1 PITA 5

1Mi, Pita, na wan pan dɛn bigman na chɔch we de sho pipul di wok we dɛn fɔ du. A si we Krays de sɔfa wit mi yon yay, ɛn a no se misɛf go de wit am di tɛm we i go kam bak, wɛn Gɔd go mek ɔlman si in pawa ɛn misɛf go gɛt pan da big blɛsin de. A de beg una dɛn bigman na chɔch. 2Una fɔ kia fɔ dɛn pipul we Gɔd lɛf na una an lɛkɛ shɛpad we de mɛn ship. Una nɔ fɔ du lɛkɛ se na fos dɛn de fos una, una fɔ kia fɔ dɛn wit opin at; ɛn una nɔ fɔ wok fɔ mɔni nɔmɔ, bɔt bikɔs una gladi fɔ wok. 3Una nɔ fɔ de trit dɛn pipul ya we Gɔd gi una fɔ kia fɔ, lɛkɛ slev, bɔt una fɔ de du gud we go mek di pipul dɛnsɛf want fɔ tan lɛkɛ una. 4If una du so, wɛn dɛn shɛpad dɛn edman we na Krays, kam, una go gɛt wɔnda ful krawn we nɔ de pwɛl ɛn we de shayn ɔltɛm. 5Semwe so, una we smɔl fɔ de du wetin dɛn bigman tɛl una fɔ du. Nɔbɔdi nɔ fɔ mek prawd pan in kɔmpin, bɔt una fɔ de ɛp una kɔmpin; lɛkɛ aw dɛn rayt na Gɔd in Buk, we dɛn se, “Gɔd go tɔn in bak pan dɛn pipul we prawd ɛn i go sho dɛn wan we nɔ prawd aw i gud.” 6Una nɔ fɔ prawd, una fɔ mek Gɔd we gɛt pawa kɔntrol una ɛn i go mek pipul rɛspɛkt una wɛn di tɛm we i dɔn mak, rich. 7Una fɔ lɛf ɛni tin we de wɔri una na Gɔd an, bikɔs i want gi una ɔl wetin una fɔ gɛt. 8Una fɔ rɛdi ɔltɛm, ɛn ɔltɛm una fɔ de wach, bikɔs Setan we de fɛt una, de go ɔlɔbɔt lɛkɛ angri layɔn, fɔ fɛn udat in go fɔdɔm pan. 9Una fɔ abop tra nga wan pan Gɔd ɛn una nɔ fɔ gri mek Setan mek una du wetin in want, una fɔ mɛmba se dɛn ɔda pipul ɔlɔbɔt na wɔl we biliv pan Krays lɛkɛ aw unasɛf biliv, dɛnsɛf de sɔfa dɛn sem tin ya we una de sɔfa. 10Bɔt di tɛm we una gɛt fɔ sɔfa nɔ lɔng, ɛn wɛn una dɔn sɔfa dɔn, Gɔd we lɛk una gud gud, go kɔl una fɔ mek unasɛf gɛt pan di pawa ɛn ɔna we insɛf gɛt we go de sote go, bikɔs una gɛt wanwɔd wit Krays. In we du dat, go mek ɔltin bi na una layf lɛkɛ aw i fɔ bi ɛn i go mek una biliv pan am tra nga wan, i nɔ go mek ɛni tin shek di biliv we una biliv pan am. 11Mek i rul oba di wɔl sote go! Emɛn. 12Na Saylas, we a luk se na Kristiɛn brɔda we a kin trɔs, ɛp mi fɔ rayt dis shɔt lɛta to una. A want kɔrej una ɛn a want tɛl una se ɔl wetin Gɔd dɔn du fɔ una sho se i lɛk una, fɔ tru; una nɔ fɔ mek ɛni tin mek una dawt dat. 13Di chɔch pipul dɛn we de na Babilɔn, we tan lɛkɛ una chɔch lili bit, we Gɔd dɔn pik lɛkɛ aw i pik unasɛf, wit Mak, da yɔng man we de ɛp mi, de tɛl una adu. 14Una tɛl una kɔmpin dɛn adu wit ɔl una at, dat go sho se una lɛk unasɛf lɛkɛ aw Kristiɛn dɛn fɔ lɛk dɛnsɛf. Mek una ɔl we na Krays yon pipul gɛt kol at.

will be added

X\