1 CHƆN 2

1Mi pikin dɛn, a de rayt una dis lɛta ya fɔ mek una tap fɔ sin; bɔt if ɛni wan pan una sin, Jizɔs Krays we nɔ gɛt sin, de tɔk to in Papa fɔ wi. 2Na bikɔs Krays sakri fays insɛf mek Gɔd de padin wi sin dɛn, ɛn nɔto wi yon sin dɛn nɔmɔ Gɔd de padin, i de padin ɔlman sin. 3If wi gri fɔ du ɔl wetin Gɔd tɛl wi fɔ du, na da tɛm de nɔmɔ wi kin shɔ se wi no Gɔd gud. 4Di pɔsin we de se, “ A no Gɔd,” bɔt i nɔ gri fɔ du wetin Gɔd tɛl am fɔ du, da pɔsin de de lay; i nɔ de tɔk tru. 5Bɔt ɛni bɔdi we de du wetin Gɔd tɛl am fɔ du dɔn sho se in lɛk Gɔd, fɔ tru; na dat wi go tek no fɔ tru se wi na Gɔd yon pipul. 6Ɛni bɔdi we se in de waka wit Gɔd, fɔ liv lɛkɛ aw Jizɔs Krays bin liv. 7Mi padi dɛn we a lɛk, di lɔ we a de rayt tɛl una fɔ kip, nɔto nyu lɔ, na di sem ol lɔ we una bin dɔn gɛt frɔm tɛm. Una bin dɔn yɛri bɔt dis ol Ju lɔ ya. 8Ɛniwe, dis sem lɔ ya nyu bikɔs di daknɛs dɔn go wansay ɛn di tru layt dɔn bigin shayn, una go si se dis nyu lɔ ya na tru we una luk Krays in layf ɛn una sɛf yon. 9Ɛni bɔdi we se in de na di layt, bɔt i nɔ lɛk in kɔmpin mɔta lman, na pɔsin we stil de na dak sote naw. 10Ɛni bɔdi we lɛk in kɔmpin mɔta lman, da pɔsin de de na di layt, so i nɔ go sin, ɛn i nɔ go mek ɔda pɔsin sin. 11Bɔt ɛni bɔdi we nɔ lɛk in kɔmpin mɔta lman, da pɔsin de stil de na dak. I de waka na dak ɛn i nɔ no usay i de go, bikɔs di daknɛs dɔn mek i nɔ ebul si. 12Mi pikin dɛn, a de rayt una bikɔs Gɔd dɔn padin una sin dɛn fɔseka Jizɔs Krays. 13Mi papa dɛn, a de rayt una bikɔs una no di wan we bin dɔn de frɔm we di wɔl bigin. Mi yɔng man dɛn, a de rayt una bikɔs una dɔn win Setan. 14Mi pikin dɛn, a de rayt una bikɔs una no di Papa. Mi papa dɛn, a de rayt una bikɔs una no di wan we bin dɔn de frɔm we di wɔl bigin. Yɔng man dɛn, a de rayt una bikɔs natin nɔ ebul una. Gɔd in wɔd de insay una at ɛn una dɔn win Setan. 15Una nɔ fɔ lɛk di wɔl ɛn put ɔl una at pan dɛn tin we de na di wɔl. If una lɛk di wɔl, dat sho se una nɔ lɛk Gɔd we na di Papa. 16Ɔltin we de na di wɔl di bad we de na pɔsin in at we de mek i put at pan sɔm tin dɛn, dɛn tin we pɔsin kin want bad bad wɛn i si dɛn, ɛn ɔl dɛn tin na di wɔl we de mek pɔsin prawd dɛn nɔn nɔ kɔmɔt to di Papa, na di wɔl dɛn kɔmɔt. 17Di wɔl ɛn ɔltin we lib de we pipul want bad bad go dɔn wan de, bɔt di pɔsin we du wetin Gɔd want go de sote go. 18Mi pikin dɛn, di tɛm we di wɔl go dɔn, dɔn kam klos. Dɛn bin dɔn tɛl una se di wan we nɔ lɛk Krays atɔl gɛt fɔ kam, ɛn plɛnti pipul we nɔ lɛk Krays dɔn kam naw; na dat mek wi no se di tɛm we di wɔl go dɔn, dɔn kam klos. 19Dɛn pipul de nɔto bin wi yon pipul dɛn, na dat mek dɛn lɛf wi go; bikɔs if dɛn na bin wi yon pipul, dɛn bin fɔ de wit wi. Bɔt dɛn lɛf wi so dat ɔlman go no se dɛn nɔn nɔto bin wi yon pipul. 20Bɔt Gɔd in Spirit we Krays gi una, de insay una, so una ɔl no wetin tru bɔt Krays. 21So, nɔto bikɔs una nɔ no wetin tru mek a de rayt to una bɔt Krays, a de rayt bikɔs una no wetin tru bɔt Krays. Una no se lay nɔ gɛt ɛni tin fɔ du wit wetin tru. 22So udat de lay? Na di wan we se Jizɔs nɔto di Mɛsaya, na in na di wan we nɔ lɛk Krays. I nɔ want fɔ gɛt ɛni tin fɔ du wit Gɔd we na di Papa ɛn i nɔ want fɔ gɛt ɛni tin fɔ du wit Gɔd in Pikin. 23Ɛni bɔdi we nɔ want fɔ gɛt ɛni tin fɔ du wit Gɔd in Pikin, nɔ want fɔ gɛt ɛni tin fɔ du wit Gɔd we na di Papa; bɔt ɛni bɔdi we gri fɔ waka wit Gɔd in Pikin, dɔn gri fɔ waka wit Gɔd we na di Papa. 24Di tɛm we una bin jɛs bi Kristiɛn a bin tɛl una sɔntin. Una fɔ kip am na una at. If di tin we una bin dɔn yɛri fɔs tɛm de na una at, dat go mek una gɛt wanwɔd wit Gɔd we na di Papa, ɛn in Pikin. 25Ɛn di tin we Krays insɛf dɔn prɔmis fɔ gi wi, na layf we go de sote go. 26A de rayt una fɔ tɛl una bɔt dɛn pipul we de tray fɔ mek una lɛf fɔ fala di tru we. 27Krays dɔn gi una in Spirit, ɛn wans i de insay una, una nɔ nid fɔ gɛt ɛni bɔdi fɔ lan una ɛni tin bɔt Gɔd, bikɔs Krays in Spirit de lan una ɔltin ɛn ɔl wetin i de lan una na tru, nɔto lay. So una fɔ de wit Krays ɔltɛm lɛkɛ aw in Spirit dɔn lan una fɔ du. 28Mi pikin dɛn, una fɔ de wit Krays ɔltɛm, so dat wɛn i kam bak, wi nɔ go shem fɔ go mit am. 29Una no se Krays de du wetin rayt ɔltɛm, so una fɔ no se ɛni bɔdi we de du wetin rayt na Gɔd pikin.

will be added

X\