GBOO SAA KƆYINDI KO A 3

1Mi Kristiɛn brɔda dɛn, a nɔ bin go tɔk to una lɛkɛ aw a de tɔk to dɛn pipul we gɛt Gɔd in Spirit, bɔt a gɛt fɔ tɔk to una lɛkɛ dɛn pipul na wɔl we nɔ gɛt Gɔd in Spirit, lɛkɛ dɛn bebi we nɔ ɔnda stand Krays in yon we yet. 2Na milk a bin de gi una fɔ drink, nɔto bif a bin de gi una fɔ it, bikɔs una nɔ bin rɛdi fɔ dat yet. Una nɔ rɛdi fɔ am naw sɛf, 3bikɔs una de du lɛkɛ se una nɔ gɛt Gɔd in Spirit yet. Na dat mek una nɔ lɛk fɔ si bɛtɛ fala una kɔmpin, una de mek plaba wit una kɔmpin, ɛn una nɔ gɛt wanwɔd! Una de du lɛkɛ dɛn pipul we nɔ gɛt Gɔd in Spirit! 4Sɔm pan una de se una de fɔ Pɔl, sɔm de se na Apɔlɔs dɛn de fɔ; dat nɔ sho se una tan lɛkɛ dɛn pipul we nɔ gɛt Gɔd in Spirit? 5Afta ɔl, udat na Apɔlɔs? Udat na Pɔl? Wi na Gɔd in savant dɛn we de tɔk bɔt Gɔd to una mek una biliv pan Jizɔs, na di wok we Gɔd gi Apɔlɔs, ɛn na di wok we Gɔd gi misɛf fɔ du, na in wi de du. 6Na mi plant di sid na una at; na Apɔlɔs wata am; bɔt na Gɔd mek i gro. 7Di wan we de plant sid ɛn di wan we de wata am nɔ mata; na Gɔd we de mek i gro, impɔtant pas ɔl. 8Nɔbɔdi nɔ bɛtɛ pas in kɔmpin, di wan we plant ɔ di wan we wata; ɔlman go gɛt di pe fɔ di wok we i du. 9Wi ɔl dɔn jɔyn an fɔ du Gɔd in wok; na una na di fil we Gɔd de wok pan. Una na di os we Gɔd de bil. 10Gɔd gi mi wok fɔ du, dat na fɔ bi masta man fɔ bil. We na so i bi, a dɔn le di fawndeshɔn na una at, ɔda pɔsin de bil pantap am. Bɔt lɛ ɔlman tek tɛm wetin i de tek bil pantap. 11Gɔd dɔn le wan gren fawndeshɔn we na Jizɔs Krays; nɔbɔdi nɔ fɔ le ɔda wan. 12Sɔm pipul go tek gold ɔ silva ɔ dɛn fayn fayn ston lɛkɛ dayamɔn bil pan dis fawndeshɔn ya; ɔda pipul go tek bod ɔ grin gras ɔ dray gras, bil. 13Di kayn wok, gud ɔ bad, we ɔlman du, nɔ go ayd di de we Gɔd go jɔj ɔlman. Da de de na faya Gɔd go tek tɛst ɔlman wok fɔ si uskayn wok i bi, if na gud ɔ bad wok. 14If di tin we pɔsin tek bil pan di fawndeshɔn nɔ bɔn na di faya, di pɔsin go gɛt gud pe fɔ in wok. 15Bɔt if i bɔn na di faya, na lɔsis fɔ di pɔsin we du di wok; da pɔsin de insɛf go sev, bɔt na lɛkɛ pɔsin we manej kɔmɔt na faya we i bin fɔ bɔn insay. 16Una nɔ no se una na Gɔd in Os ɛn Gɔd in Spirit tap insay una? 17If ɛnibɔdi put dɔti insay Gɔd in Os, we i sin, Gɔd go pɔnish da pɔsin de bad, bikɔs Gɔd in Os na klin ples ɛn i nɔ de fɔ ɔda tin pas Gɔd biznɛs, na una na da os de. 18Mek nɔbɔdi nɔ mek insɛf ful. If ɛnibɔdi tink se in gɛt sɛns na dis wɔl, mek i put in yon sɛns wansay, so dat i go gɛt di tru sɛns. 19Dis wɔl sɛns na nɔnsɛns to Gɔd. Dɛn rayt na Gɔd in Buk se, “Mɔta lman yon sɛns na di trap we Gɔd de tek kech am.” 20Dɛn rayt igen se, “Di Masta no wetin dɛn wan we tink se dɛn gɛt sɛns de tink, ɛn wetin dɛn de tink nɔ min natin.” 21Na dat mek, nɔbɔdi nɔ fɔ bost bɔt wetin in kɔmpin mɔta lman kin du. Ɔltin na una yon: 22Pɔl, Apɔlɔs, Pita, dis wɔl o, layf o, day o, dɛn tin we de naw, ɛn dɛn tin we go de bambay: dɛn ɔl na una yon, 23ɛn una na Krays yon ɛn Krays na Gɔd yon.

will be added

X\