GBOO SAA KƆYINDI KO A 14

1So una fɔ tray fɔ lɛk una kɔmpin mɔta lman pas ɛni ɔda tin. Una fɔ tray mek una gɛt dɛn tin we Gɔd de gi pɔsin fɔ mek di pɔsin ebul du in wok; di wan we una fɔ tray fɔ pas ɔl na fɔ mek una ebul tɔk wɔd we Gɔd insɛf tɛl una fɔ tɔk. 2Di pɔsin we ebul tɔk langwej we insɛf nɔ ɔnda stand, nɔ de tɔk to in kɔmpin mɔta lman, na Gɔd i de tɔk to bikɔs in kɔmpin mɔta lman nɔ de ɔnda stand am. Bay di pawa we Gɔd in Spirit gi am, i de tɔk dɛn tru tin we pipul nɔ no. 3Bɔt di pɔsin we de tɔk wɔd we Gɔd tɛl am fɔ tɔk, de tɔk to in kɔmpin mɔta lman ɛn i de ɛp dɛn, i de kɔrej dɛn, i de mek dɛn at nɔ pwɛl. 4Di pɔsin we de tɔk langwej we insɛf nɔ ɔnda stand de ɛp insɛf nɔmɔ fɔ kam klos Gɔd, bɔt di wan we de tɔk wɔd we Gɔd tɛl am fɔ tɔk, de ɛp di wan ol chɔch. 5A lɛk mek una ɔl de tɔk langwej we unasɛf nɔ ɔnda stand, bɔt wetin a lɛk pas dat na fɔ lɛ Gɔd mek una ɔl ebul fɔ tɔk wɔd we i tɛl una fɔ tɔk. Di pɔsin we de tɔk wɔd we Gɔd tɛl am de ɛp di chɔch mɔ pas di wan we de tɔk langwej we insɛf nɔ ɔnda stand, pas nɔmɔ if pɔsin de we de ɛksplen wetin i de tɔk so dat di wɔd we i de tɔk kin ɛp di chɔch. 6So, mi kɔmpin Kristiɛn dɛn, wɛn a kam to una, if a bigin tɔk langwej we misɛf nɔ ɔnda stand ɛn we una nɔ ɔnda stand, aw dat go ɛp una? Nɔ we nɔ de we a go ɛp una, pas nɔmɔ a tɛl una tin we Gɔd sho mi, ɔ tin we i mek a sabi, ɔ tin we i tɛl mi, ɔ tin we una fɔ lan bɔt am. 7If pɔsin de ple flut ɔ ap sɛf we nɔ gɛt layf, aw in kɔmpin dɛn go no wetin i de ple, if i nɔ de ple dɛn gud? 8Ɔ if pɔsin we de blo bigul fɔ wa, nɔ blo am klia wan, udat go rɛdi fɔ go fɛt? 9Semwe, aw pɔsin go ɔnda stand wetin una de tɔk if una de tɔk dɛn langwej we unasɛf nɔ ɔnda stand? Una wɔd dɛn go jɛs lɛf na briz! 10Plɛnti difrɛn langwej de na di wɔl, bɔt nɔn nɔ de we nɔ gɛt minin. 11Bɔt if a nɔ de ɔnda stand di langwej we pɔsin de tɔk, di pɔsin we de tɔk am go bi tre nja to mi, misɛf go bi tre nja to am. 12Una want bad bad wan mek Gɔd in Spirit gi una ɔl dɛn tin we i de gi, so una fɔ tray fɔ gɛt dɛn tin we Gɔd de gi we go mek una ɛp di chɔch. 13Di man we de tɔk dɛn langwej we insɛf nɔ ɔnda stand fɔ pre mek Gɔd mek i ebul ɛksplen wetin i de tɔk. 14If a pre wit dɛn langwej ya, mi spirit de pre fɔ tru, bɔt a nɔ de tink bɔt wetin a de tɔk, ɛn a nɔ de ɔnda stand wetin a de tɔk. 15So wetin a fɔ du? A go pre wit mi spirit, bɔt semwe so a go tink bɔt wetin a de pre: a go sing wit mi spirit, bɔt semwe so a go tink bɔt wetin a de sing. 16Wɛn una tɛl Gɔd tɛnki wit una spirit nɔmɔ, aw pɔsin we kam chɔch, bɔt we nɔ sabi bɔt dɛn tin ya, go se “Emɛn” wɛn una dɔn dɔn? Aw i go sabi wetin una de tɔk bɔt? 17If na tɛnki sɛf una de tɛl Gɔd, una nɔ de ɛp di pɔsin we de lisin atɔl. 18A tɛl Gɔd tɛnki we a de tɔk dɛn langwej we misɛf nɔ ɔnda stand pas ɛni wan pan una. 19Bɔt wɛn wi de pre na chɔch, a fil se, i bɛtɛ mek a tɔk fayv wɔd we pipul go ɔnda stand, ɛn we go mek dɛn lan sɔntin, pas fɔ tɔk tɛn tawzin wɔd na langwej we dɛn nɔ ɔnda stand. 