GBOO SAA KƆYINDI KO A 5

1Pipul dɔn bigin de tɔk sɛf se di layf we dɛn man ɛn dɛn uman na una chɔch liv, so bad dat dɛn wan we nɔ no Gɔd sɛf nɔ liv da layf de; a yɛri se wan man ɛn in stɛpmama de. 2So a nɔ no wetin fɔ mek una prawd. Na sɔri una fɔ sɔri, ɛn dɛn fɔ pul di man we liv lɛkɛ dat kɔmɔt to una. 3Fɔ mi yon pat, pan ɔl we a nɔ de klos una, mi at de wit una; na Masta Jizɔs in nem a dɔn tek kɔndɛm di man we du dis bad bad tin, jɛs lɛkɛ aw a bin fɔ du if a bin de wit una. 4Wɛn una mit ɛn mi at de wit una, ɛn Masta Jizɔs in pawa de wit wi, 5una fɔ tek dis man ya gi Setan we go mek i sɔfa fɔ ɔl dɛn bad tin we de na in at, so dat di de we di Masta go kam, da man de in spirit go gɛt chans fɔ sev. 6Di prawd we una prawd nɔ rayt! Una no se dɛn kin se, “Na lili bit yist nɔmɔ de mek ɔl di bred rayz.” 7Una fɔ pul una sin we tan lɛkɛ yist kɔmɔt na una layf, mek una layf go klin. Da tɛm de una go jɛs tan lɛkɛ bred we nɔ gɛt yist, ɛn a no se na so una tan. Krays na di ship we dɛn dɔn sakri fays fɔ wi yon Pasova. 8So lɛ wi ɔl gladi fɔ dis Pasova ya. Wɛn wi de gladi, wi nɔ fɔ it bred we gɛt bad yist, da yist de na sin ɛn bad layf, wi fɔ it bred we nɔ gɛt yist, da bred de na klin ɛn tret layf. 9A bin rayt tɛl una se, una nɔ fɔ gɛt ɛni tin fɔ du wit pipul we liv bad layf. 10A nɔ min dɛn pipul we nɔ no Gɔd, we liv bad layf, we want ɔltin fɔ dɛnsɛf, we de tif, we de pre to dɛn tin we mɔta lman mek fɔ pre to. If una nɔ want fɔ gɛt ɛni tin fɔ du wit dɛn, una fɔ jɛs kɔt unasɛf frɔm pipul na di wɔl wantɛm! 11A min se una nɔ fɔ gɛt natin fɔ du wit ɛnibɔdi we kɔl insɛf una Kristiɛn brɔda, we liv bad layf, we want ɔltin fɔ insɛf, we de pre to dɛn tin we mɔta lman mek fɔ pre to, ɛn we de gi pipul bad nem; we de drɔnk ɛn we de tif. Una nɔ fɔ sidɔm sɛf fɔ it wit pɔsin lɛkɛ dat. 12Afta ɔl, nɔto mi biznɛs fɔ jɔj dɛn wan we nɔ de wit wi. Na Gɔd go jɔj dɛn. Bɔt una fɔ jɔj dɛn wan we una ɔl de du Gɔd wok togɛda. Dɛn rayt na Gɔd in Buk se, “Pul di pɔsin we nɔ gud kɔmɔt to una.”

will be added

X\