1 PITA 4

1So, bikɔs Krays sɔfa wɛn i day na di krɔs, unasɛf fɔ rɛdi wɛn una de sɔfa, fɔ tink lɛkɛ aw Krays bin de tink ɛnitɛm we i de sɔfa, bikɔs pɔsin we de sɔfa dɔn dɔn wit sin. 2So, frɔm naw sote una day, nɔto una at una fɔ de fala, bɔt na wetin Gɔd want una fɔ du. 3Una nɔ wes mɔ tɛm igen. Di tɛm dɔn pas we una bin de du dɛn tin we dɛn pipul we nɔ no Gɔd lɛk fɔ du. Dɛn man ɛn uman bin de du tin we dɛn nɔ fɔ du wit dɛn bɔdi, una bin de fala una at fɔ du dɛn bad tin ya ɛn ɔda bad tin dɛn, una bin de drɔnk, una bin de mek dɛn wayl wayl pati, ɛn dɛn pati we pipul fɔ go drink sote dɛn drɔnk. Una bin de pre to dɛn tin we mɔta lman mek fɔ pre to pan ɔl we di Lɔ se mek una nɔ du dat, ɛn na tin dat we una fɔ shem fɔ du. 4Dɛn pipul we nɔ no Gɔd, we una ɔl bin kia fri, de wɔnda naw bikɔs una nɔ de jɔyn dɛn igen fɔ liv bad layf; so dɛn de tɛl una tin we fɔ mek una fil bad. 5Bɔt dɛn go gɛt fɔ ansa to Gɔd, we go jɔj dɛn wan we nɔ day yet ɛn dɛn wan we dɔn day, i nɔ go te igen. 6Na dat mek dɛn wan we bin dɔn day sɛf bin dɔn yɛri di Gud Nyus we Krays tɛl dɛn, so dat, pan ɔl we Gɔd bin dɔn jɔj dɛn fɔ wetin dɛn bin du wɛn dɛn de na dis layf, i bin want gi dɛn chans fɔ de wit am na ɛvin. 7Di tɛm we di wɔl go dɔn nɔ fa igen, so una ed fɔ stɛdi ɛn una fɔ wayda wek fɔ de pre ɔltɛm. 8Bɔt di tin we pas ɔl, na fɔ mek una lɛk una kɔmpin wit ɔl una at, bikɔs dɛn pipul we lɛk dɛnsɛf kin rɛdi ɔltɛm fɔ padin dɛn kɔmpin wɛn dɛn kɔmpin du dɛn bad. 9Una fɔ gladi wɛn una kɔmpin Kristiɛn dɛn kam fɛn una, una nɔ fɔ de grɔmbul wɛn dɛn kam. 10Ɛni tin we Gɔd mek una sabi du, una fɔ du am gud, so dat ɔda pipul go bɛni fit, lɛkɛ aw ɛnibɔdi we Gɔd gi sɔntin kin ol am fayn. 11Ɛnibɔdi we de tɛl pipul bɔt Gɔd, fɔ tɔk di mɛsej we Gɔd gi am; ɛn ɛnibɔdi we de ɛp fɔ du ɛni kayn wok, fɔ ɛp fɔ du da wok de wit ɔl di trɛnk we Gɔd gi am, so dat, pan ɔl wetin una de du, Gɔd go gɛt prez bikɔs una de waka wit Krays we wɔnda ful ɛn we gɛt pawa sote go! Emɛn. 12Mi padi dɛn we a lɛk, una nɔ fɔ wɔnda we big big waala de mit una lɛkɛ na tin dat we nɔba bi, 13bɔt una fɔ gladi bikɔs unasɛf de sɔfa lɛkɛ aw Krays bin sɔfa, so dat wɛn Krays kam bak wit ɔl in pawa, una go gladi fawe pas aw una gladi naw. 14Una gɛt blɛsin wɛn pipul tɛl una tin we go at una bikɔs una biliv pan Krays, dat sho se Gɔd in Spirit, we gɛt pawa, de insay una. 15If ɛni wan pan una gɛt fɔ sɔfa mek i nɔ bi se na bikɔs i kil pɔsin ɔ bikɔs i tif ɔ i du ɛni ɔda bad bad tin we dɛn jelman de du, ɔ bikɔs i go put in an pan ɔda pipul biznɛs. 16Bɔt if na fɔseka Krays mek waala mit una, dat nɔ fɔ mek una shem, bɔt una fɔ tɛl Gɔd tɛnki we una na Kristiɛn. 17Di tɛm we Gɔd go jɔj di wɔl nɔ fa igen, ɛn na in yon pipul dɛn fɔs i go jɔj. If Gɔd bigin wit wi we na in yon, aw tin go tan fɔ dɛn wan we nɔ biliv di Gud Nyus we Gɔd sɛn to mɔta lman? 18Dɛn rayt na Gɔd in Buk se, “If i tranga fɔ pipul, we de du wetin Gɔd want, fɔ sev; wetin go bi to dɛn pipul we nɔ bisin bɔt Gɔd, we de pan sin?” 19A tɛl una ɔl dis fɔ mek dɛn pipul we de sɔfa bikɔs dɛn no se na dat Gɔd want, lɛf dɛnsɛf na Gɔd an, ɛn du gud mɔ ɛn mɔ, bikɔs na Gɔd mek dɛn, ɛn i de du ɛni tin we i dɔn prɔmis se in go du.

will be added

X\