GBOO FEAN BƆƐ KƆYINDI KO A 13

1Na di tɔd tɛm dis we a de kam fɛn una. Dɛn rayt na Gɔd in Buk se, “If pɔsin se ɛnibɔdi du bad, tu ɔ tri pɔsin fɔ de we si.” 2A want fɔ tɛl una, we bin dɔn sin, ɛn ɔl dɛn ɔda pipul, sɔntin; a bin dɔn tɛl una wɛn a bin kam fɛn una di sɛkɛn tɛm, ɛn a de tɛl una bak bifo a rich to una: wɛn a kam bak a go pɔnish ɔlman we sin. 3Wɛn a de tɔk, a go pruv se na Krays de tɔk to una. Krays nɔ wik, in pawa big insay una. 4I nɔ sho in pawa wɛn dɛn bin mek i day na di krɔs, bɔt Gɔd in pawa mek i gɛt layf. Bikɔs wi gɛt wanwɔd wit Krays, i tan lɛkɛ se wisɛf nɔ gɛt pawa, bɔt wi ebul wok wit una, bikɔs wi de waka wit Krays bay di pawa we Gɔd de gi wi. 5Una fɔ jɔj unasɛf fɔ si if una biliv gud gud. Una fɔ no se Jizɔs Krays de insay una. If una nɔ no se Jizɔs Krays de insay una, dat sho se una nɔ biliv. 6A de abop se wi dɔn pruv to una se wi na Kristiɛn, fɔ tru. 7A de pre mek una du wetin rayt ɔltɛm: nɔto fɔ jɛs mek pipul gri fɔ wi, bɔt fɔ mek una du wetin rayt ivin if ɔda pipul tink se wi nɔto tru Kristiɛn. 8Wi nɔ gɛt pawa fɔ du ɛni tin we go pwɛl Gɔd in wɔd, bɔt wi go jɛs du dɛn tin we go ɛp ɔda pipul fɔ fala Gɔd in wɔd. 9Wi go gladi wɛn wi nɔ gɛt pawa, wans nɔmɔ una gɛt pawa. So wi de pre mek Gɔd mek una nɔ gɛt ɛni bɔt na una layf. 10Na dat mek a de rayt dɛn tin ya to una naw bifo a rich de; mek a nɔ go gɛt fɔ dil wit una tra nga wan wɛn a kam to una, pan ɔl we a gɛt di rayt fɔ du so, bikɔs di Masta sɛn mi; ɛniwe, di Masta nɔ sɛn mi fɔ mek a mek una at pwɛl, i sɛn mi fɔ ɛp una. 11Mi brɔda dɛn, na di wɔd dat o! Una fɔ tray fɔ de du wetin rayt ɔltɛm; una fɔ lisin wɛn a de tɔk to una fɔ mek una de du gud, una fɔ gɛt wanwɔd wit una kɔmpin, ɛn una nɔ fɔ de mek plaba. So Gɔd we lɛk ɔlman ɛn we de gi kol at go de wit una. 12We una de tɛl una kɔmpin adu, una fɔ sho se una lɛk dɛn. Ɔl Gɔd in pipul dɛn naya de tɛl una adu. 13Mek Masta Jizɔs Krays sho una aw i gud, mek Gɔd sho una aw i lɛk una, ɛn mek una jɔyn an wit una kɔmpin Kristiɛn lɛkɛ aw Gɔd in Spirit mek una ebul du.

will be added

X\