek in kɔmpin fil bad, nɔto mi i mek fil bad, na una; ɔ mek a se, na sɔm pan una i mek fil bad, bikɔs a nɔ want mek di pɔsin fil bad tumɔs. 6We plɛnti pan una dɔn pɔnish dis pɔsin ya so, dat dɔn du fɔ am. 7Una fɔ padin am naw, ɛn tɔk to am, mek i nɔ fil bad te i nɔ ebul kechɔp insɛf igen. 8Duya, una mek i no se una lɛk am fɔ tru. 9Na dat mek a bin rayt da fɔs lɛta we a bin sɛn to una. A bin want no if una pas una ɛgzam gud; dat na fɔ si if una kin rɛdi ɔltɛm fɔ du wetin a tɛl una fɔ du. 10Wɛn una dɔn padin pɔsin fɔ wetin i du, misɛf go padin di pɔsin. Wɛn a padin am, dat is, if ɛni rizin de fɔ misɛf fɔ padin am, na fɔseka una a de du dat bifo Krays, 11so dat Setan nɔ go ebul una; bikɔs wi no wetin i dɔn mekɔp fɔ du. 12Wɛn a rich Troas fɔ tɛl una di Gud Nyus bɔt Krays, a si se di Masta bin dɔn mek we fɔ mek a wok de. 13Bɔt mi at bin wɔri bad, bikɔs a nɔ bin si wi brɔda, Taytɔs, de. So a tɛl di pipul dɛn de se a de go, dɔn a go Masi do nya. 14Wi tɛl Gɔd tɛnki! We wi gɛt wanwɔd wit Krays, Gɔd de mek wi win ɔltɛm. Gɔd de yus wi fɔ mek ɔl wetin pɔsin fɔ no bɔt Krays prɛd ɔlɔbɔt lɛkɛ swit smɛl. 15Wi tan lɛkɛ swit smɛl we de kɔmɔt pan insɛns we Krays de gi Gɔd; dɛn wan we Gɔd de sev ɛn dɛn wan we de go ɛl, dɛn ɔl de smɛl am. 16Fɔ dɛn wan dɛn we de go ɛl, di sɛnt na sɛnt we de kil; bɔt fɔ dɛn wan we go sev, da sɛnt de na sɛnt we de gi layf. Udat ebul du wok lɛkɛ dis? 17Wi nɔ tan lɛkɛ plɛnti pipul we de tɛl ɔda pipul Gɔd in mɛsej fɔ mek mɔni, bɔt bikɔs na Gɔd sɛn wi, wi de tɔk tret wɔd bifo am wit Krays in pawa.

will be added

X\