GBOO SAA TƐSADONIKA KO A 3

1I rich tɛm we wi nɔ ebul bia igen bikɔs wi nɔ de klos una, so wi mekɔp se wi go lɛf na Atɛns ɛn Timoti go go to una. 2Timoti na wi brɔda. Na wi ɔl de du Gɔd wok, insɛf de tɛl pipul di Gud Nyus bɔt Krays. Wi sɛn am fɔ kɔrej una ɛn ɛp una fɔ biliv mɔ ɛn mɔ pan Krays, 3so dat una nɔn nɔ go tap fɔ biliv Krays pan ɔl we pipul de mek una sɔfa fɔseka dat. Unasɛf no se na Gɔd gri fɔ mek dɛn pipul ya mek wi sɔfa. 4Di tɛm we wi bin de wit una, wi bin dɔn tɛl una se tɛm go kam we pipul go mek wi sɔfa; ɛn unasɛf no se na dat de bi naw. 5Na dat mek a sɛn Timoti fɔ fɛnɔt if una stil biliv pan Krays. A nɔ bin ebul bia igen we a nɔ yɛri ɛni tin frɔm una. A bin de wɔri se sɔntɛm Setan dɔn gɛt una ɛn ɔl wi lebɔ dɔn go fɔ natin. 6Bɔt Timoti dɔn tɔn bak ɛn i dɔn tɛl wi nyus we mek wi gladi. I tɛl wi se una biliv pan Krays ɛn una stil lɛk una kɔmpin Kristiɛn dɛn. I tɛl wi se una kin gladi ɔltɛm we una mɛmba wi, ɛn unasɛf angri fɔ si wi jɛs lɛkɛ aw wi angri fɔ si una. 7Wi brɔda dɛn, pan ɔl di trɔbul we de mit wi ɛn di sɔfa we wi de sɔfa, wɛn wi mɛmba se una biliv pan Krays, wi at nɔba pwɛl, wi kin gladi. 8Bikɔs una nɔ gri mek ɛni tin mek una tap fɔ waka wit di Masta, wi gladi fɔ de na dis layf. 9Wi kin tɛl Gɔd tɛnki naw fɔ una. Wi tɛl am tɛnki fɔ di gladi we wi kin gladi wɛn wi kam bifo am fɔ pre fɔ una, bikɔs una stil biliv pan am. 10De ɛn nɛt wi de aks am wit ɔl wi at fɔ mek wi go si una fes to fes, ɛn ɛp una fɔ biliv Krays lɛkɛ aw una fɔ biliv am pan ɔltin. 11A de pre mek Gɔd insɛf we na wi Papa ɛn wi Masta Jizɔs opin di rod fɔ wi fɔ go to una. 12Lɛ di Masta mek una lɛk una kɔmpin Kristiɛn dɛn ɛn ɔl dɛn ɔda pipul wit ɔl una at lɛkɛ aw wi lɛk una. 13Dat go mek di Masta gi una kɔrej so dat wɛn una go tinap bifo Gɔd we na wi Papa, di tɛm we Masta Jizɔs go kam bak wit ɔl in yon pipul dɛn, una go bi lɛkɛ aw Gɔd want una fɔ bi.

will be added

X\