GBOO SAA TƐSADONIKA KO A 5

1A nɔ gɛt fɔ rayt una bɔt di de we di Masta go kam bak, 2bikɔs unasɛf no gud wan se di Masta go kam de we nɔbɔdi nɔ mekɔp, lɛkɛ aw tifman kin kam na nɛt. 3Wɛn pipul se, “Ɔltin rayt, natin nɔ de fɔ fred,” da tɛm de kwik, kwik wan so, na in trɔbul go fɔdɔm pan dɛn. I go jɛs tan lɛkɛ we pen kin krɔs uman we wan bɔn pikin, tɛm we i nɔ mɛmba. Ɔlman go sɔfa. 4Bɔt wi brɔda dɛn, una nɔ tan lɛkɛ dɛn pipul we de na dak, we nɔ no bɔt Gɔd ɛn we de sin, so una nɔ fɔ sɔprayz wɛn di De kam, lɛkɛ aw pipul kin sɔprayz wɛn tifman tif dɛn. 5Una ɔl na pipul we de waka na layt, dat na detɛm. Wi nɔ de lɛkɛ dɛn pipul we de waka na dak, dat na nɛt. 6So wi nɔ fɔ tan lɛkɛ pipul we de slip, lɛkɛ dɛn ɔda pipul, wi fɔ wayda wek ɛn wi fɔ soba. 7Na nɛt pipul de slip ɛn na nɛt drɔnkman dɛn kin drink. 8Bɔt wi we de waka na layt fɔ soba. Wi fɔ biliv Gɔd ɛn lɛk am: dat go tan lɛkɛ se wi wɛr tin fɔ tek gyad di bɔdi. Wi fɔ no se Gɔd dɔn sev wi: dat go tan lɛkɛ se wi wɛr at fɔ mek natin nɔ du wi ed. 9Gɔd nɔ pik wi fɔ mek wi sɔfa di de we i go jɔj wi, i pik wi so dat i go sev wi; na wi Masta Jizɔs Krays du dat. 10Krays day fɔseka wi so dat wi go liv wit am, wɛn i kam bak if wi dɔn day ɔ if wi nɔ day yet. 11So una fɔ stil de kɔrej ɛn ɛp una kɔmpin Kristiɛn dɛn, lɛkɛ aw una de du naw. 12Wi brɔda dɛn, wi de beg una fɔ rɛspɛkt una lida dɛn we de wok wit una, dɛn wan we Gɔd dɔn pik fɔ sho una aw una fɔ liv naw we una dɔn bi Kristiɛn ɛn fɔ tɛl una wetin fɔ du. 13Una fɔ rɛspɛkt dɛn ɛn lɛk dɛn fɔ ɔl di wok we dɛn de du. Una nɔ fɔ mek plaba wit una kɔmpin. 14Wi brɔda dɛn, wi de beg una fɔ tɛl dɛn pipul we nɔ want du natin se dat nɔ rayt, una fɔ kɔrej dɛn pipul we de fred, una fɔ ɛp dɛn pipul we nɔ ɔnda stand Gɔd biznɛs gud, ɛn una fɔ bia wit ɔlman. 15Una nɔ fɔ gri mek ɛnibɔdi tɔn bad gi pɔsin we bin dɔn du am bad, bɔt una fɔ de tray ɔltɛm fɔ du gud to una kɔmpin Kristiɛn dɛn ɛn to ɔlman. 16Una fɔ sho pipul se una gladi ɔltɛm, 17una fɔ de pre ɔltɛm, 18ɛn una fɔ tɛl Gɔd tɛnki ɔltɛm fɔ ɔltin. Na so Gɔd want mek una we gɛt wanwɔd wit Jizɔs Krays, liv. 19Una nɔ fɔ mek Gɔd in Spirit tap fɔ du in wok insay una; 20wɛn pipul de tɔk dɛn wɔd we Gɔd in Spirit put na dɛn at, una nɔ fɔ tek dɛn mek ple. 21Una fɔ tray ɔl di mɛsej dɛn fɔ no uswan na Gɔd yon. Una fɔ tek di wan we gud. 22Una nɔ fɔ du ɛni tin we bad. 23Mek Gɔd we de gi wi kol at mek una tan lɛkɛ insɛf, ɛn mek i kip una spirit, layf, ɛn bɔdi klin so dat wɛn wi Masta Jizɔs Krays kam bak, i nɔ go gɛt ɛni tin fɔ jɔj una fɔ. 24Gɔd we kɔl una fɔ bi in yon pipul go du dat fɔ una, bikɔs i de du ɔl wetin i prɔmis. 25Wi brɔda dɛn, una pre fɔ wi. 26Una tɛl ɔl di Kristiɛn dɛn adu we go sho se una lɛk dɛn bad. 27A de tɛl una fɔ rid dis lɛta to ɔl di Kristiɛn dɛn, bikɔs na dat di Masta insɛf want una fɔ du. 28A de pre mek Jizɔs Krays we na wi Masta sho una aw i gud ɛn aw i lɛk una.

will be added

X\