GBOO SAA KƆYINDI KO A 6

1If ɛni wan pan una gɛt plaba wit in kɔmpin Kristiɛn, na bad bad tin fɔ mek i kɛr am go bifo dɛn jɔj we nɔ sabi Gɔd, bifo dat, i fɔ mek Gɔd pipul tɔk di kes fɔ dɛn. 2Una nɔ no se di tɛm de kam we Gɔd in pipul dɛn go jɔj di wɔl? Wɛl, if na una go kam jɔj di wɔl, una nɔ go ebul jɔj dɛn smɔl kes ya? 3Una no se na wi go gɛt fɔ jɔj dɛn enjɛl? If wi go jɔj enjɛl, na dɛn kes we de na dis layf na in wi nɔ go ebul jɔj? 4So, wɛn una gɛt dɛn kes de, una fɔ kɛr dɛn go bifo pipul we nɔto Kristiɛn? 5Dat fɔ mek una shem! Una nɔ go tɛl mi se wan pɔsin sɛf pan una nɔ de we gɛt sɛns fɔ tɔk di kes wɛn tu Kristiɛn mek plaba? 6Bifo dat, Kristiɛn de kɛr in kɔmpin go kot mek dɛn wan we nɔ biliv Gɔd go jɔj di kes fɔ dɛn. 7We una de mek plaba sɛf te una gɛt fɔ go kot, dat sho se una nɔ de klos Gɔd atɔl. I nɔ bin fɔ bɛtɛ fɔ mek pipul du una bad? Ɔ mek dɛn tek una prɔpati? 8Bifo dat, na unasɛf de du una kɔmpin bad, na unasɛf de tek una kɔmpin prɔpati, una de du dɛn tin ya to una yon Kristiɛn brɔda dɛn. 9A shɔ se una no se nɔ bad pɔsin nɔ go go na di say we Gɔd de rul. Una nɔ mek unasɛf ful; dɛn pipul we liv bad layf, dɛn wan we de pre to dɛn tin we mɔta lman mek fɔ pre to, dɛn wan we de lɛf dɛn wɛf ɔ man go kip ɔda man ɔ uman, dɛn man we de kip dɛn kɔmpin man ɛn dɛn uman we de kip dɛn kɔmpin uman, 10dɛn wan we de tek dɛn kɔmpin prɔpati, dɛn wan we want ɔltin fɔ dɛnsɛf, dɛn wan we de drɔnk, dɛn wan we de tɔk bad bɔt ɔda pipul, ɛn dɛn wan we de tif: dɛn nɔn nɔ go go na di say we Gɔd de rul. 11Sɔm pan una bin tan lɛkɛ dɛn pipul ya we a jɛs tɔk bɔt so. Bɔt Masta Jizɔs Krays dɔn pul una sin kɔmɔt pan una; Jizɔs Krays dɔn gi una to Gɔd; Masta Jizɔs Krays ɛn Gɔd in Spirit dɔn mek ɔltin rayt bitwin una ɛn Gɔd. 12Pɔsin kin se, “A kin du ɛni tin we a lɛk, nɔbɔdi nɔ go tap mi.” Dat na tru, bɔt nɔto ɔltin we pɔsin de du gud fɔ am. Misɛf kin se, “A kin du ɛni tin we a lɛk, nɔbɔdi nɔ go tap mi,” bɔt a nɔ go mek ɛni tin we a de du tɔn mi to slev so dat a nɔ ebul fɔ lɛf am igen. 13Ɔda pɔsin go se, “It na fɔ bɛlɛ, bɛlɛ na fɔ it.” Na so i bi, bɔt Gɔd kin mek it dɔn ɛn i kin mek bɛlɛ pwɛl. Gɔd nɔ mek mɔta lman bɔdi fɔ mek i liv fri layf, i mek mɔta lman fɔ du wetin in want wit in bɔdi; Gɔd insɛf de du ɔl wetin gud fɔ di bɔdi. 14Gɔd go tek in pawa mek wi rayz frɔm di grev lɛkɛ aw i mek di Masta rayz frɔm di grev. 15Una no se una bɔdi dɛn na difrɛn difrɛn pat pan Krays in bɔdi. A go tek ɛni pat pan Krays in bɔdi put am pan wan rare gyal? Dat nɔ pɔsi bul! 16Una nɔ no se ɛni man we mek in bɔdi miks wit rare gyal bɔdi, in ɛn di uman yon bɔdi dɔn bi wan? Dɛn rayt plen wan na Gɔd in Buk se, “Di tu pipul dɛn bɔdi go bi wan.” 17Bɔt pɔsin we jɔyn insɛf to di Masta, ɛn i de du wetin i tɛl am fɔ du, in ɛn di Masta go bi wan. 18Una nɔ fɔ liv fri layf. Ɛni ɔda tin we pɔsin de du we na sin nɔ go ambɔg in bɔdi lɛkɛ aw pɔsin we liv fri layf de ambɔg in yon bɔdi. 19Una nɔ no se una bɔdi na di os we Gɔd in Spirit tap? Una no se na Gɔd gi una in Spirit. Una nɔto una yon prɔpati, una na Gɔd yon prɔpati. 20Gɔd pe dia fɔ una we Krays day na di krɔs. So una fɔ mek Gɔd gɛt di prez bay aw una de yus una bɔdi.

will be added

X\