20Mi kɔmpin Kristiɛn dɛn, una nɔ fɔ de tink lɛkɛ pikin, una fɔ tan lɛkɛ pikin wɛn i kam pan bad, bɔt una fɔ tink lɛkɛ big man. 21Dɛn rayt na Gɔd in Buk se, “Gɔd we na wi Masta se, a go mek pipul we kɔmɔt ɔda kɔntri tɔk to dɛn pipul ya langwej we dɛn nɔ ɔndastand, ɛn pan ɔl dat dɛn nɔ go yɛri mi.” 22So, we Gɔd mek pɔsin ebul tɔk langwej we insɛf nɔ ɔnda stand, na fɔ sho di pɔsin we nɔ biliv se in gɛt pawa, nɔto fɔ di pɔsin we biliv Gɔd; bɔt we Gɔd mek pɔsin ebul tɔk wɔd we i tɛl am fɔ tɔk, na fɔ mek di pɔsin we biliv Gɔd si in pawa, nɔto fɔ di pɔsin we nɔ biliv Gɔd. 23So, if di wan ol chɔch gɛda, dɛn ɔlman stat fɔ tɔk langwej we dɛnsɛf nɔ ɔnda stand, if dɛn pipul we nɔ no bɔt dɛn kayn tin ya, ɛn dɛn wan we nɔ biliv Gɔd kam insay di chɔch, dɛn nɔ go se una ɔl kres? 24Bɔt if ɔlman de tɔk di mɛsej we Gɔd gi am fɔ tɔk, wɛn dɛn pipul we nɔ no bɔt dɛn kayn tin ya ɔ dɛn wan we nɔ biliv Gɔd kam insay di chɔch, wɛn dɛn yɛri wetin una de tɔk, dɛn go biliv fɔ tru se dɛn de pan sin. Ɔl wetin dɛn yɛri go mek dɛn jɔj dɛnsɛf. 25Dɛn go no ɔl dɛn tin we ayd insay dɛn at, so dɛn go fɔdɔm na grɔn ɛn pre to Gɔd; dɛn go se, “Fɔ tru, Gɔd de wit una naya!” 26Mi Kristiɛn brɔda dɛn, na di tin dis we a min: wɛn una gɛda fɔ pre, wan man go gɛt sing fɔ sing; ɔda wan go gɛt sɔntin we i fɔ lan in kɔmpin dɛn; Gɔd go sho ɔda wan sɔntin fɔ tɛl in kɔmpin dɛn; ɔda wan go tɔk wɔd na langwej we insɛf nɔ ɔnda stand; ɔda pɔsin go ɛksplen wetin i se. Ɔl dɛn tin ya na fɔ ɛp di chɔch. 27If sɔm pipul gɛt fɔ tɔk dɛn langwej we dɛn nɔ ɔnda stand, mek dɛn nɔ pas tu ɔ tri, wan afta in kɔmpin, ɛn sɔmbɔdi fɔ ɛksplen wetin dɛn tɔk. 28Bɔt if pɔsin nɔ de fɔ ɛksplen, dɛn dɛn pipul ya we de tɔk langwej we dɛnsɛf nɔ ɔnda stand nɔ fɔ tɔk natin na di mitin, dɛn fɔ tɔk na dɛn at nɔmɔ ɛn tɔk to Gɔd. 29Tu ɔ tri pipul we Gɔd gi mɛsej fɔ tɔk di mɛsej, ɛn ɔda pipul fɔ lisin fɔ no if na Gɔd in mɛsej fɔ tru dɛn de tɔk. 30Bɔt if Gɔd sɛn mɛsej to pɔsin we de na di mitin, di pɔsin we bin de tɔk fɔs fɔ tap. 31Una ɔl kin tɔk di mɛsej we Gɔd gi una, wan bay wan, so dat ɔlman go lan ɛn ɔlman go tek kɔrej. 32Pɔsin we Gɔd gi di pawa fɔ tɔk in mɛsej fɔ ebul kɔntrol wetin i de tɔk, 33bikɔs Gɔd nɔ want mek wi we i kɔl fɔ du in wok, kɔnfyus pan ɛni tin we wi de du. I want mek ɔltin waka fayn. Lɛkɛ aw i de bi na ɔl dɛn chɔch, 34dɛn uman nɔ fɔ tɔk na dɛn mitin na chɔch; na so dɛn rayt na di Ju Lɔ. 35If di uman dɛn want no bɔt ɛni tin, dɛn fɔ tɔk to dɛn man na os. Na shem tin fɔ mek uman tɔk opin wan na dɛn mitin na chɔch. 36Na una fɔs bigin tɛl pipul bɔt Gɔd in wɔd? Na una nɔmɔ dɔn yɛri Gɔd in wɔd? 37If ɛnibɔdi tink se in de tɔk mɛsej we Gɔd gi am, ɛn if Gɔd in Spirit mek i ebul du sɔm ɔda tin dɛn, da pɔsin de fɔ no se wetin a de rayt so na Gɔd tɛl mi fɔ rayt am. 38If i nɔ tek wetin a de tɔk, una nɔ fɔ notis am. 39So, mi kɔmpin Kristiɛn dɛn, una fɔ want bad wan mek Gɔd gi una di pawa fɔ tɔk in mɛsej, bɔt una nɔ fɔ tap dɛn pipul we de tɔk dɛn langwej we dɛnsɛf nɔ ɔnda stand. 40Una fɔ du ɔltin di rayt we ɛn natin nɔ fɔ kɔnfyus Gɔd in wok.

will be added

X\