1 CHƆN 4

1Mi padi dɛn we a lɛk, nɔto ɔl spirit una fɔ biliv, bɔt una fɔ tray di spirit dɛn fɔ no if na to Gɔd dɛn kɔmɔt, bikɔs plɛnti lay prɔfɛt dɛn dɔn kam na di wɔl. 2Una lisin aw una go no if na to Gɔd di Spirit kɔmɔt. If ɛni bɔdi tɔk se Jizɔs Krays bin kam lɛkɛ mɔta lman, Gɔd in Spirit de insay am. 3Bɔt ɛni bɔdi we nɔ tɔk so bɔt Jizɔs Krays, nɔto Gɔd in Spirit de insay am, na di spirit we nɔ lɛk Krays. Una bin dɔn yɛri se dis spirit ya gɛt fɔ kam na wɔl ɛn i de na di wɔl naw naw. 4Mi pikin dɛn, una na Gɔd yon ɛn di lay prɔfɛt dɛn nɔ ebul una, una dɔn win dɛn, bikɔs Gɔd in Spirit we de insay una gɛt pawa pas di spirit we de insay dɛn pipul we na di wɔl yon pipul. 5Dɛn lay prɔfɛt de tɔk bɔt dɛn tin we de na di wɔl, ɛn di pipul dɛn na wɔl de lisin to dɛn bikɔs na dɛn yon prɔfɛt dɛn wan de. 6Bɔt wi na Gɔd yon pipul ɛn ɛni bɔdi we no Gɔd go lisin to wi, bɔt ɛni bɔdi we nɔ no Gɔd nɔ go lisin to wi. Na di we dis we wi go no Gɔd in Spirit we tru ɛn di spirit we de lay. 7Mi padi dɛn we a lɛk, una mek wi lɛk wi kɔmpin bikɔs na Gɔd put lɛk na mɔta lman at. Ɛni bɔdi we lɛk in kɔmpin na Gɔd yon pɔsin ɛn i no Gɔd. 8Ɛni bɔdi we nɔ lɛk in kɔmpin, na pɔsin we nɔ no Gɔd bikɔs Gɔd na di wan we nɔ de tap fɔ lɛk ɔltɛm ɛn na in de lɛk aw pɔsin fɔ lɛk fɔ tru. 9Na di we dis we Gɔd sho wi se in lɛk wi: I sɛn in wan gren Pikin kam na wɔl, so dat in Pikin kin mek wi gɛt layf. 10Wetin na lɛk? Na in dis: Nɔto fɔ se wi lɛk Gɔd, bɔt in lɛk wi ɛn i sɛn in Pikin kam na wɔl fɔ sakri fays insɛf fɔ wi mek i go padin wi sin dɛn. 11Mi padi dɛn we a lɛk, if na so Gɔd lɛk wi, wi fɔ lɛk wi kɔmpin. 12Nɔbɔdi nɔ si Gɔd yet, bɔt if wi lɛk wi kɔmpin, Gɔd de insay wi ɛn di lɛk we Gɔd lɛk wi de mek wi lɛk wi kɔmpin mɔ ɛn mɔ. 13Di tin we mek wi no gud wan se wi de waka wit Gɔd ɛn Gɔd de insay wi, na bikɔs i dɔn put in Spirit insay wi. 14Wisɛf dɔn si in Pikin ɛn wi dɔn tɛl pipul se i sɛn in Pikin fɔ kam sev di wɔl. 15Ɛni bɔdi we tɔk se Jizɔs na Gɔd in Pikin, Gɔd de insay da pɔsin de ɛn da pɔsin de de waka wit Gɔd. 16So wisɛf biliv se Gɔd lɛk wi, ɛn wi dɔn fil di lɛk na wi layf. Gɔd na di wan we nɔ de tap fɔ lɛk ɔltɛm ɛn na in lɛk aw pɔsin fɔ lɛk fɔ tru, ɛn ɛni bɔdi we lɛk Gɔd ɛn mɔta lman, na pɔsin we de waka wit Gɔd ɛn Gɔd de insay am. 17As wi de insay Krays, di lɛk we wi lɛk Krays go de gro mɔ ɛn mɔ, ɛn wi nɔ go wɔri fɔ tinap bifo Gɔd di de we i de jɔj ɔlman na wɔl, bikɔs wi no se na Krays we de insay wi de mek wi liv lɛkɛ aw wi liv na dis wɔl. 18Da say we lɛk de, fred nɔ lib de, bikɔs if pɔsin lɛk fɔ tru, i nɔ de fred. If pɔsin de fred, dat na pɔni shmɛnt i de fred ɛn ɛni bɔdi we de fred, da pɔsin de nɔ lɛk Gɔd lɛk aw i fɔ lɛk am. 19Wi lɛk Gɔd ɛn wi kɔmpin bikɔs na Gɔd fɔs lɛk wi. 20If ɛni bɔdi se in lɛk Gɔd, bɔt i nɔ lɛk in kɔmpin, da pɔsin de de lay. Bikɔs if pɔsin nɔ lɛk in kɔmpin we i de si, aw i go lɛk Gɔd we i nɔ de si? 21Na di tin dis we Krays tɛl wi fɔ du: pɔsin we lɛk Gɔd fɔ lɛk in kɔmpin insɛf.

will be added

X\