1 CHƆN 5

1Ɛni bɔdi we biliv se Jizɔs na di Mɛsaya na Gɔd pikin. Ɛni bɔdi we lɛk di Papa, go lɛk in Pikin. 2Aw wi go no se wi lɛk Gɔd in pikin dɛn, na bay aw wi lɛk Gɔd ɛn aw wi de du wetin i tɛl wi fɔ du. 3We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ tra nga fɔ wi, 4bikɔs ɛni bɔdi we na Gɔd pikin ebul fɔ win di wɔl. Wi ebul fɔ win di wɔl bikɔs wi biliv pan Jizɔs. 5Udat go ebul win di wɔl? Na dɛn pipul nɔmɔ we biliv se Jizɔs na Gɔd in Pikin. 6Jizɔs Krays wan kam na wɔl bay wata ɛn blɔd. I nɔ kam na wɔl bay wata nɔmɔ, i kam bay wata ɛn blɔd. Na Gɔd in Spirit mek wi no se dat na tru bikɔs in Spirit de tɔk tru. 7Na tri witnɛs de: 8Gɔd in Spirit, wata ɛn blɔd; dɛn ɔl tri de tɔk di sem tin. 9If wi kin biliv wetin mɔta lman tɔk, wi fɔ biliv wetin Gɔd tɔk mɔ; Gɔd tɔk bɔt Jizɔs we na in Pikin. 10Ɛni bɔdi we biliv se Jizɔs na Gɔd in Pikin, di tin we Gɔd tɔk de na in at, bɔt if ɛni bɔdi se in nɔ biliv wetin Gɔd tɔk bɔt in Pikin, da pɔsin de de se Gɔd de lay. 11Di tin we Gɔd tɔk, na in dis: Gɔd dɔn gi wi di tru layf we go de sote go, ɛn dis layf ya de wit in Pikin. 12Ɛni bɔdi we gɛt Gɔd in Pikin na in at, gɛt dis tru layf ya; bɔt ɛni bɔdi we nɔ gɛt Gɔd in Pikin na in at, nɔ gɛt di tru layf. 13A de rayt dis lɛta ya to una we biliv pan Gɔd in Pikin fɔ mek una no se una gɛt di tru layf we go de sote go. 14Wi biliv se wɛn wi kam bifo Gɔd ɛn aks am fɔ ɛni tin, i go yɛri wi ɛn gi wi, if na dat in want. 15We wi no se i de yɛri wi wɛn wi aks am fɔ ɛni tin, wi no se i go ansa wi. 16If ɛni bɔdi si in kɔmpin sin ɛn da sin de nɔto sin we go tap am mek i nɔ gɛt layf we go de sote go, i fɔ pre fɔ am ɛn Gɔd go gi am di tru layf. Bɔt di pre we i de pre nɔ go ɛp dɛn pipul we sin da bad bad sin we de mek pɔsin nɔ gɛt layf we go de sote go, ɛn a nɔ se una fɔ pre to Gɔd fɔ dɛn kayn sin de. 17Ɛni bad tin we pɔsin de du na sin, bɔt sin de we nɔ go tap pɔsin mek i nɔ gɛt layf we go de sote go. 18Wi no se ɛni bɔdi we de waka wit Gɔd nɔ de sin, bikɔs Gɔd in Pikin de gyad am ɛn Setan nɔ ebul am. 19Wi no se wi na Gɔd yon pipul, pan ɔl we Setan de rul di ol wɔl. 20Wi no se Gɔd in Pikin dɔn kam ɛn i dɔn gi wi di pawa fɔ no di tru Gɔd. Wi layf de wit di tru Gɔd ɛn wi layf de wit Gɔd in Pikin, Jizɔs Krays. Jizɔs Krays na di tru Gɔd ɛn di tru layf we go de sote go. 21Mi pikin dɛn, una nɔ gɛt natin fɔ du wit dɛn tin we mɔta lman mek fɔ pre to we nɔto di tru Gɔd.

will be added

X\