1 TIMOTI 4

1Gɔd in Spirit dɔn tɔk plen wan se tɛm go kam we sɔm pipul go lɛf fɔ biliv Gɔd; dɛn go de du wetin dɛn spirit we de lay tɛl dɛn fɔ du, ɛn dɛn go de fala wetin dɛbul lan dɛn. 2Na dɛn pipul we de lay, de lan pipul dɛn tin ya i tan lɛkɛ dɛn dɔn bɔn dɛn at na faya ɛn dat mek dɛn nɔ gɛt kɔnshɛns igen. 3Dɛn man ya de tɛl pipul se i nɔ rayt fɔ mared ɛn i nɔ rayt fɔ it sɔm kayn tin dɛn. Bɔt Gɔd mek dɛn tin ya fɔ it, ɛn dɛn pipul we biliv am ɛn no wetin tru, kin it dɛn afta dɛn dɔn pre ɛn tɛl Gɔd tɛnki. 4Ɔltin we Gɔd mek gud, so pɔsin nɔ fɔ luk se sɔm tin dɛn nɔ gud fɔ it, if i dɔn tɛl Gɔd tɛnki. 5Na Gɔd in wɔd ɛn di pre we pɔsin de pre de mek Gɔd put in blɛsin pan di it. 6If yu tɛl wi brɔda dɛn fɔ du dɛn tin ya we a tɛl yu, yu go de du Jizɔs Krays in wok gud, ɛn dat go sho se yu put ɔl yu at pan dɛn tru tin we yu biliv ɛn dɛn tru tin ya we a lan yu, we gud, we yu de fala. 7Nɔ lisin to dɛn stori we nɔ tru ɛn we nɔ de tɔk ɛni tin bɔt Gɔd. Tren yusɛf fɔ liv fɔ Gɔd nɔmɔ. 8I gud fɔ tren di bɔdi, bɔt fɔ tren di spirit gud pas ɔl, bikɔs i go ɛp yu na dis layf ɛn na da layf we go de sote go. 9Na tru wɔd dis we pɔsin fɔ biliv ɛn we i nɔ fɔ dawt at ɔl. 10Na dat mek wi de wok tra nga wan ɛn wi de tray, bikɔs wi abop pan Gɔd we gɛt layf sote go, we de fɔ sev ɔlman, ɛn mɔso, dɛn wan we biliv pan Krays. 11Yu fɔ de lan pipul dɛn tin ya ɛn tɛl dɛn fɔ du dɛn. 12Nɔ mek nɔbɔdi se bikɔs yu smɔl yu nɔ go ebul du dis wok. Na yu fɔ sho dɛn pipul we biliv Gɔd aw dɛn fɔ de du bay aw yu de tɔk, aw yu de du, aw yu lɛk pipul, aw yu biliv Gɔd, ɛn di kayn layf we yu liv. 13Te a kam, yu fɔ de tray ɔltɛm fɔ rid dɛn tin we rayt na Gɔd in Buk bifo ɔlman, fɔ tɔk to pipul bɔt dɛn tin ya ɛn fɔ lan dɛn dɛn tru tin we dɛn fɔ no bɔt Gɔd. 14Nɔ lɛf fɔ du da tin we yu sabi fɔ du, we Gɔd bin mek yu ebul du da tɛm we dɛn prɔfɛt bin tɔk wetin Gɔd tɛl dɛn fɔ yu, ɛn dɛn bigman na chɔch bin put dɛn an pan yu ed ɛn pre fɔ yu. 15Yu fɔ de du dɛn tin ya ɔltɛm ɛn put ɔl yu at pan dɛn, mek ɔlman go si se yu wok de go bifo. 16Yu fɔ bikya ful wetin yu de du ɛn wetin yu de lan pipul. Nɔ fɔ lɛf fɔ du dɛn tin ya; if yu de du dɛn ɔltɛm yu go sev yusɛf ɛn ɔl dɛn wan we de lisin to yu.

will be added

X\